এটা নৰভক্ষী বাঘৰ আতংকত ভীতিগ্ৰস্ত হৈ পৰিছে ৰাইজ। ৰাইজৰ মাজত বাঢ়ি অহা এনে আতংকৰ বাবে বাঘটোক গুলীয়াই হত্যা কৰিবলৈ নিৰ্দেশনা জাৰি কৰিছে ৰাজ্য চৰকাৰে। এই ঘটনা দক্ষিণৰ ৰাজ্য কেৰালাৰ।
কিছুদিন পূৰ্বে ৱায়ানাডত এজন লোকক হত্যা কৰিছিল এই বাঘটোৱে। বন বিভাগৰ তথ্যকোষত তালিকাভুক্ত বাঘটোক ১৩ বছৰীয়া মতা বাঘ (WWL 45) বুলি চিনাক্ত কৰা হৈছে।
এই কথা সদৰী কৰিছে কেৰেলাৰ বনমন্ত্ৰী এ কে ছছিন্দ্ৰনে। তেওঁ লগতে নৰভোজী হিচাপে শ্ৰেণীভুক্ত কৰা এই বাঘটোক গুলীয়াই হত্যা কৰাৰ বাবে পদক্ষেপ গ্ৰহণ কৰা হৈছে বুলি অৱগত কৰে।
প্ৰকাশিত খবৰ অনুসৰি, যোৱা ৯ ডিচেম্বৰত ৱাকেৰীৰ এগৰাকী বাসিন্দাৰ আধা খোৱা মৃতদেহ ৱায়ানাদৰ কলপেটাৰ বনাঞ্চলৰ সমীপত উদ্ধাৰ হৈছিল। ঘাঁহ কাটি থকা অৱস্থাত বাঘে তেওঁ হত্যা কৰাৰ সন্দেহ কৰা হৈছিল।
স্থানীয় বাসিন্দাই ইয়াৰ পপাছতেকৰ্তৃপক্ষৰ ওচৰত নৰভোজী বাঘটোক বন্দুকৰে হত্যা কৰাৰ দাবী উত্থাপন কৰে।ইয়াৰ পিছতে বন বিভাগে বাঘটোক গুলীয়াই হত্যা কৰাৰ নিৰ্দেশ জাৰি কৰিছে।
এই অভিযানৰ বাবে ২৫টা কেমেৰা আৰু দুটা পিঞ্জৰা সাজু কৰি বাঘটোৰ ওপৰত তীব্ৰ নজৰ ৰখা হৈছে। মন্ত্ৰীগৰাকীয়ে লগতে অঞ্চলটোত গুলীচালনাকাৰী আৰু চিকিৎসকৰ লগতে পাঁচটা টহলদাৰী দল আছে বুলি উল্লেখ কৰে।
বন বিভাগে গ্ৰহণ কৰা ব্যৱস্থাসমূহত জনসাধাৰণক সহযোগিতা আগবঢ়াবলৈ আহ্বান জনায় মন্ত্ৰীগৰাকীয়ে।
লক্ষণীয়ভাৱে বাঘটোক ধৰিব নোৱাৰিলে হত্যা কৰাৰ বাবে জাৰি কৰা চৰকাৰী আদেশক প্ৰত্যাহ্বান জনাই কেৰালা উচ্চ ন্যায়ালয়ত এক আবেদন দাখিল কৰা হৈছিল। কিন্তু আদালতে খাৰিজ কৰিছিল এই আবেদন।
