আমেৰিকাৰ হাডছন নদীত সংঘটিত হৈছে এক বৃহৎ দুৰ্ঘটনা। তাত ৫ জন যাত্ৰী আৰু ১ জন পাইলটসহ এখন হেলিকপ্টাৰ হাডছন নদীত ভাঙি পৰে। খবৰ অনুসৰি এই ঘটনাত ৬ জন লোকৰ মৃত্যু হৈছে। বাতৰি অনুসৰি নিহতসকলৰ ভিতৰত তিনিটি শিশুও আছে।
আমেৰিকাৰ নিউয়ৰ্কৰ হাডছন নদীত ভয়ংকৰ দুৰ্ঘটনাত এখন হেলিকপ্টাৰ ভাঙি পৰিছে। এলেকাৰ মেয়ৰ এৰিক এডামছে জনায় যে মৃত্যু হোৱা লোকসকলৰ অধিকাংশই স্পেইনৰ নাগৰিক। আহতসকলৰ ভিতৰত দুজনক প্ৰথমে চিকিৎসালয়লৈ লৈ যোৱা হৈছিল যদিও পিছত মৃত্যু হোৱা বুলি কোৱা হৈছে।
বিষয়াসকলে যদিও এতিয়াও দুৰ্ঘটনাত নিহতসকলৰ পৰিচয় প্ৰকাশ কৰা নাই, নিউয়ৰ্ক পোষ্টে প্ৰকাশ কৰা অনুসৰি কপ্টাৰখনত থকাসকলৰ ভিতৰত আছে স্পেইনৰ ছিমেন্সৰ সভাপতি তথা মুখ্য কাৰ্যবাহী বিষয়া অগাষ্টিন এস্কোবাৰ, তেওঁৰ পত্নী আৰু তেওঁলোকৰ তিনিটা সন্তান।
নিউয়ৰ্কৰ মেয়ৰ এৰিক এডামছে তেওঁৰ বিবৃতিত কয় যে এই সময়ত নিহত ছয়জনকে পানীৰ পৰা তুলি অনা হৈছে। আৰু দুখৰ বিষয় যে ছয়জনকে মৃত বুলি ঘোষণা কৰা হৈছে।’
আমেৰিকাৰ ৰাষ্ট্ৰপতি ড’নাল্ড ট্ৰাম্পে এই ঘটনাক লৈ শোক প্ৰকাশ কৰে। তেওঁ কয়, “হাডচন নদীত ভয়ংকৰ হেলিকপ্টাৰ দুৰ্ঘটনা। দেখি ধাৰণা হৈছে পাইলট, দুজন প্ৰাপ্তবয়স্ক আৰু তিনিটা শিশুকে ধৰি ছয়জন মানুহ আৰু আমাৰ মাজত নাই। দুৰ্ঘটনাটোৰ ফুটেজটো ভয়ংকৰ।”
নিজৰ ছ’চিয়েল মিডিয়া প্লেটফৰ্ম দ্য ট্ৰুথত ট্ৰাম্পে লিখিছে, “ভগৱানে নিহতসকলৰ পৰিয়াল আৰু আত্মীয়ক আশীৰ্বাদ কৰক। পৰিবহণ সচিব শ্বেন ডাফী আৰু তেওঁৰ দক্ষ কৰ্মচাৰীসকল জাহাজখনত আছে। ঠিক কি ঘটিছিল আৰু কেনেকৈ ঘটিল সেই বিষয়ে অতি সোনকালে ঘোষণা কৰা হ’ব।”
নিউয়ৰ্ক আৰক্ষী আয়ুক্ত জেচিকা টিচৰ মতে, নিউয়ৰ্ক হেলিকপ্টাৰ ট্যুৰছৰ দ্বাৰা পৰিচালিত বেল ২০৬ হেলিকপ্টাৰখনে চহৰৰ হেলিপেডৰ পৰা বিয়লি প্ৰায় ৩ বজাত হাডছন নদীৰ ওপৰেৰে উত্তৰ দিশলৈ উৰি গৈছিল।
প্ৰত্যক্ষদৰ্শীয়ে জনায় যে তেওঁলোকে হেলিকপ্টাৰখন দ্ৰুতগতিত যোৱা দেখিছিল। আৰু এটা ডাঙৰ শব্দ কৰি পানীত পৰি গৈছিল। পৰি যোৱাৰ পিছতো হেলিকপ্টাৰখনৰ পিছফালৰ অংশটো কিছু সময় নদীৰ ওপৰত উপঙি আছিল। বহুতে কয় যে হেলিকপ্টাৰখন আকাশৰ মাজতে ভাঙি যায় আৰু পিছত হাডছন নদীত পৰি যায়।
