বিগত পাঁচটা বছৰত বিজেপিয়ে অসমবাসীক দিয়া নিৰ্বাচনী প্ৰতিশ্ৰুতিসমূহৰ গৰিষ্ঠসংখ্যক প্ৰতিশ্ৰুতিয়েই পূৰণ কৰা নাই।
বিশেষকৈ বান-গৰাখহনীয়াৰ সমস্যা, বিদেশীৰ সমস্যাকে ধৰি আন বহু গুৰুতৰ সমস্যা সমধানৰ ক্ষেত্ৰত ৰাজ্যত বিজেপি শাসিত চৰকাৰ খন পূৰা মাত্ৰাই ব্যৰ্থ হৈছে।
২০১৬ চনৰ বিধানসভা নিৰ্বাচনৰ সময়ত হিমন্ত বিশ্ব শৰ্মাই ভোট লাভৰ অস্ত্ৰ হিচাবে বাচি লৈছিল ৰাজ্যৰ নিবনুৱা যুৱক-যুৱতীসকলকপ্ৰায় প্ৰতিখন নিৰ্বাচনী প্ৰচাৰ সভাতে সেয়ে হিমন্ত বিশ্ব শৰ্মাই বিজেপি চৰকাৰ গঠন হ’লেই ২৬ লাখ নিবনুৱাক কৰ্ম সংস্থাপন দিব বুলি ঘোষণা কৰিছিল।
কিন্তু পাঁচটাকৈ বছৰ বাগৰি যোৱাৰ পিছতো বিজেপিৰ চৰকাৰে ২৬ লাখতো বাদেই এক লাখ নিবনুৱাকো চাকৰি-বাকৰি অথবা কৰ্ম সংস্থাপনৰ আন কোনো দিহা কৰি দিবলৈ সক্ষম হ’ল নে নাই সেয়াও সন্দেহৰ বিষয়। বিজেপিয়ে ক’তো উল্লেখ কৰা নাই কিমান লাখ নিৱনুৱাক সংস্থাপিত কৰিলে তাৰ স্পষ্ট তথ্য।
অসমত বছৰ বাগৰাৰ লগে লগে শিক্ষিত নিবনুৱাৰ সংখ্যাও লক্ষ্যণীয় ভাবে বৃদ্ধি পাইছে।অসম বিধানসভাতে বিজেপি দলৰ পৰাই নিৰ্বাচিত মন্ত্ৰী চন্দ্ৰ মোহন পাটোৱাৰীয়ে দিয়া তথ্য অনুসৰিয়েই ২০১৬ চনৰ পৰা ২০১৯ চনৰ জুন মাহৰ ভিতৰত অসমত বৃদ্ধি পোৱা নিবনুৱাৰ সংখ্যা হৈছে ৭৩,০০৭ গৰাকী।
মন্ত্ৰী গৰাকীয়ে দিয়া তথ্য অনুসৰি ২০১৯ চনৰ জুন মাহ পৰ্যন্ত অসমত পঞ্জীয়নভূক্ত নিবনুৱাৰ সংখ্যা হৈছিল ১৭,১৫,৭৫৯ গৰাকী।আজিৰ তাৰিখত সেই সংখ্যা আৰু বৃদ্ধিহে পাইছে।
২০১৬ চনলৈকে অসমত পঞ্জীয়নভূক্ত নিৱনুৱাৰ সংখ্যা আছিল ১৬,৪২,৭৮১ গৰাকী।২৬ লাখ নিবনুৱাক সংস্থাপিত কৰাৰ প্ৰতিশ্ৰুতি দিয়া বিজেপি চৰকাৰৰ কাৰ্যকালতে ২০১৮ চনত অসমত নিবনুৱাৰ সংখ্যা হৈছিলগৈ ১৬,৯৯,৯৭৭ গৰাকী আৰু ২০১৯ চনৰ জুন পৰ্যন্ত এই সংখ্যা হৈছিল গৈ ১৭,১৫,৭৫৯ গৰাকী।
এনেবোৰ পৰিসংখ্যাই প্ৰমাণ কৰে যে ২০১৬ ৰ বিধানসভাৰ নিৰ্বাচনৰ পূৰ্বে হিমন্ত বিশ্ব শৰ্মাই যি ২৬ লাখ নিবনুৱাক কৰ্মসংস্থাপন দিব বুলি প্ৰতিশ্ৰুতি দিছিল সেয়া তেওঁৰ ভুৱা আশ্বাসৰ বাদে আন একো নাছিল। এতিয়া আকৌ আহিছে নিৰ্বাচন। সেয়ে পুনৰবাৰ ৰাইজৰ কাষ চাপিবলগীয়া হৈছে বিজেপিৰ নেতাসকল। এইবাৰ হিমন্ত বিশ্বৰ মুখত অৱশ্যে যোৱা নিৰ্বাচনত দিয়া ২৬ লাখ নিৱনুৱাৰ কথাষাৰ নাই।
ব্যৰ্থতাক ঢাকিবলৈ এইবাৰ হিমন্তই ২৬ লাখৰ সলনি ১ লাখ নিবনুৱাক চাকৰি দিব বুলি প্ৰতিশ্ৰুতি দিছে। ১ লাখ নিবনুৱাক কেতিয়া চাকৰি দিব তাৰো সময় বান্ধি দিছে হিমন্ত বিশ্ব শৰ্মাই।
২০২২ চনৰ ৩১ মাৰ্চৰ ভিতৰত অসমৰ ১ লাখ নিৱনুৱাক চৰকাৰে চাকৰি দিব বুলি হিমন্তই সময়সীমা বান্ধি দি নিবনুৱা যুৱক-যুৱতীসকলক পুনৰ সপোনৰ সাগৰত নিমজ্জিত কৰিছে।
হিমন্ত বিশ্বৰ দৰে নেতাসকলে এই কথা ভালদৰেই জানে যে চাকৰি নিদিলেও বা চাকৰিৰ নামত সাক্ষাৎকাৰ পাতি ভেঁকোভাওনা কৰিলেও অসমৰ নিবনুৱাই হিমন্ত বিশ্ব অথবা বিজেপিক দুনাই কোনো প্ৰশ্ন নকৰে।
যিদৰে যোৱা বিধানসভা নিৰ্বাচনৰ সময়ত হিমন্তই ২৬ লাখ নিবনুৱাক সংস্থাপিত কৰিব বুলি দিয়া প্ৰতিশ্ৰুতি পালন নকৰা সত্বেও কোনো নিবনুৱাই আজিলৈকে বিজেপি অথবা হিমন্ত বিশ্ব শৰ্মাক এই বিষয়ত কোনো প্ৰশ্ন কৰা নাই।
সেয়ে নিবনুৱাৰ সপোন এইবাৰ হৈ পৰিছে বিজেপিৰ বাবে নিৰ্বাচন জিকাৰ অস্ত্ৰ।এইবাৰো আহিছে হিমন্ত…নিবনুৱাৰ বাবে পুনৰ টেঙা আমৰ মোনা খনলৈ বুলি ক’লেও হয়তো সেয়ে ভুল কোৱা নহ’ব।
