নাচিকৰ হোটেলৰ কোঠাত উদ্ধাৰ অসমৰ সন্ধানহীন যুৱতী; অসম আৰক্ষীক টুইটাৰত শুভেচ্ছা হিমন্ত বিশ্ব শৰ্মাৰ
হোজাইৰ পৰা সন্ধানহীন হৈ থকা অসমৰ এগৰাকী যুৱতীক ২৩ জুনত অসম আৰক্ষীয়ে মহাৰাষ্ট্ৰৰ নাচিকৰ এখন হোটেলৰ পৰা উদ্ধাৰ কৰিবলৈ সক্ষম হয়।
সন্ধানহীন হৈ থকাৰ ১১ এঘাৰদিন পাছত উদ্ধাৰ হোৱা ভূক্তভোগী যুৱতীগৰাকী অসমৰ নগাঁও জিলাৰ অন্তৰ্গত যমুনামুখৰ বলিৰাম বাসিন্দা।
অসমৰ বিত্ত, স্বাস্থ্য আৰু গড়কপ্তানি মন্ত্ৰী হিমন্ত বিশ্ব শৰ্মাই অসম আৰক্ষীৰ সফল উদ্ধাৰ অভিযানৰ বিষয়ে টুইটাৰত শ্বেয়াৰ কৰি এনেদৰে লিখে- ‘‘১২ জুনত হোজাইৰ যমুনামুখৰ পৰা সন্ধানহীন হৈ থকা গীতা (নাম সলনি কৰা হৈছে) নামৰ এগৰাকী যুৱতীক মহাৰাষ্ট্ৰৰ নাচিকৰ এখন হোটেলৰ পৰা উদ্ধাৰ কৰা হয়, লগতে মহম্মদ জাৱেদ নামৰ এজন যুৱকক আটক কৰা হয়। মই অসম আৰক্ষীৰ এই সফলতাৰ বাবে ধন্যবাদ জ্ঞাপন কৰিছো’’।
উল্লেখযোগ্য যে, যুৱতীগৰাকী ১২ জুনৰ পৰা সন্ধানহীন হৈ আছিল আৰু যুৱতীগৰাকীৰ পৰিয়ালৰ লোকে যমুনামুখ আৰক্ষী থানাত ঘটনা সন্দৰ্ভত এখন এজাহাৰ দাখিল কৰিছিল। হোজাই আৰক্ষী আৰু যমুনামুখ আৰক্ষীয়ে এজাহাৰৰ ভিত্তিত যুটীয়াভাৱে অভিযান চলাই যুৱতীগৰাকীক উদ্ধাৰ কৰিবলৈ সক্ষম হয়।
উত্থাপিত অভিযোগ অনুসৰি. একেখন গাঁৱৰে মহম্মদ জাৱেদ ইছলাম নামৰ যুৱকজনে যুৱতীগৰাকীকক অপহৰণ কৰি মহাৰাষ্ট্ৰলৈ লৈ গৈছিল।