বিশ্ব ক্ৰিকেটত অলৰাউণ্ড প্ৰদৰ্শনেৰে জনপ্ৰিয়তাৰ শিখৰত থকা ইংলিছ ক্ৰিকেটাৰ মইন আলিয়ে তেওঁৰ আইপিএল ফ্ৰেঞ্চাইজি চেন্নাই চুপাৰ কিংছৰ মেনেজমেণ্টক এটা বিশেষ অনুৰোধ কৰি বাতৰিৰ শিৰোনামাৈল আহিছে।
তেওঁ অনুৰোধ কৰিছে যে চেন্নাই চুপাৰ কিংছৰ হৈ খেলপথাৰত নামোতে দলটোৰ জাৰ্চিত থকা এ.এন.জে ১০০০০ (SNJ 10000) নামৰ সুৰাৰ কোম্পানীৰ লগ’টো (logo) যাতে তেওঁ পৰিধান কৰিব লগা জাৰ্চিৰ পৰা আঁতৰাই ৰাখে।
অলৰাউণ্ডাৰজনে ইচলাম ধৰ্ম বিশ্বাস আৰু পালন কৰি আহিছে আৰু তেওঁৰ ধৰ্মীয় বিশ্বাসমতে সুৰা সেৱন পাপ।
সেয়ে তেওঁ বিশ্বৰ যিকোনো ক্ৰিকেট টুৰ্ণামেণ্টত অংশগ্ৰহণ কৰোতে জাৰ্চিত সুৰাৰ কোম্পানীৰ লগ’ তথা প্ৰতীক থাকিলে জাৰ্চিটো পৰিধান কৰিবলৈ আপত্তি কৰি আহিছে।
চেন্নাই চুপাৰ কিংছৰ জাৰ্চিত থকা সুৰাৰ কোম্পানীটোৱে দলটোক পৃষ্ঠপোষকতা (sponsor) কৰি আহিছে।
অলৰাউণ্ডাৰজনৰ এই অনুৰোধ পোৱাৰ পাছতে দলটোৰ মেনেজমেণ্টে গ্ৰহণ কৰিছে আৰু তেওঁৰ জাৰ্চিৰ পৰা লগ’টো আঁতৰাই দিছে।
উল্লেখযোগ্য যে এগৰাকী বিশেষজ্ঞ স্পীনাৰ আৰু নিৰ্ভৰযোগ্য মিডল অৰ্ডাৰ বেটছমেন ময়িন আলি চলিত বৰ্ষৰ আইপিএলৰ অন্যতম তাৰকা খেলুৱৈ।
৩৩ বছৰীয়া অলৰাউণ্ডাৰজনে চলিত বৰ্ষৰ ফেব্ৰুৱাৰীত হোৱা আইপিএলৰ নিলামত ৭ কোটি টকাৰ বিনিময়ত চেন্নাই চুপাৰ কিংছৰ স’তে চুক্তিবদ্ধ হৈছে।
২০১৮ চনৰ পৰা তেওঁ আইপিএলত ৰয়েল চেলেণ্ডাৰছ বাংগালোৰৰ হৈ খেলি আহিছে।
বৰ্তমানলৈকে তেওঁ ১৯খন আইপিএল মেচত ৩০৯ ৰাণ কৰাৰ উপৰিও সংগ্ৰহ কৰিছে ১০টা উইকেট।
চলিত বৰ্ষৰ আইপিএলত মহেন্দ্ৰ সিং ধোনী নেতৃত্বাধীন চেন্নাই চুপাৰ কিংছৰ হৈ খেলপথাৰত অৱতীৰ্ণ হোৱাৰ সুযোগ লাভ কৰি তেওঁ যোৱা মাহত আনন্দ প্ৰকাশ কৰিছিল।
