হাৰিয়ানা বিজেপি চৰকাৰে আই পি এছৰ জ্যেষ্ঠ বিষয়া ৱাই পুৰণ কুমাৰৰ আত্মহত্যাৰ তদন্তত সোমবাৰে ডি জি পি শত্ৰুজিত কাপুৰক ছুটীত প্ৰেৰণ কৰে। পুৰণৰ ছুইচাইড নোটতো শত্ৰুজিতৰ নাম উল্লেখ কৰা আছিল। আত্মহত্যাকাৰী বিষয়াজনে তেওঁৰ বিৰুদ্ধে মানসিক নিৰ্যাতন আৰু বৈষম্যৰ অভিযোগ উত্থাপন কৰিছিল। ঘটনা সন্দৰ্ভত তদন্ত অব্যাহত আছে।
হাৰিয়ানা আৰক্ষীৰ সূত্ৰ অনুসৰি ৰাজ্য চৰকাৰে ৰোহটকৰ আৰক্ষী অধীক্ষক নৰেন্দ্ৰ বিজৰ্ণিয়াক বদলি কৰিছে। একে সময়তে কাপুৰক ছুটীলৈ প্ৰেৰণ কৰা হৈছে। তদন্ত সম্পূৰ্ণ নোহোৱালৈকে তেওঁ কামত যোগদান কৰিব নোৱাৰিব বুলি কোৱা হৈছে।
মন কৰিবলগীয়া যে ২০২৩ চনৰ ১৬ আগষ্টত শত্ৰুজিত কাপুৰে হাৰিয়ানাৰ ডিজিপিৰ দায়িত্ব গ্ৰহণ কৰিছিল। ইয়াৰ পূৰ্বে তেওঁ দুৰ্নীতি নিবাৰক ব্যুৰোৰ ডিজি আছিল। তেওঁ ৰাজ্যৰ লগতে ৰাষ্ট্ৰীয় পৰ্যায়তো কেইবাটাও গুৰুত্বপূৰ্ণ পদত কাম কৰি আহিছে। তেওঁ চিবিআইতো আছিল।
যোৱা ৭ অক্টোবৰত ২০০১ চনৰ বেটচৰ আই পি এছ বিষয়া ৱাই পুৰণ কুমাৰে নিজৰ চাৰ্ভিচ ৰিভলভাৰেৰে আত্মহত্যা কৰাৰ অভিযোগ উঠিছে। চণ্ডীগড়ৰ ১১ নং ছেক্টৰত থকা ঘৰৰ পৰা উদ্ধাৰ কৰা হৈছিল তেওঁৰ মৃতদেহ।
মৃত বিষয়াজনৰ পকেটত উদ্ধাৰ হৈছে এখন ছুইচাইড নোট। ইয়াত তেওঁ তিনিজন আই এ এছ বিষয়াকে ধৰি মুঠ ১৫জন বিষয়াৰ বিৰুদ্ধে মানসিক নিৰ্যাতন আৰু বৈষম্যৰ অভিযোগ উত্থাপন কৰিছিল।
ঘটনাৰ তদন্তৰ বাবে গঠন কৰা হৈছে ছয়জনীয়া এছ আই টি। ইফালে, মৃত্যুৰ ৬ দিনৰ পাছতো আই পি এছ বিষয়াজনৰ পৰিয়ালে মৰণোত্তৰ পৰীক্ষাৰ বাবে সন্মতি দিয়া নাই। শেষকৃত্যও সম্পন্ন কৰা হোৱা নাই। হাৰিয়ানা চৰকাৰে আত্মঘাতী বিষয়াগৰাকীৰ পত্নী জ্যেষ্ঠ আই এ এছ বিষয়া অমনীত পি কুমাৰক পতিয়ন নিয়াবলৈ চেষ্টা চলাই আছে।
