বৰ্তমান সময়ত প্ৰযুক্তি অবিহনে আমাৰ জীৱনটো কল্পনা কৰাই অসম্ভৱ হৈ পৰিছে। স্মাৰ্টফোনটো আমাৰ হাতৰ মুঠিত থকাৰ বাবে ই গোটেই বিশ্বখনক চাব পৰা এক সহজ মাধ্যম হৈ পৰিছে। যিকোনো তথ্য বিচাৰি উলিওৱাৰ পৰা আদি কৰি অচিনাকি ঠাইৰ বাট বিচাৰি পোৱা বা ঘৰতে বহি খাদ্য অৰ্ডাৰ কৰালৈকে সকলোবোৰ এতিয়া এক ক্লিকতেই সম্ভৱ। বিশেষকৈ ক’ৰোনাৰ পাছৰ পৰা আমাৰ সকলোৰে মাজত প্ৰযুক্তিৰ ওপৰত নিৰ্ভৰশীলতা বহু পৰিমাণে বৃদ্ধি পাইছে।
আজিৰ নৱপ্ৰজন্মই চচিয়েল মিডিয়াত অধিক সময় কটোৱাৰ ফলত গুগল, ইউটিউব বা জিমেইলৰ দৰে এপসমূহ আমাৰ জীৱনৰ এক অবিচ্ছেদ্য অংগ হৈ পৰিছে। কিন্তু সমস্যাটো হৈছে এই এপবোৰ ব্যৱহাৰ কৰাৰ সময়ত আমি জনা-অজানিতে গুগলক আমাৰ বহু ব্যক্তিগত তথ্য দি দিওঁ। আপুনি কলৈ গৈছে, ইণ্টাৰনেটত কি বস্তু বিচাৰিছে বা কোনটো এপ কিমান দেৰি চলাইছে সেই সকলোবোৰ তথ্য গুগলৰ ডেটা বক্সত জমা হৈ থাকে। অৱশ্যে এতিয়া ব্যৱহাৰকাৰীসকলে নিজেই চাব পাৰে যে গুগলে তেওঁলোকৰ কোনবোৰ তথ্য সংগ্ৰহ কৰি ৰাখিছে।
গুগলে আপোনাৰ বহুতো গোপনীয় তথ্য সংগ্ৰহ কৰে যিবোৰৰ বিষয়ে আপুনি হয়তো সচেতন নহয়। যদি আপোনাৰ ফোনৰ লোকেচন অন থাকে তেন্তে গুগলে সহজেই জানিব পাৰে আপুনি বৰ্তমান ক’ত আছে আৰু ক’ৰ পৰা ক’লৈ গৈছে। কেৱল সেয়াই নহয় আপুনি চাৰ্চ ইঞ্জিন বা ইউটিউবত যিবোৰ বস্তু বিচাৰে সেই সকলোবোৰ চাৰ্চ হিষ্ট্ৰী হিচাপে জমা হৈ থাকে। আনকি ভইচ চাৰ্চৰ জৰিয়তেও আপুনি কোনবোৰ বিষয়ত আগ্ৰহী সেইটো গুগলে বুজি পায়। এই সকলোবোৰ আপোনাৰ অজ্ঞাতে জমা হৈ থাকে যদিও আপুনি নিজৰ ফোনৰ জৰিয়তেই এইবোৰ পৰীক্ষা কৰি চাব পাৰে। ইয়াৰ বাবে প্ৰথমে ফোনৰ ছেটিংছলৈ গৈ গুগল অপচনত ক্লিক কৰি মেনেজ ইউৰ গুগল একাউণ্টলৈ যাব লাগিব। তাৰ পাছত ডাটা এণ্ড প্ৰাইভেচী ছেকচনলৈ গ’লে আপুনি দেখিবলৈ পাব যে কোনবোৰ ৱেবছাইট বা এপৰ তথ্য গুগলে সংগ্ৰহ কৰি ৰাখিছে। ইয়াৰ পৰাই আপুনি আপোনাৰ লোকেচন ডাটা সংৰক্ষণ কৰা হৈছে নে নাই সেইটোও চাব পাৰিব।
আপোনাৰ ব্যক্তিগত তথ্য সুৰক্ষিত ৰখাৰ বাবে কিছুমান সজাগতা অতি দৰকাৰী। যদি প্রয়োজন নাই তেন্তে ফোনৰ লোকেচন সদায় অফ কৰি ৰাখিব লাগে। তদুপৰি ফোনৰ ছেটিংছত থকা অটো ডিলিট অপচনটো অন কৰি থ’লে আপোনাৰ ডাটা নিৰ্দিষ্ট সময়ৰ মূৰে মূৰে নিজে নিজেই ডিলিট হৈ যাব। আপুনি ৩ মাহ, ১৮ মাহ বা ৩৬ মাহৰ বাবে এই সময় নিৰ্ধাৰণ কৰি দিব পাৰে। ইয়াৰ উপৰি এড পাৰ্চনেলাইজেচন অপচনটো অফ কৰি ৰাখিলে গুগলে আপোনাৰ চাৰ্চ কৰা অভ্যাস ট্ৰেক কৰিব নোৱাৰে। যদি আপুনি ভইচ কমাণ্ড ব্যৱহাৰ নকৰে তেন্তে সেইটোও বন্ধ কৰি ৰখাটোৱেই নিৰাপদ। স্মাৰ্টফোনে আমাৰ জীৱনটো সহজ কৰি তুলিলেও আমাৰ ব্যক্তিগত তথ্যৰ সুৰক্ষাৰ বাবে সচেতন হোৱাটো খুবেই দৰকাৰী। নহ’লে আপোনাৰ অজান্তেই আপোনাৰ ব্যক্তিগত তথ্যবোৰ ডাঙৰ টেক কোম্পানীসমূহৰ হাতলৈ গুচি যাব পাৰে।
