দেশত কোভিডৰ ভাৰতীয় প্ৰজাতিয়ে সংহাৰ ৰূপ ধাৰণ কৰাৰ সময়তে এক ভয়ানক তথ্য পোহৰলৈ আহিছে।
কেন্দ্ৰীয় স্বাস্থ্য মন্ত্ৰণালয়ৰ মতে ইতিমধ্যে দেশৰ ৰাজ্য আৰু কেন্দ্ৰীয় শাসিত অঞ্চলসমূহক প্ৰায় ২০ কোটিৰো অধিক কোভিড ভেকচিন বিনামূলীয়াকৈ প্ৰদান কৰা হৈছে।
ইয়াৰ মাজত ১৮ কোটি ভেকচিন ৰাজ্য আৰু কেন্দ্ৰীয় শাসিত অঞ্চলসমূহে ব্যৱহাৰ কৰাৰ বিপৰীতে নষ্ট হৈছে ২ কোটিৰো অধিক ভেকচিন।
কেন্দ্ৰীয় স্বাস্থ্য মন্ত্ৰমালয়ৰ শেহতীয়া (সোমবাৰৰ পুৱা ৮ বজা) তথ্য অনুসৰি ৰাজ্য আৰু কেন্দ্ৰীয় শাসিত অঞ্চলসমূহক প্ৰদান কৰা ২০,৭৬,১০,২৩০ টা ভেকিচনৰ ভিতৰত ১৮,৭১,১৩,৭০৫ টা ভেকচিনহে ব্যৱহাৰ কৰিব পৰা হৈছে।
অৰ্থাৎ কেন্দ্ৰই ৰাজ্য আৰু কেন্দ্ৰীয় শাসিত অঞ্চলসমূহক প্ৰদান কৰা প্ৰায় ২ কোটি ভেকচিন নষ্ট হৈছে। দেশত মুঠ নষ্ট হোৱা ভেকচিনৰ পৰিমাণ হৈছে ২ কোটি ৪৯ লাখ ৫ হাজাৰ ২২৫ টা। এই হিচাপত আজিৰ তাৰিখলৈকে দেশত ভেকচিন অপচয় হাৰ যথেষ্ট পৰিমাণে হ্ৰাস হৈ ০.৯৯ শতাংশ হৈছে।
শেহতীয়াকৈ ৰাজ্যসূহত কিমান ভেকচিন অপচয় হৈছে সেই তথ্য ৰাজহুৱা হোৱা নাই যদিও যোৱা সপ্তাহলৈকে হাৰিয়ানাই ৬.৪৯ শতাংশ হাৰেৰে সৰ্বাধিক ভেকচিন অপচয় কৰিছিল।
হাৰিয়ানাৰ পিছতে অসম এই তালিকাৰ দ্বিতীয় স্থানত আছিল। অসমত ভেকচিন অপচয়ৰ হাৰ আছিল ৫.৯২ শতাংশ। ৫.৬৮ শতাংশ হাৰেৰে ৰাজস্থানে তৃতীয় স্থানত থকাৰ বিপৰীতে চুবুৰীয়া ৰাজ্য মেঘালয়ে ৫.৬৭ শতাংশ হাৰেৰে চতুৰ্থ, ৫.১৯ শতাংশৰেৰে বিহাৰে পঞ্চম আৰু ৪.৯৪ শতাংশেৰে মণিপুৰে ষষ্ঠ স্থানত আছিল।
উল্লেখ্য যে পূৰ্বতকৈ ৰাজ্যসমূহৰ ভেকচিন অপচয় হাৰ হ্ৰাস পাইছে। এপ্ৰিলৰ তৃতীয় সপ্তাহলৈকে অসমৰ ভেকচিন অপচয়ৰ হাৰ আছিল ৭.৬৯ শতাংশ। সেই সময়ছোৱাত সৰ্বাধিক ১২.১০ শতাংশ অপচয়েৰে তামিলনাডুৱে প্ৰথম স্থানত থকাৰ বিপৰীতে হাৰিয়ানাই ৯.৭৪ শতাংশ হাৰেৰে দ্বিতীয় আৰু ৮.১২ শতাংশ অপচয়েৰে পঞ্চাৱে তৃতীয় স্থানত আছিল।
এই সময়চোৱাত অসমৰ অপচয়ৰ হাৰ ৭.৬৯ৰ পৰা ৫.৯২ শতাংশলৈ হ্ৰাস হৈছে। আনহাতে শীৰ্ষ স্থানত থকা হাৰিয়ানাৰো পূৰ্বৰ ৯.৭৪ শতাংশৰ পৰা ৬.৪৯ লৈ অপচয়ৰ হাৰ হ্ৰাস হৈছে।
