টেষ্ট ক্ৰিকেটত প্ৰথম আৰু একমাত্ৰ ভাৰতীয় বলাৰ হিচাপে অনিল কুম্বলেই এই কৃতিত্ব অৰ্জন কৰিছে, এইবাৰ ঘৰুৱা ক্ৰিকেটত সেই কৃতিত্ব অৰ্জন কৰিলে অংশুল কাম্বোজে। হাৰিয়ানাৰ যুৱ পেচাৰগৰাকীয়ে ৰঞ্জি ট্ৰফীৰ এটা ইনিংছত ১০টা উইকেট দখল কৰাৰ এক বিৰল অভিলেখ গঢ়িবলৈ সক্ষম হৈছে।
ৰোহটকত অনুষ্ঠিত ৰঞ্জী এলিট-চি গ্ৰুপৰ এখন খেলত কেৰালাৰ বিৰুদ্ধে খেলে হাৰিয়ানাই। ৰোহটকৰ ২২ গজে সদায়ে পেচাৰসকলক সহায় কৰে। স্বাভাৱিকতে হাৰিয়ানাই টছত জয়লাভ কৰি কেৰালাক প্ৰথমে বেটিং কৰিবলৈ পঠিয়ায়। প্ৰথম ইনিংছত অংশুলে কেৰালাৰ ১০ জন বেটছমেনকেই পেভলিয়নলৈ পঠিয়াই ইতিহাস ৰচনা কৰে।
প্ৰথম ইনিংছত ২৯১ ৰান কৰি অল আউট হৈছিল কেৰালা। তেওঁলোকে ১১৬.১ অভাৰ আৰামত বেটিং কৰে। দলটোৰ চাৰিজন বেটছমেনে অৰ্ধশতক অৰ্জন কৰে। ৫৫ ৰান সংগ্ৰহ কৰি খেলপথাৰ এৰি যায় ৰোহন কুন্নুমলে। ১০২টা বলৰ ইনিংছত ৬টা চাৰি মাৰে। অক্ষয় চন্দ্ৰনে ৫৯ ৰান সংগ্ৰহ কৰে। ১৭৮টা বলৰ ইনিংছত তেওঁ ৫টা চাৰি মাৰে।
লগতে পঢ়কঃ বিশ্বকাপৰ কোৱালিফাইং মেচত মেছিৰ আৰ্জেণ্টিনাক পৰাস্ত কৰি চমক পেৰাগুৱেৰ
অধিনায়ক শচীন বাবীয়ে ৫২ ৰান সংগ্ৰহ কৰি পেভলিয়নলৈ উভতি যায়। ১৪৬টা বলৰ সতৰ্ক ইনিংছটোত তেওঁ ২টা চাৰি মাৰে। মহম্মদ আজহাৰুদ্দিনে ৭৪টা বলত ৫৩ ৰানৰ আগ্ৰাসী ইনিংছ খেলে। তেওঁ ৩টা চাৰি আৰু ৩টা ছয় মাৰে। ইয়াৰ উপৰিও শ্বাউন ৰজাৰে ১০৭টা বলত ৪২ ৰান সংগ্ৰহ কৰে। তেওঁ ৩টা চাৰি আৰু ১টা ছয় মাৰে।
হাৰিয়ানাৰ হৈ প্ৰথম ইনিংছত অংশুল কম্বোজে ৩০.১ অভাৰত বলিং কৰে। তেওঁ মাত্ৰ ৪৯ ৰানত ১০টা উইকেট দখল কৰে, য’ত ৯টা মেডেন অভাৰ আছিল। কম্বোজে ৰঞ্জি ট্ৰফীৰ ইতিহাসত এটা ইনিংছত ১০টা উইকেট দখল কৰা তৃতীয়জন বলাৰ হিচাপে পৰিগণিত হয়। প্ৰেমাংশ চেটাৰ্জী আৰু প্ৰদীপ সুন্দৰমে তেওঁৰ আগতে এই কৃতিত্ব অৰ্জন কৰিছে।
১৯৫৬-৫৭ ছিজনত বংগৰ বাওঁহতীয়া পেচাৰ প্ৰেমাংশুৱে অসমৰ বিৰুদ্ধে ৰঞ্জী খেলৰ এটা ইনিংছত মাত্ৰ ২০ ৰানত ১০টা উইকেট দখল কৰিছিল। ৰঞ্জী ট্ৰফীৰ ইতিহাসত শ্ৰেষ্ঠ বলিং প্ৰদৰ্শনৰ এয়া সৰ্বকালৰ অভিলেখ।
লগতে পঢ়কঃ পুনৰ হ্ৰাস পালে টকাৰ মূল্য, ডলাৰৰ হিচাপত সৰ্বনিম্ন; ট্ৰাম্পৰ প্ৰত্যাৱৰ্তনতে ভাৰতীয় মুদ্ৰাৰ পতন?
১৯৮৫-৮৬ ছিজনত ৰাজস্থানৰ সোঁহতীয়া পেচাৰ প্ৰদীপে বিদৰ্ভৰ বিৰুদ্ধে ৰঞ্জী মেচ এখনৰ ইনিংছত ৭৮ ৰানত ১০টা উইকেট দখল কৰিছিল। ৰঞ্জীৰ এটা ইনিংছত সৰ্বোত্তম বলিং প্ৰদৰ্শনৰ ক্ষেত্ৰত অংশুলে প্ৰদীপক অতিক্ৰম কৰে।
মুঠতে ভাৰতৰ ঘৰুৱা প্ৰথম শ্ৰেণীৰ ক্ৰিকেটত ষষ্ঠ বলাৰ হিচাপে এটা ইনিংছত ১০টা উইকেট দখল কৰাৰ কৃতিত্ব অৰ্জন কৰে অংশুল কাম্বোজে। কুম্বলে, প্ৰেমাংশু, প্ৰদীপ আৰু অংশুলৰ উপৰিও এই তালিকাত দেবাশীশ মহান্তি আৰু সুভাষ গুপ্তেৰ নাম আছে।
1⃣ innings 🤝 1⃣0⃣ wickets 👏
Historic Spell 🙌
3⃣0⃣.1⃣ overs
9⃣ maidens
4⃣9⃣ runs
1⃣0⃣ wickets 🔥Watch 📽️ Haryana Pacer Anshul Kamboj’s record-breaking spell in the 1st innings against Kerala 👌👌#RanjiTrophy | @IDFCFIRSTBank pic.twitter.com/RcNP3NQJ2y
— BCCI Domestic (@BCCIdomestic) November 15, 2024
১৯৯৯ চনত পাকিস্তানৰ বিৰুদ্ধে টেষ্ট খেলত কুম্বলেই এই কৃতিত্ব অৰ্জন কৰিছিল। ২০০০-০১ ছিজনত ইষ্ট বনাম চাউথ জ’নৰ খেলখনত মহান্তিয়ে এই কৃতিত্ব অৰ্জন কৰিছিল। ১৯৫৪-৫৫ ছিজনত বম্বে বনাম পাকিস্তান কম্বাইণ্ড চাৰ্ভিচেছ আৰু বাহাৱালপুৰ একাদশৰ খেলখনত সুভাষ গুপ্তেই এনে অভিলেখ গঢ়ি তুলিছিল।
