শেহতীয়াকৈ গ্ৰাহকসকলৰ বাবে ভাৰতীয় ষ্টেট বেংকে কেইবাটাও সুখৱৰ কঢ়িয়াই আনিছে। বিশেষ ফিক্সড ডিপ’জিট আঁচনিৰ ম্যাদ অহা ৩১ মাৰ্চলৈকে বৃদ্ধি কৰা হৈছে। ইয়াৰ ফলত জ্যেষ্ঠ নাগৰিকসকল উপকৃত হৈছে।
এইবাৰ দেশৰ বৃহত্তম বেংকিং প্ৰতিষ্ঠানটোৱে গৃহ ঋণৰ ক্ষেত্ৰত বিভিন্ন সুবিধাৰ কথা ঘোষণা কৰিছে। সুতৰ হাৰ হ্ৰাসৰ লগতে প্ৰচেছিং ফী ৰেহাইকে ধৰি বিভিন্ন সুবিধাৰ অফাৰ দিছে SBIয়ে।
ঘৰ বা ফ্লেট ক্ৰয় কৰাৰ প্ৰতি গ্ৰাহকসকলৰ আগ্ৰহ বৃদ্ধি কৰিবলৈ ভাৰতীয় ষ্টেট বেংকে বিভিন্ন সময়ত বিভিন্ন পদক্ষেপ গ্ৰহণ কৰি আহিছে। বিভিন্ন অফাৰ আগবঢ়াই আহিছে বেংক প্ৰতিষ্ঠানটোৱে।
শুকুৰবাৰে প্ৰকাশ কৰা এক বিবৃতিত SBI গৃহ ঋণৰ সুতত ৩০ বেছিছ পইন্ট পৰ্যন্ত ৰেহাইৰ কথা ঘোষণা কৰা হৈছে।
তদুপৰি, প্ৰচেছিং ফী ১০০শতাংশ ৰেহাই দিয়া হ’ব বুলিও ঘোষণা কৰা হৈছে। কেবল সেয়াই নহয়, মহিলা গ্ৰাহক আৰু বেলেন্স ট্ৰেন্সফাৰৰ ক্ষেত্ৰত সুতৰ ওপৰত অতিৰিক্ত ৫বেছিছ পইন্ট ৰেহাই পোৱা যাব।
আগন্তুক দিনত প্ৰয়োজন অনুসৰি আৰু নতুন পদক্ষেপ গ্ৰহণৰো প্ৰতিশ্ৰুতি দিছে বেংক প্ৰতিষ্ঠানটোৱে।
SBIৰ গৃহ ঋণ চিৱিল স্ক’ৰৰ সৈতে জড়িত। সম্প্ৰতি ৩০ লাখ টকা পৰ্যন্ত ঋণত এই বেংকৰ সুততৰ হাৰ হৈছে ৬.৮০শতাংশ। সেইদৰে ৩০লাখ টকাৰ অধিক গৃহ ঋণত সুতৰ হাৰ হৈছে ৬.৯৫শতাংশ।
কিন্তু ৮খন মেট্ৰ’ চহৰত ৫কোটি টকা পৰ্যন্ত ঋণত ৩০বেছিছ পইন্ট পৰ্যন্ত ৰেহাই দিয়া হৈছে। তদুপৰি, YONO App বা বেংকৰ ৱেবছাইটৰ জৰিয়তে আবেদন কৰিলে অতিৰিক্ত ৫ বেছিছ পইন্ট ৰেহাই পাব।
কোৱা হৈছে যে এই মুহূৰ্তত SBIত গৃহ ঋণৰ সুতৰ হাৰ আটাইতকৈ কম। অহা ২১ মাৰ্চলৈকে বৰ্দ্ধিত ৰেহাই তথা প্ৰচেছিং ফী ৰেহাইৰ সুবিধা পোৱা যাব।
