ব্যৱসায়ী পৰিয়ালক হত্যাৰ ভাবুকি! সাংসদ কিৰণ খেৰৰ বিৰুদ্ধে বিস্ফোৰক অভিযোগ
বিজেপিৰ সাংসদ তথা অভিনেত্ৰী কিৰণ খেৰৰ বিৰুদ্ধে এক চাঞ্চল্যকৰ অভিযোগ উত্থাপন কৰিছে এজন ব্যৱসায়ীয়ে। ব্যৱসায়ীজনৰ দাবী, কিৰণ খেৰে তেওঁক আৰু তেওঁৰ পৰিয়ালক হত্যাৰ ভাবুকি দিছে!
এনে পৰিস্থিতিত পঞ্জাৱ আৰু হাৰিয়ানা উচ্চ ন্যায়ালয়ে চণ্ডীগড় আৰক্ষীক পৰৱৰ্তী ১ সপ্তাহৰ বাবে ব্যৱসায়ীজনক নিৰাপত্তা প্ৰদান কৰিবলৈ নিৰ্দেশ দিয়ে।
জানিব পৰা মতে, চণ্ডীগড়ৰ সাংসদগৰাকীয়ে চৈতন্য আগৰৱালা নামৰ ব্যৱসায়ীজনৰ লগতে তেওঁৰ পত্নী ৰুচিকা আগৰৱালা আৰু দুগৰাকী নাবালিকা কন্যাক হত্যাৰ ভাবুকি দিছে। কিন্তু এই ভাবুকি কিয়?
এই সন্দৰ্ভত চৈতন্যই উল্লেখ কৰা মতে, তেওঁ এগৰাকী বিজেপি কৰ্মীৰ জৰিয়তে কিৰণ খেৰৰ সহযোগী সহদেৱ সোলাৰিয়াৰ সৈতে যোগাযোগ কৰিছিল। সোলাৰিয়াৰ জৰিয়তে বিনিয়োগৰ বাবে কিৰণ খেৰে ৮ কোটি টকা দিয়ে।
ইয়াৰে ২ কোটি টকা চৈতন্যই ঘূৰাই দিয়ে কিৰণ খেৰক। আনহাতে শ্বেয়াৰ বজাৰত সমস্যাৰ বাবে চৈতন্যই কিছু সময় বিচাৰে বাকী থকা ধনখিনি লাভৰ সৈতে ঘূৰাই দিবলৈ। ইয়াৰ পিছত খেৰে তেওঁক ভাবুকি দিয়াৰ অভিযোগ তোলে চৈতন্যই।
এনে পৰিস্থিতিত আদালতে চৈতন্য আৰু তেওঁৰ পৰিয়ালক নিৰাপত্তাৰ ব্যৱস্থা কৰিবলৈ আৰক্ষীক নিৰ্দেশ দিয়ে। উচ্চ ন্যায়ালয়ে কয় যে যদি আদালতে তেওঁলোকক সুৰক্ষা প্ৰদান নকৰে তেন্তে সেয়া সাংবিধানিক অধিকাৰ বলবৎ নকৰাৰ সম পৰ্যায়ৰ হ’ব।
অৱশ্যে ইয়াৰ পিছত যদি আবেদনকাৰীক নিৰাপত্তাৰ প্ৰয়োজন নহয় তেন্তে এসপ্তাহৰ পিছত তেওঁক নিৰাপত্তা দিয়া নহ’ব বুলিও আদালতে কয়। ইফালে এই সন্দৰ্ভত এতিয়ালৈকে কিৰণ খেৰৰ কোনো প্ৰতিক্ৰিয়া প্ৰকাশ পোৱা নাই।