সমগ্ৰ ৰাজ্যজুৰি নাগৰিকত্ব সংশোধনী বিধেয়ক ২০১৬’ৰ বিৰুদ্ধে ব্যাপক প্ৰতিবাদ চলি থকাৰ মাজতে হাইলাকান্দি জিলা কংগ্ৰেছ সভাপতি তথা প্ৰাক্তন বিধায়ক ৰাহুল ৰয়ে বিধেয়কখনৰ প্ৰতি সমৰ্থন জনাই কংগ্ৰেছৰ পৰা পদত্যাগ কৰিছে।
ৰাহুল ৰয়ে শনিবাৰে তেওঁৰ পদত্যাগ পত্ৰ অসম প্ৰদেশ কংগ্ৰেছ সমিতিৰ সভাপতি ৰিপুন বৰাক দাখিল কৰিছে।
উল্লেখ্য যে, ৰাহুল ৰয় হৈছে প্ৰাক্তন কংগ্ৰেছ বিধায়ক তথা পূৰ্বৰ মুখ্য মন্ত্ৰী তৰুণ গগৈ মন্ত্ৰীসভাৰ মন্ত্ৰী গৌতম ৰয়ৰ পুত্ৰ।
অসমৰ অন্যান্য সংগঠনৰ লগতে অসমত কংগ্ৰেছ দলেও নাগৰিকত্ব সংশোধনী বিধেয়ক ২০১৬’ৰ বিৰুদ্ধে সৰৱ হৈ পৰাৰ বিপৰীতে বৰাকৰ একাংশ কংগ্ৰেছ নেতাই বিধেয়কখনৰ সমৰ্থনত বক্তৱ্য ৰাখি আহিছে।
আনহাতে, অহা ৩১ জানুৱাৰিলৈকে নাগৰিকত্ব সংশোধনী বিধেয়ক ২০১৬’ৰ বিৰুদ্ধে অসম প্ৰদেশ কংগ্ৰেছ সমিতিয়ে ঘোষণা কৰা এলানি প্ৰতিবাদী কাৰ্যসূচীৰ মাজতে বৰাকৰ কংগ্ৰেছী নেতা ৰাহুল ৰয়ে বিধেয়কখনক সমৰ্থন জনাই পদত্যাগ কৰে।
ৰাহুল ৰয়ে প্ৰদেশ কংগ্ৰেছৰ সভাপতি ৰিপুন বৰালৈ লিখা পত্ৰখনত লিখিছে যে, ‘’আপুনি এতিয়া ৰাজ্যখনত হিন্দু বাঙালী বিৰোধী কাৰ্যসূচী গ্ৰহণ কৰিছে আৰু জিলা পৰ্যায়ত নাগৰিকত্ব বিধেয়কখনৰ বিৰোধিতা কৰা হৈছে, যাৰ বাবে জিলা সভাপতি হিচাপে মই সেয়া ৰূপায়ন কৰিব নোৱাৰো।‘’
তদুপৰি, ৰয়ে লিখিছে, ‘’ মই ইয়াক গৰিহনা দিছো, কিয়নো প্ৰথমতে মই হিন্দু বাঙালী আৰু মই মোৰ ধৰ্ম আৰু জাতিৰ বিৰুদ্ধে যাব নোৱাৰো। সেয়েহে, মই হাইলাকান্দি জিলা সভাপতি পদৰ পৰা পদত্যাগ কৰিলো।‘’
আনহাতে, এই সন্দৰ্ভত বিৰোধী দলপতি দেবব্ৰত শইকীয়াই কয়, ‘’তেওঁ অসম ভ্ৰমণকালত জেপিচিৰ আগত বিধেয়কখন সম্পৰ্কে কেতিয়াও তেওঁৰ মত দাঙি ধৰা নাছিল। তেওঁৰ বিৰুদ্ধে পঞ্চায়ত নিৰ্বাচনৰ সময়ত অনুশাসন ভংগৰ অভিযোগ উঠিছিল আৰু প্ৰদেশ কংগ্ৰেছে তাৰ তদন্ত চলাই আছে। সেয়েহে, অনুশাসনমূলক ব্যৱস্থাৰ সন্মুখীন হোৱাৰ আশংকা কৰি বিষয়টো আনফালে ঢাল খুৱাবলৈ গৈ তেওঁ এনে অভিযোগ আনিছে।‘’
