মুখ্যমন্ত্ৰী হিমন্ত বিশ্ব শৰ্মাই আজি (৩১ মে’) ঘোষণা কৰে যে ৰাজ্যৰ মন্ত্ৰী পৰিষদখন ৫ জুনত সম্প্ৰসাৰণ কৰা হ’ব। ইয়াৰ ফলত বিজেপি নেতৃত্বাধীন এন ডি এ চৰকাৰ গঠনক লৈ চলি থকা জল্পনা-কল্পনাৰ অন্ত পৰিল।
ছচিয়েল মিডিয়া এক্সত এই কথা ঘোষণা কৰি শৰ্মাই কয়, “অসম চৰকাৰৰ মন্ত্ৰী পৰিষদ ২০২৬ চনৰ ৫ জুনত সম্প্ৰসাৰণ কৰা হ’ব বুলি জনাবলৈ পাই আনন্দিত হৈছো।”
২০২৬ চনৰ অসম বিধানসভা নিৰ্বাচনত এন ডি এৰ বিজয়ৰ পিছত শৰ্মাই একেৰাহে দ্বিতীয়বাৰৰ বাবে মুখ্যমন্ত্ৰী হিচাপে কাৰ্যকাল আৰম্ভ কৰাৰ এমাহৰ ভিতৰত এই ঘোষণা কৰা হৈছে। তেওঁ পূৰ্বে ইংগিত দিছিল যে বিধানসভাৰ অধিৱেশন সমাপ্ত হোৱাৰ পিছত আৰু জুন মাহৰ প্ৰথম সপ্তাহৰ ভিতৰত কেবিনেট সম্প্ৰসাৰণ হ’ব।
যোৱা ১২ মে’ত বৰ্তমানৰ মন্ত্ৰীসভাৰ শপত গ্ৰহণ হৈছিল, য’ত প্ৰথম অৱস্থাত শপত গ্ৰহণ কৰিছিল মুখ্যমন্ত্ৰী শৰ্মা আৰু সীমিত সংখ্যক মন্ত্ৰীয়ে। ইয়াৰ পিছত কেইবাটাও বিভাগ পোনপটীয়াকৈ মুখ্যমন্ত্ৰীৰ অধীনত আছে, যাৰ ফলত মন্ত্ৰীসভাৰ সম্প্ৰসাৰণ আৰু নতুন অন্তৰ্ভুক্তিৰ সম্ভাৱনা বৃদ্ধি পাইছে।
ৰাজনৈতিক পৰ্যবেক্ষকসকলে আশা কৰিছে যে এই সম্প্ৰসাৰণত বিজেপি আৰু ইয়াৰ মিত্ৰজোঁটৰ অংশীদাৰসকলৰ অভিজ্ঞ নেতা আৰু নতুন মুখৰ সংমিশ্ৰণ ঘটিব। অৱশ্যে মুখ্যমন্ত্রীগৰাকীয়ে মন্ত্ৰিত্বৰ বাবে সম্ভাৱনা থকা লোকৰ নাম প্রকাশ কৰা নাই৷
নতুন চৰকাৰ গঠনৰ পূৰ্বে শৰ্মাই ইংগিত দিছিল যে অসম কেবিনেটত অৱশেষত প্ৰায় ১৮ৰ পৰা ১৯জন মন্ত্ৰী থাকিব পাৰে যদিও চূড়ান্ত সম্প্ৰসাৰণ দলৰ নেতৃত্বৰ লগত আলোচনা কৰি সিদ্ধান্ত লোৱা হ’ব।
