শিৱসাগৰ জিলাৰ ৰাষ্ট্ৰীয় স্বাস্থ্য মিছনৰ এজন কৰ্মচাৰী প্ৰৱঞ্চনাৰে এগৰাকী যুৱতীক ধৰ্ষণ কৰা ঘটনাত শনিবাৰে গ্ৰেপ্তাৰ হোৱাৰ ঘটনাই ব্যাপক প্ৰতিক্ৰিয়াৰ সৃষ্টি কৰিছে শিৱসাগৰৰ স্বাস্থ্য বিভাগত।
এইবাৰ প্ৰশ্ন উঠিছে যুটীয়া সঞ্চালকৰ চৰকাৰী বাংলোটোক লৈ।
ৰাষ্ট্ৰীয় স্বাস্থ্য মিছনৰ ঠিকা ভিত্তিত কাম কৰা হিল্টন শইকীয়াই ঐতিহাসিক বাংলোটো সুৰা আৰু নাৰীৰ আড্ডাস্থলীলৈ পৰিণত কৰি তুলিছিল।
শিৱসাগৰ জিলা স্বাস্থ্য বিভাগৰ যুটীয়া সঞ্চালকৰ চৰকাৰী বাংলোটো দীৰ্ঘদিন ধৰি সুৰা আৰু নাৰীৰ আড্ডাস্থলীলৈ পৰিণত হোৱাৰ এক অভিযোগ এতিয়া উত্থাপন হৈছে।
এই বাংলোটোকেই ৰাষ্ট্ৰীয় স্বাস্থ্য মিচনৰ প্ৰগ্ৰেম মেনেজাৰ হিল্টন শইকীয়াৰ লগতে অন্য এগৰাকী কৰ্মচাৰীয়ে ব্যৱহাৰ কৰি আহিছে বুলি জানিব পৰা গৈছে।
শিৱসাগৰ বৰপুখুৰী পাৰত অৱস্থিত এই উচ্চপদস্থ বিষয়াৰ চৰকাৰী বাংলোটো কেনেদৰে এজন ৰাষ্ট্ৰীয় স্বাস্থ্য মিছনৰ ঠিকা ভিত্তিত কাম কৰা প্ৰগ্ৰেম মেনেজাৰে লাভ কৰিলে তাক লৈ এতিয়া বিভাগত ব্যাপক প্ৰতিক্ৰিয়াৰ সৃষ্টি হৈছে।
বাংলোটোত পূৰ্বে মদৰ পাৰ্টিৰ লগতে অন্য নাৰী আহি থকাৰ অভিযোগ বিভাগীয় কৰ্মচাৰী এজনে স্বাস্থ্য বিভাগৰ উৰ্দ্ধতন কৰ্তৃপক্ষক জনাইছিল যদিও কৰ্তৃপক্ষই কোনো ধৰণৰ ব্যৱস্থা লোৱা নাছিল বুলি এক সুত্ৰই জানিবলৈ দিয়ে।
এইটো চৰকাৰী বাংলোটেই পত্নী নথকাত হিল্টন শইকীয়াই তেওঁৰ প্ৰেমিকাক আনি ৰাখিছিল বুলি নিজ মুখে স্বীকাৰ কৰে তেওঁৰ প্ৰেমিকা গৰাকীয়েই।
প্ৰেমিকা গৰাকীৰ ভাষ্য মতে হিল্টন শইকীয়াৰ কোঠাত খালী মদৰ বটল ভৰ্তি হৈ আছে।
এতিয়া প্ৰশ্ন হয় যুটীয়া সঞ্চালকৰ চৰকাৰী আৱাসটো কেনেকৈ এজন ঠিকা ভিত্তিত কাম কৰা ব্যক্তিয়ে লাভ কৰিলে?
আনহাতে, কেমেৰা দেখি দৌৰি গাড়ীত উঠা ব্যক্তিজন কেনেদৰে বেমাৰ হৈ দুদিন চিকিৎসালয়ত চিকিৎসাধীন হৈ থাকিব পাৰে?
স্বাস্থ্য বিভাগৰ কৰ্মী হোৱাৰ বাবেই ৰঙা ঘৰৰ পৰিৱৰ্তে চিকিৎসালয়ত থকাৰ সুবিধা পাইছে নেকি, তাক লৈও ৰাইজৰ মাজত প্ৰশ্ন উপজিছে।