“ফেইচবুক পোষ্টৰ বিতৰ্ক”ৰ এমাহৰ পিছত NRC-ৰ ৰাজ্যিক সমন্বয়ক হিচাপে যোগদান হিতেশ দেৱ শৰ্মাৰ
কেইবাটাও বিতৰ্কিত আৰু সাম্প্ৰদায়িক ধৰণৰ ফেইচবুক পোষ্টৰ বাবে বিতৰ্কৰ আৱৰ্তত সোমাই পৰা NRC-ৰ নতুন ৰাজ্যিক সমন্বয়ক হিতেশ দেৱ শৰ্মাই আজি তেওঁৰ নতুন দায়িত্বত যোগদান কৰে।
সদ্যবিদায়ী ৰাজ্যিক সমন্বয়ক প্ৰতীক হাজেলাৰ ঠাইত চৰকাৰে শৰ্মাক ৯ নৱেম্বৰত এন আৰ চিৰ ৰাজ্যিক সমন্বয়ক হিচাপে নিযুক্তি দিছিল।
কিন্তু তেওঁৰ কিছুমান “বিতৰ্কিত” ফেইচবুক পোষ্ট ছ’চিয়েল মিডিয়াত ভাইৰেল হৈ পৰে আৰু এই বিতৰ্কক লৈ বিবুধিত পৰিছিল চৰকাৰ।
কংগ্ৰেছৰ বৰপেটা সমষ্টিৰ সাংসদ আব্দুল খালেকে দেৱশৰ্মাক এন আৰ চিৰ ৰাজ্যিক সমন্বয়কৰ দৰে গুৰুত্বপূৰ্ণ পদত নিযুক্তি নিদিবলৈ অনুৰোধ জনাই মুখ্য মন্ত্ৰীলৈ আনুষ্ঠানিকভাৱে পত্ৰও দিছিল।
এই বিতৰ্কৰ মাজতে নতুন দায়িত্বত যোগদান নকৰাকৈয়ে এমাহৰ ছুটীত যায় বিষয়াজন।
দেৱশৰ্মা ছুটীত থকাৰ সময়ছোৱাত চৰকাৰে বাবুলাল শৰ্মাক ভাৰপ্ৰাপ্ত ৰাজ্যিক সমন্বয়ক হিচাপে দায়িত্ব দি থৈছিল। অৱশেষত আজি হিতেশ দেৱশৰ্মাই তেওঁৰ নতুন দায়িত্বত যোগদান কৰে।
NRC-ৰ ৰাজ্যিক সমন্বয়ক হিচাপে কাৰ্য্যালয়ত প্ৰথম দিনটোত নৰ্থ ইষ্ট নাওৰ আগত প্ৰতিক্ৰিয়া প্ৰকাশ কৰি দেৱশৰ্মাই কয়, “মোক এনে এটা দায়িত্ব দিয়া বাবে মুখ্য মন্ত্ৰী সৰ্বানন্দ সোণোৱালক ধন্যবাদ জ্ঞাপন কৰিছো। এই দায়িত্ব সুচাৰুৰূপে পালন কৰিব পাৰিম বুলি মোৰ বিশ্বাস আছে। পূৰ্বেও এনআৰচিৰ কাম-কাজৰ সৈতে জড়িত আছিলো। কামখিনি কৰাৰ বাবে মোৰ বাবে অসুবিধা নহ’ব।”
তেওঁ অসমীয়া হিচাপে জাতিটোৰ প্ৰতি থকা দায়বদ্ধতা আৰু এজন প্ৰশাসনিক বিষয়া হিচাপে সংবিধানৰ প্ৰতি থকা দায়বদ্ধতা, দুয়োটাৰ কথা উল্লেখ কৰে।
“এজন বিষয়া হিচাপে ভাৰতীয় সংবিধানৰ প্ৰতি দায়বদ্ধ। এজন অসমীয়া হিচাপে অসমৰ প্ৰতি মোৰ দায়বদ্ধতা আছে। এই বিশ্বাসত কাম কৰিলে নিশ্চয় সফল হ’ম”, দেৱশৰ্মাৰ মন্তব্য।
ইপিনে, যোৱা ৩১ আগষ্টত প্ৰকাশ পোৱা চূড়ান্ত এন আৰ চিৰ প্ৰসংগত তেওঁ কয় “এতিয়া কি কি কাম-কাজ চলি আছে সেইখিনি চালি-জাৰি চাই এটা ষ্টেটাচ ৰিপৰ্ট উচ্চতম ন্যায়ালয়ক জনাব লাগিব। তাৰ ওপৰত উচ্চতম ন্যায়ালয়ে যি নিৰ্দেশ দিয়ে সেই মতে কাম কৰিব লাগিব।”
ইয়াৰোপৰি, এন আৰ চিৰ পৰা নাম বাদ পৰা ১৯ লাখ লোকৰ বহুখিনিয়েই প্ৰকৃত ভাৰতীয় বুলি কংগ্ৰছকে ধৰি বিভিন্ন দল-সংগঠনে অভিযোগ তোলা সম্পৰ্কত তেওঁ কয়, “আজিৰ দিনত আপোনালোকে এন আৰ চিৰ কথা যি জানে সেইখিনি জ্ঞানহে মোৰো আছে, তাতকৈ বেছি নাই। গোটেই প্ৰক্ৰিয়াটো ভালদৰে চাব লাগিব তাৰ পাছত ক’ব পাৰিম। টেকনিকেল কথা আজি ক’ব পৰা অৱস্থাত নাই।”
কিছুদিন পূৰ্বে ছ’চিয়েল মেডিয়াত ভাইৰেল হৈ পৰা বিতৰ্কিত ফেইচবুক পোষ্ট সম্পৰ্কে আমাৰ সাংবাদিকে সোধাত তেওঁ উত্তৰত‘”কোনো ব্যক্তিগত কথাৰ উত্তৰ নিদিওঁ, ছ’ৰি” বুলি মন্তব্য কৰে।