উচতনি! সাম্প্ৰদায়িক সংঘৰ্ষই ধুই যোৱা হাৰিয়ানাত মুকলিকৈ হনুমান চালিছা পাঠ হিন্দুত্ববাদী সংগঠনৰ
বিগত ৩১ জুলাইত সাম্প্ৰদায়িক সংঘৰ্ষই বিধ্বস্ত কৰি তুলিছিল হাৰিয়ানাৰ নুহ জিলাত। এই ঘটনা ৰাষ্ট্ৰীয় উদ্বেগৰ কাৰণ হৈ পৰিছিল। সংঘৰ্ষৰ ঢৌ সম্প্ৰতি শাম কাটিছে যদিও সম্পূৰ্ণৰূপে মাৰ যোৱা নাই উদ্বেগৰ।
তেনে সময়তে ভয়াৱহতাৰ আশংকা সৃষ্টি কৰিছে হিন্দুত্ববাদী সংগঠনৰ কাৰ্যই। সাম্প্ৰদায়িক সংঘৰ্ষৰ প্ৰতিবাদ স্বৰূপে আজি হাৰিয়ানাৰ শোনিপটত একাংশ হিন্দুত্ববাদী সংগঠনৰ সদস্যই এক সমাৱেশৰ আয়োজন কৰি মুকলিকৈ হনুমান চলিছা পাঠ কৰে।
শেহতীয়াকৈ নুহত সংঘটিত হোৱা সাম্প্ৰদায়িক হিংসাৰ প্ৰতি ক্ষোভ প্ৰকাশ হিচাপে হনুমান চলিছা পাঠ অনুষ্ঠান পৰিচালনা কৰা বুলি জানিবলৈ দিয়ে খোদ এই কাৰ্যসূচীৰ আয়োজকসকলে।
সংগঠনটোৰ দীপক চৌহান নামৰ এগৰাকী নেতাৰ ভাষ্য মতে, দেশত হিন্দুসকলক আক্ৰমণ কৰা হৈছে। হিন্দুসকলে ধৰ্মীয় শোভাযাত্ৰাও উলিয়াব পৰা নাই। সেয়ে নুহৰ হিংসাত্মক পৰিস্থিতিৰ প্ৰতিবাদ হিচাপে চালিছা পাঠৰ আয়োজন কৰা বুলি তেওঁ কয়।
লগতে এক নিৰ্দিষ্ট সম্প্ৰদায়ৰ লোক তথা বহিৰাগত কোনো লোককে পৰিচয় পৰীক্ষণ অবিহনে তেওঁলোকে বজাৰ-সমাৰ কৰিবলৈ নিদিয়ে বুলিও চাঞ্চল্যকৰ মন্তব্য কৰে হিন্দুত্ববাদী নেতাগৰাকীয়ে।
লক্ষণীয়ভাৱে এই হিন্দু গোটসমূহে সমগ্ৰ শোণিপটতেহনুমান চালিছা পাঠৰ অনুৰূপ কাৰ্যসূচী অনুষ্ঠিত কৰাৰ পৰিকল্পনা কৰিছে। স্বাভাৱিকতেই এই কাৰ্যই এক ভয়াৱহ পৰিস্থিতিৰ আশংকা জগাই তুলিছে।
ইফালে শেহতীয়াকৈ হাৰিয়ানাৰ বিভিন্ন পঞ্চায়তে মুছলমানসকলৰ বিৰুদ্ধে ব্যৱসায় তথা দোকান চলোৱা বা গাঁৱত প্ৰৱেশ কৰাত বাধা আৰোপ কৰি প্ৰস্তাৱ গৃহীত কৰিছে।
অৱশ্যে শুকুৰবাৰে ৰাজ্য চৰকাৰে এনেধৰণৰ প্ৰস্তাৱ গ্ৰহণ কৰাসকল পঞ্চায়তীৰাজ আইনৰ অধীনত আইনী ব্যৱস্থাৰ সন্মুখীন হ’ব লাগিব বুলি সকীয়াই দিছে।
উল্লেখ্য যে, যোৱা ৩১ জুলাইত বিশ্ব হিন্দু পৰিষদৰ এক শোভাযাত্ৰাৰ সময়ত নুহত সংঘটিত হোৱা সাম্প্ৰদায়িক সংঘৰ্ষৰ পৰিণতিত ৬ গৰাকী লোকৰ মৃত্যু হৈছিল। পৰৱৰ্তী সময়ত ই ৰাজ্যৰ অন্যান্য প্ৰান্তলৈও বিয়পি পৰে।