ৰাষ্ট্ৰীয় শ্বুটিং প্ৰশিক্ষকৰ বিৰুদ্ধে ৰাষ্ট্ৰীয় পৰ্যায়ৰ এগৰাকী ১৭ বছৰীয়া শ্বুটাৰক ধৰ্ষণৰ অভিযোগে তীব্ৰ চাঞ্চল্যৰ সৃষ্টি হৈছে। আৰক্ষীয়ে জনোৱা মতে, এই ঘটনাত ইতিমধ্যে এটা গোচৰ ৰুজু কৰা হৈছে।
কিশোৰীগৰাকীৰ অভিযোগৰ ভিত্তিত অভিযুক্ত ৰাষ্ট্ৰীয় পৰ্যায়ৰ প্ৰশিক্ষক অংকুশ ভৰদ্বাজক গ্ৰেপ্তাৰ কৰা হৈছে। প্ৰশিক্ষকৰ পদৰ পৰা নিলম্বিত হোৱা বুলিও খবৰ আহিছে। তেওঁৰ বিৰুদ্ধে POCSO ধাৰাত গোচৰ ৰুজু কৰা হৈছে।
আৰক্ষীয়ে জনোৱা মতে, ১৬ ডিচেম্বৰত দিল্লীৰ কৰ্ণী সিং শ্বুটিং ৰেঞ্জত অনুষ্ঠিত শ্বুটিং চেম্পিয়নশ্বিপৰ সময়ত এই ঘটনা সংঘটিত হৈছিল। অভিযোগকাৰী কিশোৰী শ্বুটাৰগৰাকীয়ে জনোৱা মতে, প্ৰতিযোগিতাৰ অন্তত প্ৰশিক্ষকে তেওঁৰ প্ৰদৰ্শনৰ মূল্যায়নৰ অজুহাতত ফৰিদাবাদৰ সুৰজকুণ্ড অঞ্চলৰ এখন হোটেললৈ মাতি পঠাইছিল।
ভুক্তভোগী কিশোৰীগৰাকীয়ে লগতে কয় যে সেই হোটেললৈ যোৱাৰ পিছত প্ৰশিক্ষকে তেওঁৰ লগত অশ্লীল আচৰণ কৰিবলৈ আৰম্ভ কৰে। তাৰ পিছত তেওঁক ধৰ্ষণ কৰা হয়। ১৭ বছৰীয়া শ্বুটাৰগৰাকীৰ অভিযোগৰ ভিত্তিত সংশ্লিষ্ট থানাত গোচৰ ৰুজু কৰা হৈছে।
আৰক্ষীয়ে লগতে জনোৱা মতে, অংকুশে প্ৰথমে ছোৱালীজনীক হোটেলৰ লবীত লগ কৰিবলৈ কৈছিল। পিছত জোৰকৈ তেওঁক কোঠালৈ লৈ যায়। যৌন নিৰ্যাতনৰ পিছত অংকুশে ছোৱালীজনীক ভাবুকিও দিয়ে। তেওঁ ছোৱালীজনীৰ কেৰিয়াৰ নষ্ট কৰাৰ লগতে পৰিয়ালৰ ক্ষতি কৰাৰ ভাবুকি দিছিল।
ফৰিদাবাদ আৰক্ষীৰ মুখপাত্ৰ যশপাল সিঙে কয় যে গোচৰৰ সকলো দিশৰ তদন্ত চলি আছে। হোটেলখনৰ লগতে ইয়াৰ আশে-পাশে থকা অঞ্চলৰ চিচিটিভি ফুটেজ পৰীক্ষা কৰা হৈছে।
উল্লেখ্য যে দেশৰ ১৩ গৰাকী ৰাষ্ট্ৰীয় পৰ্যায়ৰ পিষ্টল কোচৰ ভিতৰত অংকুশ অন্যতম। ভাৰতীয় নেচনেল ৰাইফল এছ’চিয়েশ্যনে তেওঁক এই পদলৈ আনিছিল। সমগ্ৰ দেশতে তীব্ৰ নিন্দাৰ জোৱাৰ উঠিছে।
