ভাৰত আৰু পাকিস্তানৰ মাজত শত্ৰুতা সমাপ্ত কৰি শান্তি পুনৰ প্ৰতিষ্ঠা কৰাৰ ইচ্ছাক ‘ৰাজদ্ৰোহ’ বুলি গণ্য কৰিব নোৱাৰি— এক গোচৰৰ শুনানি গ্ৰহণ কৰি হিমাচল প্ৰদেশ উচ্চ ন্যায়ালয়ে এই তাৎপৰ্যপূৰ্ণ মন্তব্য কৰে। পাকিস্তানৰ পতাকা আৰু অস্ত্ৰ-শস্ত্ৰৰ ছবি তথা ভিডিঅ’ অনলাইনত প’ষ্ট কৰাৰ অভিযোগত অভিযুক্ত এজন ব্যক্তিক জামিন প্ৰদান কৰি আদালতে এই ৰায় দিয়ে।
‘ইণ্ডিয়ান এক্সপ্ৰেছ’ৰ প্ৰতিবেদন অনুসৰি, অভিষেক সিং ভৰদ্বাজ নামৰ এজন ব্যক্তিৰ বিৰুদ্ধে ফেচবুকত নিষিদ্ধ অস্ত্ৰ আৰু পাকিস্তানৰ পতাকাৰ ছবি তথা ভিডিঅ’ আপলোড কৰাৰ অভিযোগ উত্থাপন হৈছিল। লগতে তেওঁ নিয়াজ খান নামৰ এজন ব্যক্তিৰ সৈতে কৰা কথা-বতৰাও সামাজিক মাধ্যমত শ্বেয়াৰ কৰিছিল। অভিযোগ অনুসৰি, সেই বাৰ্তালাপত অভিযুক্তজনে ‘অপাৰেচন সিন্দূৰ’ক ভুল আখ্যা দিছিল আৰু খালিস্তানৰ সমৰ্থনত মন্তব্য কৰিছিল।
উচ্চ ন্যায়ালয়ৰ ন্যায়াধীশ ৰাকেশ কাইন্থলাই অভিযুক্তৰ জামিন আৱেদনৰ শুনানি গ্ৰহণ কৰি কয় যে অভিযুক্তজনে এজন ব্যক্তিৰ সৈতে কৰা কথা-বতৰাত ভাৰত-পাক উত্তেজনাৰ সমালোচনা কৰিছিল। তেওঁ ধৰ্ম নিৰ্বিশেষে সকলো মানুহ একেলগে থকা উচিত বুলি মন্তব্য কৰিছিল, কাৰণ যুদ্ধৰ কোনো সাৰ্থক উদ্দেশ্য নাথাকে। বিচাৰপীঠে লগতে কয়, “শত্ৰুতা শেষ কৰাৰ আৰু শান্তি উভতি অহাৰ ইচ্ছাক কেনেকৈ ৰাজদ্ৰোহ বুলি গণ্য কৰিব পাৰি, সেয়া বুজি পোৱা টান।”
উচ্চ ন্যায়ালয়ে এইটোও উল্লেখ কৰে যে এজাহাৰত (FIR) চৰকাৰৰ বিৰুদ্ধে ‘ঘৃণা বা অসন্তুষ্টি’ বিয়পোৱাৰ কোনো স্পষ্ট অভিযোগ নাই আৰু অভিযুক্তৰ পৰা কোনো ধৰণৰ নিষিদ্ধ অস্ত্ৰও উদ্ধাৰ হোৱা নাই। আদালতে অভিযুক্তৰ মোবাইলৰ তথ্য (Data), পেন ড্ৰাইভত থকা ভিডিঅ’ আৰু বাৰ্তালাপৰ তথ্য (Chat History) সূক্ষ্মভাৱে পৰীক্ষা কৰে।
ন্যায়াধীশ কাইন্থলাই কয় যে কেৱল নিষিদ্ধ অস্ত্ৰৰ ছবি প’ষ্ট কৰাটোৱেই ৰাজদ্ৰোহ হ’ব নোৱাৰে, বিশেষকৈ যেতিয়া অভিযুক্তৰ ওচৰত কোনো প্ৰকৃত অস্ত্ৰ পোৱা যোৱা নাই। ‘খালিস্তান জিন্দাবাদ’ শ্লোগানৰ প্ৰসংগত আদালতে কয় যে অভিযুক্তৰ মোবাইলত তেনে কোনো শ্লোগান পোৱা হোৱা নাই। আনকি তেনে শ্লোগান দিলেও, উচ্চতম ন্যায়ালয়ৰ নিৰ্দেশ অনুসৰি কেৱল শ্লোগান দিয়াটোৱেই নিজে নিজে অপৰাধ নহয়।
আবেদনকাৰীৰ পক্ষে যুক্তি আগবঢ়াই অধিবক্তা সঞ্জীৱ কুমাৰ সুৰীয়ে কয় যে আৰক্ষীয়ে ইতিমধ্যে অভিযোগনামা (Charge sheet) দাখিল কৰিছে; গতিকে অভিযুক্তক অধিককাল জিম্মাত ৰখাৰ কোনো প্ৰয়োজনীয়তা নাই। আনহাতে, ৰাজ্য চৰকাৰৰ হৈ ডেপুটী এডভোকেট জেনেৰেল প্ৰশান্ত সেনে জামিন আৱেদনৰ তীব্ৰ বিৰোধিতা কৰে।
অৱশেষত আদালতে কেইবাটাও কঠোৰ চৰ্তত ভৰদ্বাজক জামিন প্ৰদান কৰে। সেই চৰ্তসমূহ হ’ল— অভিযুক্তই সাক্ষীসকলক কোনো ধৰণৰ প্ৰভাৱিত কৰিব নোৱাৰিব, আদালতৰ প্ৰতিটো শুনানিতে উপস্থিত থাকিব লাগিব আৰু আগতীয়া জাননী নিদিয়াকৈ সাত দিনতকৈ অধিক সময়ৰ বাবে নিজৰ বাসস্থানৰ ঠিকনা সলনি কৰিব নোৱাৰিব। ইয়াৰ উপৰি, তেওঁ নিজৰ পাছপ’ৰ্ট (যদি আছে), মোবাইল নম্বৰ আৰু সামাজিক মাধ্যমৰ সবিশেষ তথ্য আৰক্ষী তথা আদালতক জমা দিব লাগিব। ন্যায়াধীশ কাইন্থলাই স্পষ্ট কৰি দিয়ে যে এই চৰ্তসমূহৰ সামান্যতম উলংঘা হ’লেও চৰকাৰী পক্ষই জামিন বাতিলৰ বাবে আৱেদন কৰিব পাৰিব।
