ঘৰৰ ভিতৰত আৱদ্ধ হৈ থকা আৰু সামাজিক দূৰত্ব বজাই ৰখা কাৰ্য্যই কৰ’না ভাইৰাছ সংক্ৰমণ ৬২ শতাংশ হ্ৰাস কৰে বুলি অলপতে ইণ্ডিয়ান কাউঞ্চিল অব মেডিকেল ৰিচাৰ্ছ চমুকৈ আইচিএমআৰে ঘোষণা কৰে।
ক’ৰ’না ভাইৰাছৰ সংক্ৰমণ সন্দৰ্ভত অলপতে কৰা এক গাণিতিক মডেলৰ গৱেষণাত এই কথা প্ৰমাণ হৈছে বুলি আইচিএমআৰৰ তৰফৰ পৰা জানিবলৈ দিয়া হয়।
গৱেষণাত প্ৰকাশ পোৱা মতে, যদিহে কোনো লোকৰ শৰীৰত ক’ৰ’না ভাইৰাছ সংক্ৰমণৰ লক্ষণে দেখা দিয়ে আৰু তেওঁ যদিহে নিজকে ঘৰৰ ভিতৰত আবদ্ধ কৰি ৰাখে তেনেহ’লে ক’ৰ’না ভাইৰাছৰ সংক্ৰমণৰ সম্ভাৱনা ৬২ শতাংশলৈ হ্ৰাস পায়।
কিদৰে ভয়াবহ ক’ৰ’না ভাইৰাছৰ স্থানীয় সংক্ৰমণ ৰোধ কৰিব পৰা যায় সেই সন্দৰ্ভত কাৰ্য্যকৰী উপায় উৎদ্ভাৱনৰ বাবে কৰা গৱেষণাত এই তথ্য পোহৰলৈ আহে।
উল্লেখযোগ্য যে, সমগ্ৰ বিশ্বৰ লগতে ভাৰতবৰ্ষতো ক’ৰ’না ভাইৰাছে ক্ৰমাৎ গুৰুতৰ ৰূপ ধাৰণ কৰিছে।
ভাৰতত ক’ৰ’না ভাইৰাছত আক্ৰান্ত হোৱা লোকৰ সংখ্যাই প্ৰায় ৫০০ৰ সংখ্যা স্পৰ্শ কৰিছে।
এই সময়ত দেশৰ প্ৰধান মন্ত্ৰীৰ লগতে ৰাজ্যৰ সকলো ৰাজনৈতিক নেতা সকলে জনসাধাৰণক নিজকে গৃহবন্দী কৰি ৰাখি ক’ৰ’না ভাইৰাছৰ সংক্ৰমণ ৰোধৰ ক্ষেত্ৰত চৰকাৰক সহযোগিতা কৰাৰ বাবে আহ্বান জনাই আহিছে।