কোৱা হয়, ৰাজনীতি সম্পদ আহৰণৰ সুগম পথ। ৰাজনীতিৰ প্ৰকৃত অৰ্থ বা উদ্দেশ্য এয়া নহ’লেও ভাৰতীয় ৰাজনীতিত পিছে এই কথাষাৰেই প্ৰায় সময়ত পতীয়মান হয়। পিছে এই পৰিৱেশৰ মাজতে নিজৰ দায়িত্ব পালনেৰে চৰ্চাত আহিছে এগৰাকী মুখ্যমন্ত্ৰী।
কিছুদিন পূৰ্বে বান আৰু ভূমিস্খলনত বিধ্বস্ত হৈ পৰিছিল পাহাৰীয়া ৰাজ্য হিমাচল প্ৰদেশ। প্ৰকৃতিৰ তাণ্ডৱত প্ৰাণ হেৰুৱাইছিল বহু লোকে, হৈছিল বিস্তৰ ক্ষতিসাধন। দুৰ্যোগে ধুই যোৱা ৰাজ্যখনৰ জনসাধাৰণৰ কাষত থিয় দিছে মুখ্যমন্ত্রী সুখবিন্দৰ সিং সুখু।
নিজৰ সঞ্চিত প্রায় ৫১ লাখ টকা ‘আপদা ৰাহত কোষ’লৈ দান কৰি পাহাৰীয়া ৰাজ্যখনৰ দুৰ্যোগপীড়িত জনসাধাৰণৰ সহায়ৰ বাবে আগবঢ়াইছে মুখ্যমন্ত্ৰীগৰাকীয়ে। তেওঁ লগতে ৰাজ্যিক সাহায্য পুঁজিলৈ নিজৰ এবছৰৰ দৰমহাৰ ১১ লাখ টকা বৰঙণি আগবঢ়ায়।
ৰাজ্যবাসীৰ প্ৰতি কৰ্তব্যৰ ইংগিত প্ৰদৰ্শন কৰি মুখ্যমন্ত্ৰী আৰু তেওঁৰ পত্নী কমলেশ ঠাকুৰে শুকুৰবাৰে ছিমলাস্থিত তেওঁলোকৰ চৰকাৰী বাসগৃহত ৰাজ্যৰ মুখ্য সচিব প্ৰবোধ ছাক্সেনাক ৫১ লাখ টকাৰ চেক প্ৰদান কৰে।
সংবাদ মাধ্যমৰ আগত সুখুৱে কয় যে ৰাজ্যখনত শেহতীয়াকৈ দুৰ্যোগৰ সময়ত জনসাধাৰণৰ যন্ত্ৰণা আৰু দুৰ্দশা তেওঁ ভালদৰে উপলব্ধি কৰিব পাৰিছিল। প্ৰকৃতিৰ এই প্ৰলয়ংকাৰী ৰূপৰ ফলত হিমাচলত ২৬০ জনতকৈ অধিক লোকে প্ৰাণ হেৰুৱাইছিল।
মুখ্যমন্ত্রীগৰাকীয়ে লগতে কয় যে ৰাজ্যখনে শেহতীয়া সময়ত আটাইতকৈ কঠিন আৰু শোকাৱহ পৰিস্থিতিৰ সন্মুখীন হৈছে। হিমাচলৰ জনসাধাৰণে একেলগে এই বিপৰ্যয়ৰ সন্মুখীন হৈছে আৰু চৰকাৰো জনসাধাৰণৰ বাবে কাম কৰিবলৈ দায়বদ্ধ বুলি তেওঁ লগতে কয়।
উল্লেখ্য যে, ক’ভিডৰ বিপৰ্যয়ৰ সময়তো সুখবিন্দৰ সিং সুখুৱে নিজৰ ফিক্সড ডিপ’জিটৰ জৰিয়তে ৰাজ্যখনলৈ বৰঙণি আগবঢ়াইছিল। ইয়াৰ বাহিৰেও সময়ে সময়ে ৰাজ্যৰ বাবে দাতব্য কামত জড়িত হৈ আহিছে কংগ্ৰেছ নেতাগৰাকী।
