মন্ত্ৰী হিমন্তই দিলে নিজৰ ৰাজনৈতিক ভৱিষ্যতৰ দুটা বিকল্প

কংগ্ৰেছ আৰু বিজেপি দুয়োখন চৰকাৰৰ দিনতে ৰাজ্যৰ ৰাজনীতিত প্ৰভাৱী ভূমিকা ৰখা মন্ত্ৰী হিমন্ত বিশ্বয়ে ৰাজ্যৰ ৰাজনীতিৰ প্ৰেক্ষাপটতৰ পৰা ৰাষ্ট্ৰীয় প্ৰেক্ষাপটলৈ যোৱাৰ ইচ্ছা কৰিছে। এই কথা আজি সংবাদ মাধ্যমৰ আগত খোলাখুলিকৈ ক’লে মন্ত্ৰীজনে নিজেই।

আজি লখিমপুৰৰ বিহপুৰীয়াত ডিক্ৰং নদীৰ ওপৰত এখন দলঙৰ আধাৰশিলা স্থাপন কৰিবলৈ যায় মন্ত্ৰীজন। তাতে সংবাদ মাধ্যমৰ আগত নিজৰ ৰাষ্ট্ৰীয় ৰাজনীতি গমনৰ ইচ্ছা প্ৰকাশ কৰে।

বিজেপিৰ মন্ত্ৰীজনে কয় তেওঁ ইতিমধ্যে দলক জনাই দিছে যে তেওঁ ২০২১-অত বিধানসভাৰ নিৰ্বাচনত অৱতীৰ্ণ নহয়।

“ৰাজ্যৰ ৰাজনীতিৰ পৰা মই লাহে লাহে আঁতৰিব খুজিছো। ’২১-অত মই ৰাজ্যৰ ৰাজনীতি এৰিম বুলি কৈছো। ৰাজ্যৰ ৰাজনীতিত জড়িত থকাৰ ইচ্ছা নাই।” সংবাদ মাধ্যমক নিজৰ ৰাষ্ট্ৰীয় ৰাজনীতি গমনৰ ইংগিত দি হিমন্তই কয়।

বৰ্তমান জালুকবাৰী সমষ্টিক বিধানসভাত প্ৰতিনিধিত্ব কৰি থকা মন্ত্ৰীজনে তাৎপৰ্য্যপূৰ্ণভাৱে লগতে এইবুলি কয় যে কিবা বিশেষ কথা হ’লেহে থাকিব ৰাজ্যৰ ৰাজনীতিত।

“লগতে কৈছো যে, কিবা বিশেষ কথা হ’লে বেলেগ কথা। কিন্তু সাধাৰণ অৰ্থত ‘২১ চনত বিধানসভাত নেখেলো। দলক জনাইছো”, গুৰুত্বপূৰ্ণ ইংগিত মন্ত্ৰীজনৰ। হিমন্তৰ এই মন্তব্যৰ পিছত ‘এই কথাৰ দ্বাৰা মুখ্য মন্ত্ৰীৰ পদটোৰ কথাকে ইংগিত কৰিলে নেকি উচ্চাকাংক্ষী মন্ত্ৰীজনে’ বুলি প্ৰশ্ন ৰাজনৈতিক বিশ্লষকৰ। কাৰণ বিশেষ কথা ৰাজ্যৰ ৰাজনীতিত আন কি হ’ব পাৰে?

আনহাতে কোন সমষ্টিৰ পৰা ৰাষ্ট্ৰীয় ৰাজনীতিৰ যাত্ৰাৰ চেষ্টা কৰিব সেয়া স্পষ্টকৈ নক’লে মন্ত্ৰী হিমন্ত্ৰ বিশ্বই।

তেজপুৰৰ পৰাও উঠিব পাৰে বুলি এটা জনৰৱ ওলোৱাৰ কথা সাংবাদিকে মনত পেলাই দিয়াত মন্ত্ৰীজনে কয়, “তেনেকুৱা একো নাই। দলে সিদ্ধান্ত ল’ব। ১৪টা সমষ্টিৰ ক’ৰবাত খেলিলেই হয়”। ইয়াৰ জৰিয়তে মন্ত্ৰীজনে তেওঁ যে যিকোনো এটা সমষ্টিতে নিৰ্বাচন খেলি জিকিব পাৰে তাৰে ইংগিত দিয়ে।

“ৰাজ্যৰ ৰাজনীতিৰ পৰা ২১-অৰ পিছত আঁতৰিম বুলি কৈছো। তাৰ পৰিপ্ৰেক্ষিতত দলে য’তে দিয়ে দিব। ২১ত যিহেতু নেখেলো, দুটাই বিকল্প আছে- হয় ১৯ লোকসভা খেলিব লাগিব, নহয় ২৫ লৈকে ৰেষ্ট ল’ব লাগিব,” ৰাজ্যৰ ৰাজনীতিৰ প্ৰতি বিতুষ্টি প্ৰকাশ কৰি হিমন্তই কয়।

উল্লেখ কৰিব পাৰি যে মন্ত্ৰীজনে তেওঁৰ আকাংক্ষিত মুখ্য মন্ত্ৰীৰ পদটোৰ বাবে দীৰ্ঘ সময় চেষ্টা আৰু কৌশল অব্যাহত ৰাখিও এক প্ৰকাৰৰ ব্যৰ্থ হয়। কংগ্ৰেছ চৰকাৰৰ দিনত তৰুণ গগৈক পদটোৰ পৰা আঁতৰোৱাত ব্যৰ্থ হোৱা হিমন্তই যোৱা বিধানসভা নিৰ্বাচনৰ আগে আগে বিজেপিত যোগদান কৰিলে যদিও সেই উচ্চাকাংক্ষাৰ আগত থিয় দিলে মুখ্য মন্ত্ৰী সোণোৱাল। আজিৰ মন্ত্ৰীজনৰ বক্তব্যত এই লক্ষ্য খেদি ভাগৰি পৰা আৰু বিৰক্ত হোৱা, দুয়োটাৰে ইংগিত পোৱা গ’ল।

ইপিনে মন্ত্ৰীজনে সমাগত লোকসভাত বিজেপিৰ মূল নিৰ্বাচনী ইচ্ছ্যু দুটা হ’ব বুলি জানিবলৈ দিয়ে। “বিকাশ আৰু জাতি-মাটি-ভেটিৰ লগতে অস্তিত্ব”, এইদৰে কয় মন্ত্ৰী হিমন্তই।

২৬ ফেব্ৰুৱাৰিত অসমলৈ ৰাহুল গান্ধী আহিব বুলি সাংবাদিকে উনুকিয়াই দিয়াত তেওঁ কয়, ৰাহুল গান্ধী অসমলৈ আহিলে বিজেপিৰ ভোট বাঢ়িব। কাৰণ মোদী আৰু ৰাহুল গান্ধীৰ মাজত মানুহে তুলনা কৰি চাব।

তেওঁ বিজেপিয়ে উত্তৰ-পূবত ১৯খন আসন পাব বুলি দাবী কৰে। “মানুহে ঢেৰ কৈ থাকিলেও শেষ ৰিজাল্টাই মেইন কথা। উত্তৰ-পূবত ২৫খন আসন আছে তাৰ ভিতৰত ১৯-২১খন আসন বিজেপিয়ে পাব।” মন্ত্ৰীজনে দৃঢ়তাৰে কয়।