ভাৰতত নহয় আমেৰিকাত হিন্দু মন্দিৰ নিৰ্মাণকাৰী ভাৰতীয় শ্ৰমিকৰ ওপৰত কৰা হৈছে অকথ্য শোষণ। কেৱল শোষণেই নহয় মন্দিৰ নিৰ্মাণৰত ভাৰতীয় শ্ৰমিকৰ ওপৰত অকথ্য বঞ্চনা কৰাৰো অভিযোগ উত্থাপন হৈছে।
স্মৰ্তব্য যে যোৱা মে’ মাহত বুচানৱাচী অক্ষৰ পুৰুষোত্তম স্বামীনাৰায়ণ সন্ত(BAPS) বিৰুদ্ধে অবৈধ মানৱ সৰবৰাহ আৰু মজুৰী আইন উলংঘা কৰাৰ এক ঘটনা পোহৰলৈ আহিছিল।
যোৱা মে’ত India Civil Watch International (ICWI) পিটিআইক দিয়া এক বিবৃতিত কোৱা হৈছিল মাৰ্কিন সংস্থা FBIৰ নেতৃত্বত চলোৱা অভিযানত প্ৰায় ২০০ জন শ্ৰমিকক উদ্ধাৰ কৰা হৈছিল।
ইয়াৰ পিছতে আমেৰিকাৰ এখন জিলা আদালতত এই সন্দৰ্ভত এক গোচৰ ৰুজু কৰা হৈছিল। এই গোচৰটো পুনৰ সংশোধন কৰা হৈছে আৰু সংশোধিত গোটৰটোত প্ৰকাশ পাইছে এক ভয়াৱহ ছবি।
বুধবাৰে প্ৰকাশ পোৱা নিউয়ৰ্ক টাইমছৰ এই সংক্ৰান্তীয় এক প্ৰতিবেদনে শ্ৰমিকৰ ওপৰত চলোৱা এই অকথ্য শোষণ আৰু বঞ্চনাৰ ভয়াৱহ ছবিখন পোহৰলৈ আনিছে।
প্ৰতিবেদনখনৰ মতে BAPSএ কেৱল নিউ জাৰ্ছীত বৃহদাকাৰ স্বামী নাৰায়ণ মন্দিৰ নিৰ্মাণৰ কামতে শ্ৰমিকক শোষণ আৰু বঞ্চনা কৰা নাছিল।
BAPS য়ে নিউ জাৰ্ছীৰ লগতে আটলাণ্টা, চিকাগো, হিউষ্টন আৰু লছ এঞ্জেলছ আদিত নিৰ্মাণৰত মন্দিৰত ভাৰতীয় শ্ৰমিকসকলৰ ওপৰতো শোষণ আৰু বঞ্চনা চলাই আহিছে।
আদালতত দাখিল কৰা সংশোধিত গোচৰটোৰ মতে BAPS য়ে ভাৰতীয় শ্ৰমিকসকলক মাহে মাত্ৰ ৪৫০ ড’লাৰতে কাম কৰিবলৈ বাধ্য কৰাইছিল।
যিসময়ত আমেৰিকাত শ্ৰমিকৰ প্ৰতিঘণ্টা মজুৰী ৭.২৫ ড’লাৰ সেই সময়ত BAPS য়ে ভাৰতীয় শ্ৰমিকসকলক ঘণ্টাই প্ৰতি মাত্ৰ ১.২ ড’লাৰত ১৩ ঘণ্টাকৈ কামত খটুৱাইছিল।
ইফালে BAPS ৰ বিৰুদ্ধে আন কেতবোৰ ভয়ংকৰ অভিযোগো উত্থাপন হৈছে। BAPS য়ে মাৰ্কিন যুক্তৰাষ্ট্ৰৰ আইন ভংগ কৰি ২০১৮ চনতে ভাৰতৰ পৰা ২০০তকৈ অধিক শ্ৰমিকক আমেৰিকালৈ নিছিল।
BAPS ৰ বিৰুদ্ধে অবৈধ শ্ৰমিক সৰবৰাহ, দাসত্ব, ষড়যন্ত্ৰ, আৰু বিদেশী শ্ৰমিক চুক্তিত জালিয়াতি কৰাৰ লগতে নিম্নতম মজুৰি পৰিশোধ নকৰা, ইমিগ্ৰেচন নথিপত্ৰ জব্দ কৰাকে আদি কৰি বহু অভিযোগ উত্থাপিত হৈছে।
BAPSৰ এই ভয়ংকৰ কাণ্ডৰ বিৰুদ্ধে মাৰ্কিন যুক্তৰাষ্ট্ৰ আইনে কি ব্যৱস্থা গ্ৰহণ কৰে সেয়া পৰৱৰ্তী সময়ত লক্ষ্যণীয় হ’ব।
