২০১৮ বৰ্ষৰ এছিয়ান গেইমছৰ ৪x৪০০ মিটাৰ ৰীলে দৌৰৰ ৰূপৰ পদক সোণৰ পদকলৈ উন্নীত হোৱাৰ পাছত ভাৰতৰ তাৰকা দৌৰবিদ অসম কন্যা হিমা দাসে সেই পদক কোভিড যোদ্ধা সকলৰ নামত উৎসৰ্গা কৰিছে।
নিজৰ ফেইচবুক পেইজ আৰু টুইটাৰৰ মাধ্যমেৰে হিমাই আনুষ্ঠানিকভাৱে সেইকথা ঘোষণা কৰে।
‘‘২০১৮ বৰ্ষৰ এছিয়ান গেইমছৰ ৪x৪০০ মিটাৰ ৰীলে দৌৰৰ ৰূপৰ পৰা সোণৰ পদকলৈ উন্নীত হোৱা পদক মই আৰক্ষী, চিকিৎসককে ধৰি সকলো ক’ৰ’না যোদ্ধাৰ নামত উৎসৰ্গিত কৰিছো। কোভিড-১৯ৰ সংকটৰ সময়ত আমাৰ স্বাস্থ্য আৰু সুৰক্ষাৰ বাবে এইসকল যোদ্ধাই সৰ্বোচ্চ ত্যাগ কৰি কাম কৰি আছে। সকলোলৈ কৃতজ্ঞতা,’’ হিমাই ফেইচবুকত এইদৰে লিখে।
উল্লেখযোগ্য যে, ২০১৮ এছিয়ান গেইমছত ভাৰতীয় ৪x৪০০ মিটাৰ মিক্সড ৰীলে দলে পোৱা ৰূপৰ পদক স্বৰ্ণলৈ উন্নীত হৈছিল ৪x৪০০ মিটাৰ মিক্সড ৰীলেৰ ফাইনেলত প্রথম স্থানত থকা বাহৰেইনৰ কেমী এডেকুৱাই ডপ পৰীক্ষাত ব্যর্থ হোৱাৰ পাছত এথলেটিকছ ইনটিগ্রিটি য়ুনিটে (এ আই ইউ) খেলুৱৈগৰাকীক ৪ বছৰলৈ নিষিদ্ধ ঘোষিত কৰে।
মহম্মদ আনাছ, এম আৰ পোভাম্মা, হিমা দাস আৰু আৰোকিয়া ৰাজীৱৰে গঠিত ভাৰতীয় দলটোৱে ৩ঃ১৫ঃ৭১ ছেকেণ্ড সময়মানেৰে বাহৰেইনৰ (৩ঃ১১ঃ৮৯) পাছত থাকি ৰূপৰ পদক পাইছিল।
পূর্বৰ বিজয়ী বাহৰেইনৰ এগৰাকী দৌৰবিদ ড’পিঙৰ বাবে নিষেধাজ্ঞাৰ সন্মুখীন হোৱাত দ্বিতীয় স্থানত থকা ভাৰতে চেম্পিয়নৰ সন্মান লাভ কৰে।