শুকুৰবাৰে বিধানসভাত জলসিঞ্চন মন্ত্ৰী অশোক সিংহলে উল্লেখ কৰে যে, ২০১৫-১৬ চনৰ পৰা যোৱা ৯ বছৰত অসমৰ মুঠ কৃষিভূমি সামান্য হ্ৰাস পাইছে। ইয়াৰ বিপৰীতে জলসিঞ্চিত ভূমি বৃদ্ধি পাইছে ।
শিৱসাগৰৰ বিধায়ক অখিল গগৈৰ এক প্ৰশ্নৰ উত্তৰত সিংহলে কয় যে, ২০১৫-১৬ চনত ৰাজ্যৰ মুঠ কৃষিভূমি আছিল ৩৫.০৯ লাখ হেক্টৰ, যিটো ২০২৪-২৫ চনত ৩৪.৯৪ লাখ হেক্টৰলৈ হ্ৰাস পাইছে ।তেওঁ লগতে কয় যে একে সময়ছোৱাত নিকা কৃষি ভূমি ২৮.০১ লাখ হেক্টৰৰ পৰা ২৮.৬২ লাখ হেক্টৰলৈ সামান্যভাৱে বৃদ্ধি পাইছে ।
সিংহল কয় যে, ২০১৫-১৬ চনত নিকা জলসিঞ্চিত ভূমি আৰু মুঠ জলসিঞ্চিত ভূমি ক্ৰমে ৩.২৫ লাখ হেক্টৰ আৰু ৪.৫৫ লাখ হেক্টৰ আছিল, যিটো ৰাজ্যৰ মুঠ কৃষিভূমিৰ ১১.৬০ শতাংশ আছিল ।
২০২৪-২৫ চনত নিকা জলসিঞ্চিত ভূমি আৰু মুঠ জলসিঞ্চিত ভূমি ক্ৰমে ৬.৯৫ লাখ হেক্টৰ আৰু ৮.৮০ লাখ হেক্টৰ আছিল, যিটো মুঠ কৃষিভূমিৰ ২৪.২৮ শতাংশ বুলিও মন্ত্ৰীজনে উল্লেখ কৰে ।
সিংহলে কয় যে ২০১৫-১৬ চনৰ তথ্য পৰিসংখ্যা হাতপুথি, ২০১৭, আৰু জলসিঞ্চন বিভাগৰ পৰা পোৱাৰ বিপৰীতে ২০২৪-২৫ চনৰ পৰিসংখ্যা বিভাগৰ তথ্যৰ ওপৰত ভিত্তি কৰি লোৱা হৈছে ।
