হাৰিয়ানাৰ এগৰাকী কংগ্ৰেছ বিধায়ক আৰু ভাৰতীয় ৰাষ্ট্ৰীয় লোকদলৰ এগৰাকী প্ৰাক্তন বিধায়কৰ বাসগৃহত তালাচী চলাই বৃ্হৎ সফলতা লাভ কৰিছে এনফ’ৰ্চমেণ্ট ডাইৰেক্টৰেটে। এই অভিযানত ইডিয়ে এক শতাধিক বটল সুৰা, ৫ কোটি টকা নগদ ধন, অবৈধ বিদেশী নিৰ্মিত অস্ত্ৰ আৰু প্ৰায় ৩০০ কাৰ্টিজ জব্দ কৰে।
কংগ্ৰেছৰ বিধায়ক সুৰেন্দ্ৰ পানৱাৰ আৰু ভাৰতীয় ৰাষ্ট্ৰীয় লোকদলৰ প্ৰাক্তন বিধায়ক দিলবাগ সিং আৰু তেওঁলোকৰ সহযোগীসকলৰ সৈতে জড়িত কেইবাটাও স্থানত তদন্তকাৰী সংস্থা এনফ’ৰ্চমেণ্ট ডাইৰেক্টৰেটে অবৈধ খননৰ অভিযোগত অভিযান চলাইছিল।
কালি কংগ্ৰেছৰ প্ৰাক্তন বিধায়ক সুৰেন্দ্ৰ পানৱাৰ, এগৰাকী খনি ব্যৱসায়ী আৰু তেওঁৰ সহযোগীসকলৰ বাসগৃহত আৰম্ভ হৈছিল এই অভিযান। বৃহস্পতিবাৰে ছখন গাড়ীৰে ১৫ৰ পৰা ২০জন তদন্তকাৰী সংস্থাৰ বিষয়াই বিধায়কগৰাকীৰ বাসগৃহ, কাৰ্যালয় আৰু অন্যান্য স্থানত উপস্থিত হয় আৰু অভিযান অব্যাহত থাকে।
ইডিৰ দলটোৱে লগতে বিধায়কগৰাকীৰ বাসগৃ্হত উপস্থিত থকা পৰিয়াল আৰু কৰ্মচাৰীৰ ফোন জব্দ কৰে। বৃহস্পতিবাৰে ২০টাকৈ স্থানত অভিযান চলায় দলটোৱে। সুৰা আৰু নগদ ধনৰ উপৰিও ৪ৰ পৰা ৫ কিলোগ্ৰাম ওজনৰ তিনিখন সোণৰ বিস্কুটো জব্দ কৰে তদন্তকাৰী সংস্থাৰ বিষয়াসকলে।
ৰাষ্ট্ৰীয় সেউজ ন্যায়াধিকৰণ খনন নিষিদ্ধ কৰাৰ পিছত যমুনানগৰ আৰু ইয়াৰ আশে-পাশে থকা জিলাসমূহত বোল্ডাৰ, শিলগুটি আৰু বালিৰ অবৈধ খননৰ অভিযোগৰ তদন্তৰ বাবে হাৰিয়ানা আৰক্ষীয়ে একাধিক গোচৰ পঞ্জীয়ন কৰাৰ পিছতে ২০১৩ চনত তদন্তকাৰী সংস্থাটোৱে ধন সৰবৰাহৰ গোচৰ ৰুজু কৰিছিল।
