কৃষকৰ আন্দোলনকলৈ লৈ বলিউডৰসকল দ্বিবিভক্ত হোৱাৰ সময়তে প্ৰতিবাদী কৃষকৰ কাষত থিয় দিছে বিদেশৰ বহু শিল্পী তথা অভিনেতা-অভিনেত্ৰীয়ে।
কৃষকৰ আন্দোলনক মুকলিকৈ সমৰ্থন জনাই ধৰ্ষণ আৰু হত্যাৰ ভাবুকি পাইছে ব্ৰিটিছ অভিনেত্ৰী জামিলা জামিলে।
ইমানৰ পিছতো থমকি ৰোৱা নাই তেওঁ।এনে সময়তে হলিউডৰ প্ৰখ্যাত অভিনেত্ৰী ছুচান ছাৰানডনেও আজি ভাৰতৰ কৃষক বিদ্ৰোহৰ প্ৰতি মুকলি সমৰ্থন জনায়।
কৃষকৰ আন্দোলনৰ প্ৰতি সমৰ্থন জনাই আজি অভিনেত্ৰীগৰাকীয়ে টুইটাৰত কয় যে কৃষকসকলে কিয় প্ৰতিবাদ কৰিছে সেয়া সকলোৱে হৃদয়াংগম কৰা উচিৎ।
উল্লেখ্য ইয়াৰ পূৰ্বে প্ৰখ্যাত পপ তাৰকা ৰিহানায়ো কৃষকসকলৰ সমৰ্থনত পোষ্ট দিছিল। যি পোষ্টে বিশ্বজুৰি খলকনি তুলিছিল।
ছুইডেনৰ কিশোৰী পৰিবেশকৰ্মী গ্ৰেটা থানবাৰ্গ,অভিনেত্ৰী আমাণ্ডা চেৰনি,সংগীত শিল্পী জে চিন, পৰ্ণ ষ্টাৰ মিঞা খালিফা আদিয়েও কৃষকৰ আন্দোলনলৈ সমৰ্থন জনাইছে।
ইপিনে আজি কৃষক সংগঠন সমূহে চৰকাৰক কৃষি আইন বাতিল কৰিবলৈ অন্তিম সময়সীমা বান্ধি দিছে।
কৃষক নেতা ৰাকেশ টিকাইতে আজি চৰকাৰক ২ অক্টোৱৰ অৰ্থাৎ গান্ধী জয়ন্তীৰ দিনটোলৈ কৃষি আইন বাতিল কৰাৰ অন্তিম সময়সীমা বান্ধি দিয়ে।
এই সময়ছোৱাৰ ভিতৰত চৰকাৰে তিনি খনকৈ কৃষি আইন বাতিল নকৰিলে কৃষকসকলে আন্দোলনৰ নতুন ৰণকৌশল প্ৰস্তুত কৰিবলৈ বাধ্য হ’ব বুলি কৃষক নেতাগৰাকীয়ে মন্তব্য কৰে।
