প্ৰচণ্ড মানসিক চাপ সৃষ্টিৰে ব্যৰ্থ কৰাৰ গুৰুতৰ অভিযোগ আনিলে হিমাই (ভিডিঅ’ আছে)

জাকাৰ্টাত অনুষ্ঠিত হৈ থকা এছিয়ান গেইমছত মহিলাৰ ৪০০ মিটাৰৰ ৰূপৰ পদক জিনা অসমৰ হিমা দাস আজি আনিছে এটা গুৰুতৰ অভিযোগ। আজি আবেলি অনুষ্ঠিত মহিলাৰ ২০০ মিটাৰৰ ছেমিত ভুল আৰম্ভণিৰে অযোগ্য ঘোষিত হোৱা উদীয়মান তথা প্ৰতিভাশালী দৌৰৰাণী গৰাকীয়ে কয় যে ব্যক্তি বিশেষে তেওঁৰ ওপৰত মানসিক চাপ দি তেওঁক সেই ভুল কৰিবলৈ বাধ্য কৰিলে।

তেওঁ স্পষ্টকৈ কয় যে অসমৰে অসমীয়া দুজন মান লোকে তেওঁৰ ওপৰত চাপ সৃষ্টি কৰিছিল। “বিভিন্ন ধৰণৰ প্ৰেছাৰ পৰিছে মাথাত। কেনেকুৱা প্ৰেছাৰ পৰিছে পিছত গম পাব। ছাৰসকলে ক’বগৈ, মই ছাৰসকলক কৈছো। তেনেকুৱা যাতে আন খেলুৱৈৰ ক্ষেত্ৰত নহয়, তাৰ বাবে আপোনালোকক অনুৰোধ কৰিছো। কিছুমান ধৰণৰ বক্তব্যই আমাক ক্ষতি কৰে। তেনেকুৱা বক্তব্য যাতে আপোনালোকে নকৰে। যিমানেই এৰাই চলিবলৈ বিচাৰিলেও সেয়া মাথালে আহেই। বহুত নতুন খেলুৱৈ আহি আছে। আপোনালোকে তেনেকুৱা যাতে নকৰে তাৰ বাবে মই হাতযোৰ কৰিছো।” এইদৰে কৈ হিমাই আজি দুখ প্ৰকাশ কৰে।

তেওঁ আকৌ কয়, “মই দুজনমান ব্যক্তিক কৈছো। সেই দুজনে কন্ট্ৰভাৰ্ছি কৰি আছে। মই বাৰে বাৰে কৈছো তেনেকুৱা নকৰিব। আমি আঘাত পাওঁ। মই অপেনলি কৈছো, ২০০ মিটাৰটো বেয়া হোৱাৰ কাৰণটো সেইটোৱে। মই টেনশ্যন লৈ আছিলো। টেনশ্যন নলওঁ বুলিলেও নিজে নিজে আহে। গতিকে তেনেকুৱা নকৰিবলৈ মই অনুৰোধ কৰিছো।”

উল্লেখযোগ্য যে ৰাতিপুৱা অনুষ্ঠিত ২০০ মিটাৰৰ প্ৰাৰম্ভিক পৰ্যায়ৰ (হীটছ) দৌৰত ২৩.৪৭ ছেকেণ্ড সময় লৈ হিমাই ছেমিত প্ৰৱেশ কৰিছিল। ছেমিত তেওঁ অধিক উজ্জীৱিত প্ৰদৰ্শন আশা কৰিছিল। কিন্তু আধা ছেকেণ্ড আগতেই দৌৰ আৰম্ভ কৰা বাবে তেওঁক খেল পৰিচালকে অযোগ্য ঘোষণা কৰে।

হিমাৰ এই ব্যৰ্থতাৰ বাবে ৰাজ্যৰ ক্ৰীড়াপ্ৰেমী আৰু সচেতন ৰাইজে সংবাদ মাধ্যমৰ ওপৰতো দোষ দিয়া দেখা যায়। হিমাৰ প্ৰদৰ্শনক লৈ সংবাদ মাধ্যমে এক প্ৰকাৰৰ সংযমহীন প্ৰত্যাশা দাঙি ধৰিছিল। বহুতে অভিযোগ কৰে যে শিৱ থাপাক ধ্বংস কৰাৰ দৰেই প্ৰচাৰ মাধ্যমৰ বলিয়ালিয়ে হিমাকো ধ্বংস কৰিব পাৰে, যদিহে আমি এতিয়াও সচেতন নহওঁ।