কোচিং চেণ্টাৰত নামভৰ্তি কৰিবলৈ তেওঁৰ হাতত টকা নাছিল। মাক আছিল এগৰাকী অংগনবাড়ী কৰ্মী। দেউতাক কৰ্মসূত্ৰে এগৰাকী ৰান্ধনী। দুয়োজনে যি উপাৰ্জন কৰে সেইখিনিৰে পৰিয়ালটো যেনেতেনে জীয়াই আছে। কিন্তু ছোৱালীগৰাকী প্ৰশাসক হ’ব বিচাৰে। তেওঁৰ সপোন কেনেকৈ পূৰণ হ’ব? এই চিন্তাই যেতিয়া দম্পতীহালক খাই পেলাইছিল, তেতিয়া ছোৱালীজনীয়েই তেওঁলোকক আশ্বস্ত কৰিছিল যে কোচিং চেণ্টাৰৰ কোনো প্ৰয়োজন নাই, তেওঁ নিজে পঢ়া-শুনা কৰি অসামৰিক সেৱাত উত্তীৰ্ণ হ’ব। তেতিয়াৰ পৰাই আৰম্ভ হ’ল যুঁজ, আৰু এই পৰীক্ষাত তেওঁ ইউটিউবৰ সহায় লৈ উত্তীৰ্ণ হ’বলৈ সক্ষম হয়।
সফলতা লাভ কৰা বিনি মুৰুলী ওড়িশাৰ বণ্ডা জনজাতীয় সম্প্ৰদায়ৰ এগৰাকী যুৱতী। ইউটিউব ভিডিঅ’ চাই আৰু ইণ্টাৰনেট ব্যৱহাৰ কৰি তেওঁ ওড়িশা অসামৰিক সেৱাৰ বাবে প্ৰস্তুতি চলাইছিল। শনিবাৰে সন্ধিয়া ঘোষণা কৰা হয় পৰীক্ষাৰ ফলাফল।বিনিয়ে ৫৯৬ ৰেংক লাভ কৰিবলৈ সক্ষম হয়। বণ্ডা সমাজৰ পৰা বিনিয়েই প্ৰথমে ইমান উচ্চ পদবীৰ চাকৰি লাভ কৰিছে।
বিনি ওড়িশাৰ মালকানগিৰিৰ খেমাগুৰাৰ বাসিন্দা। মাতৃ সুনামালী এগৰাকী অংগনবাড়ী কৰ্মী। পিতৃ ৰাম মুৰুলীয়ে চৰকাৰী ৰান্ধনী হিচাপে কাম কৰে। বন্দৰ ঘাটৰ চৰকাৰী বিদ্যালয়ৰ পৰা বিনিয়ে পঢ়া-শুনা কৰিছিল। ইয়াৰ পিছত তেওঁ জৱাহৰ নৱোদয় বিদ্যালয়ত উচ্চ শিক্ষাৰ বাবে নামভৰ্তি কৰে। বিনীয়ে কয়, “মই জেইপুৰৰ বিক্ৰম দেৱী কলেজৰ পৰা উদ্ভিদ বিজ্ঞানত মাষ্টাৰছ কৰিলোঁ। তাৰ পৰা যি উপাৰ্জন কৰিলো, সেই টকাৰে পঢ়া-শুনা খৰচ কৰিলোঁ।
তেওঁ ২০২০ চনত প্ৰথমবাৰৰ বাবে অসামৰিক সেৱাৰ পৰীক্ষাত অৱতীৰ্ণ হৈছিল। কিন্তু পাছ কৰিব নোৱাৰিলে। বিনিয়ে কয় যে পৰীক্ষাত ফেইল কৰাৰ পাছত তেওঁ উপলব্ধি কৰিছিল যে তেওঁ এতিয়াও নিজকে প্ৰস্তুত কৰিবলৈ কঠোৰ পৰিশ্ৰম কৰিব লাগিব। তেতিয়াৰ পৰাই আৰম্ভ হ’ল তেওঁৰ সপোন পূৰণৰ সংগ্ৰাম। কোচিং চেণ্টাৰলৈ যোৱা নাছিল। ইউটিউবৰ সহায়ত তেওঁ পঢ়া-শুনা অব্যাহত ৰাখিছিল। বিনিয়ে কয় যে অৱশেষত তেওঁৰ এই প্ৰচেষ্টা সফল হ’ল।
