ধন সৰবৰাহৰ গোচৰত গ্ৰেপ্তাৰ হোৱাৰ পাছত বছৰৰ আৰম্ভণিতে প্ৰত্যাহ্বানৰ সন্মুখীন হোৱা ঝাৰখণ্ডৰ মুখ্যমন্ত্ৰী হেমন্ত ছ’ৰেনে ৰাজ্যখনৰ বিধানসভা নিৰ্বাচনত ঝাৰখণ্ড মুক্তি মৰ্চা-কংগ্ৰেছৰ মিত্ৰজোঁটক জয় দিশে আগুৱাই নিছে। এগজিট প’লৰ ভৱিষ্যদ্বাণীক ভুল প্ৰমাণিত কৰি মিত্ৰজোঁটে ক্ষমতা অক্ষুণ্ণ ৰখাৰ পথত আগবাঢ়িছে, য’ত ৫৫খনতকৈও অধিক আসনেৰে ৪২খনৰ মেজিক সংখ্যাৰ নিৰ্দিষ্ট সীমা অতিক্ৰম কৰিছে।বিজেপি নেতৃত্বাধীন এনডিএ ২৩খন আসনেৰে পিছ পৰি আছে।
জেএমএম-কংগ্ৰেছৰ মিত্ৰতাই ঝাৰখণ্ডৰ গুৰুত্বপূৰ্ণ অঞ্চলসমূহত আগবাঢ়ি আছে৷ ২০১৯ চনৰ নিৰ্বাচনত জেএমএম-কংগ্ৰেছ-আৰজেডি মিত্ৰজোঁটে ৪৭খন আসন লাভ কৰিছিল, য’ত জেএমএম নিজেই ৩০খন আসন লাভ কৰিছিল।
প্ৰচাৰৰ সময়ত মোডী আৰু শ্বাহৰ নেতৃত্বত বিজেপিয়ে বাংলাদেশৰ পৰা অহা কথিত “অবৈধ অনুপ্ৰৱেশ”ক লৈ ছ’ৰেণ চৰকাৰক সমালোচনা কৰি জনজাতীয় অধিকাৰৰ প্ৰতি ভাবুকি কঢ়িয়াই অনা বুলি সমালোচনা কৰে। ইয়াৰ প্ৰত্যুত্তৰত জেএমএমই মুখ্যমন্ত্ৰী ‘মায়্যা সন্মান যোজনা’ৰ দৰে নিজৰ কল্যাণমূলক পদক্ষেপত গুৰুত্ব আৰোপ কৰে, য’ত যোগ্য মহিলাক প্ৰতিমাহে ১০০০টকা প্ৰদান কৰা হয়। মহিলাৰ কল্যাণৰ ওপৰত এই মনোনিৱেশে সম্ভৱতঃ জেএমএমক মহিলা ভোটাৰৰ পৰা শক্তিশালী সমৰ্থন লাভ কৰাত সহায় কৰিছিল, ৮১টা সমষ্টিৰ ভিতৰত ৬৮টা সমষ্টিত মহিলাৰ ভোটদানৰ হাৰ অধিক হৈছিল।
ঝাৰখণ্ডত বিজেপিৰ সহ-প্ৰভাৰী হিচাপে আছিল অসমৰ মুখ্যমন্ত্ৰী হিমন্ত বিশ্ব শৰ্মা৷শৰ্মাই ঝাৰখণ্ডক নিজৰ দ্বিতীয় ঘৰ হিচাপে গণ্য কৰে বুলি মন্তব্য কৰিছিল৷লগতে শৰ্মাই ইখনৰ পাছত সিখন জনসভা আৰু ৰেলী সম্বোধন কৰিছিল৷কিন্তু তৎস্বত্বেও সকলো হিমন্তৰ নীতিক নিস্প্ৰভ কৰি ঝাৰখণ্ডত বিৰোধীৰ উত্থান হ’ল৷
