মধ্যাহ্ন ভোজন আৰু শৌচালয় নিৰ্মাণৰ ধন আত্মসাতৰ অভিযোগত এইবাৰ আৰক্ষীয়ে গ্ৰেপ্তাৰ কৰিলে বঙাইগাঁও জিলাৰ বিদ্যালয় এখনৰ প্ৰধান শিক্ষকক ৷
আৰক্ষীয়ে গ্ৰেপ্তাৰ কৰা প্ৰধান শিক্ষকগৰাকী বঙাইগাঁও জিলাৰ উত্তৰ শালমাৰা মহকুমাৰ অন্তৰ্গত সন্তোষপুৰ এম ভি স্কুলৰ প্ৰধান শিক্ষক আজগৰ আলী ( ৫৬ ) ৷
বিদ্যালয়খনৰ ছাত্ৰ-ছাত্ৰীৰ মধ্যাহ্ন ভোজনৰ বাবে অহা ধন আত্মসাৎ কৰাৰ লগতে বিদ্যালয়খনৰ শৌচালয় নিৰ্মাণৰ ধন আত্মসাৎ কৰাৰ অভিযোগত প্ৰধান শিক্ষকগৰাকীক গ্ৰেপ্তাৰ কৰা হৈছে ।
উল্লেখ্য যে প্ৰধান শিক্ষকগৰাকীৰ বিৰুদ্ধে বঙাইগাঁও জিলাৰ অতিৰিক্ত উপায়ুক্ত নৱজ্যোতি ওজাই বঙাইগাঁও জিলাৰ মেৰেৰচৰ আৰক্ষী থানাত কিছুদিন পূৰ্বে এই সন্দৰ্ভত এক গোচৰ ৰুজু কৰিছিল ৷
প্ৰধান শিক্ষকগৰাকীৰ বিৰুদ্ধে ভাৰতীয় দণ্ড বিধি আইনৰ ৪২০/৪০৯ নং ধাৰাৰ অধীনত ৮৯/১২ নম্বৰ গোচৰ ৰুজু কৰা হৈছিল উক্ত থানাত ৷ ইপিনে বঙাইগাঁও জিলাৰ অতিৰিক্ত উপায়ুক্ত নৱজ্যোতি ওজাই এই গোচৰ ৰুজু কৰাৰ পাছৰে পৰা প্ৰধান শিক্ষক আজগৰ আলী পলাতক অৱস্থাত আছিল ৷
অৱশেষত বঙাইগাঁও আৰক্ষীয়ে এক অভিযান চলাই পলাতক প্ৰধান শিক্ষকগৰাকীক নলবাৰী জিলাৰ মুকালমুৱাৰ ১ নং কাপলাবাৰীৰ আবুল বাচেৰৰ গৃহৰ পৰা গ্ৰেপ্তাৰ কৰে ৷
উল্লেখ্য যে প্ৰধান শিক্ষক আজগৰ আলীৰ ঘৰ বঙাইগাঁও জিলাৰ কোকিলাৰ মাজপাৰাত ৷