কৰ’না ভাইৰাছৰ সংক্ৰমণৰ ক্ষিপ্ৰতা বৃদ্ধি পোৱাৰ মাজতে কেন্দ্ৰীয় চৰকাৰে হোম কোৱাৰেন্টাইনৰ নিয়মৰ সালসলনি কৰিছে।
কেন্দ্ৰীয় স্বাস্থ্য মন্ত্ৰ্যালয়ে বৰ্তমান পৰিস্থিতি আৰু আক্ৰান্ত লোকৰ জটিল অৱস্থালৈ লক্ষ্য কৰি নতুন নীতি-নিৰ্দেশনা জাৰি কৰিছে।
এতিয়া কোনো বেমাৰৰ দ্বাৰা আক্ৰান্ত ব্যক্তিৰ যদি কৰ’না ভাইৰাছৰ সংক্ৰমণ ঘটে তেতিয়াহ’লে তেতিয়াহ’লে তেওঁক হোম কোৱাৰেন্টাইনত থাকিবলৈ দিয়া নহয়।
সংশোধিত নীতি-নিৰ্দেশনাত কোৱা হৈছে যে কম প্ৰতিৰোধ ক্ষমতাসম্পন্ন অৰ্থাৎ কম ইম্যুনিটিৰ ৰোগী যেনে এইচআইভি, সংৰোপন কৰা (ট্ৰান্সপ্লেন্ট) ৰোগী, কেন্সাৰৰ চিকিৎসা কৰা ৰোগী ঘৰত একাষৰীয়া হৈ থকাৰ উপযুক্ত নহয়।
আনহাতে, ৬০ বছৰৰ উৰ্ধৰ বাৰ্দ্ধক্যজনিত ৰোগাক্ৰান্ত আৰু উচ্চ ৰক্তচাপ, ডায়েবেটিছ, হৃদৰোগ, হাওঁফাওঁ, যকৃৎ আদিৰ পুৰণি বেমাৰৰ দ্বাৰা আক্ৰান্ত লোকক চিকিৎসকৰ যথোপযুক্ত পৰামৰ্শৰ পাছত ঘৰত পৃথকে থকাৰ অনুমতি দিয়া হ’ব।
তদুপৰি, কেন্দ্ৰীয় স্বাস্থ্য মন্ত্ৰ্যালয়ে কোৱাৰেন্টাইন থকাৰ সময়ো হ্ৰাস কৰিছে।
নতুন নিৰ্দেশনা অনুসৰি, হোম কোৱাৰেন্টাইনত থকা ৰোগীৰ লক্ষণ দেখা দিয়াৰ ১০ দিন পাছত আৰু তিনিদিনলৈ জ্বৰ নহাৰ পাছত কোৱাৰেন্টাইনৰ পৰা মুক্ত বুলি কোৱা হ’ব।
উল্লেখ্য যে বৃহস্পতিবাৰলৈকে দেশত কৰ’না আক্ৰান্তৰ সংখ্যা ছয় লাখ অতিক্ৰম কৰে। ইয়াৰ ভিতৰত ৩৪,৪৫০জন ৰোগীক আই চি য়্যুত ৰাখিবলগীয়া হৈছে।
আনহাতে, ৩৭,৫০৫জন ৰোগীক অক্সিজেনৰ প্ৰয়োজন হোৱাৰ বিপৰীতে ৯,২৭২জন ৰোগীক ভেন্টিলেটৰত ৰখা হয়।
