মুছেৱালাৰ পিছত এইবাৰ গোল্ডী ব্ৰাৰৰ লক্ষ্য হানী সিং!
বিগত বৰ্ষত সংঘটিত হোৱা জনপ্ৰিয় পঞ্জাৱী গায়ক সিদ্ধু মুছেৱালাৰ হত্যাকাণ্ডই দেশজুৰি সৃষ্টি কৰিছিল তীব্ৰ চাঞ্চল্যৰ। এই ভয়াৱহ হত্যাকাণ্ডৰ দায়িত্ব স্বীকাৰ কৰিছিল গেংষ্টাৰ গোল্ডি ব্ৰাৰে।
মুছেৱালা হত্যাৰ পিছত এইবাৰ কুখ্যাত গেংষ্টাৰগৰাকীৰ ভাবুকিৰ লক্ষ্য হৈ পৰিছে পঞ্জাৱৰে আন এগৰাকী জনপ্ৰিয় গায়ক ৰেপাৰ হানী সিং। এক ফোনকল যোগে দেশৰ জনপ্ৰিয় ৰেপাৰগৰাকীক গোল্ডী ব্ৰাৰে হত্যাৰ ভাবুকি দিয়া বুলি জানিব পৰা গৈছে।
এই ভাবুকি ভৰা ফোনকলৰ পিছতে আজি দিল্লী আৰক্ষীৰ মুখ্য কাৰ্যালয়ত উপস্থিত হয় হানী সিং। দিল্লী আৰক্ষী মুখ্য কাৰ্যালয়ত উপস্থিত হৈ গায়ক আৰু ৰেপাৰগৰাকীয়ে পিছত সংবাদ মাধ্যমৰ সৈতেও বাৰ্তালাপ কৰে।
অৱশ্যে আৰক্ষীৰ পৰামৰ্শ অবিহনে সংবাদ মাধ্যমৰ আগত তেওঁলৈ অহা ভাবুকি সন্দৰ্ভত কোনো মন্তব্য প্ৰকাশ কৰিবলৈ অস্বীকাৰ কৰে সিঙে। সংবাদ মাধ্যমৰ আগত হানী সিঙে মাত্ৰ তেওঁৰ কৰ্মচাৰীসকলে গোল্ডি ব্ৰাৰ নামৰ এগৰাকী ব্যক্তিৰ পৰা ভাবুকি ভৰা মন্তব্যৰ এক ফোনকল পোৱা বুলি উল্লেখ কৰে।
তেওঁ লগতে কয় যে এতিয়ালৈকে তেওঁ কেৱল মানুহৰ পৰা মৰমহে লাভ কৰিছে আৰু এইবাৰেই তেওঁক প্ৰথমবাৰৰ বাবে এনে ভাবুকি দিয়া হৈছে। এই ভাবুকিত উদ্বিগ্ন হৈ তেওঁ দিল্লী আৰক্ষীৰ পৰা সুৰক্ষা বিচাৰিছে বুলি জনপ্ৰিয় ৰেপাৰগৰাকীয়ে লগতে মন্তব্য কৰে।
উল্লেখ্য যে, বিগত বৰ্ষৰ ২৯ পঞ্জাৱৰ মানচা জিলাত নিজ বাহনেৰে যাত্ৰা কৰি থকাৰ সময়তে এক অচিনাক্ত আক্ৰমণকাৰীৰ দলে গুলীয়াই হত্যা কৰিছিল সিদ্ধু মুছেৱালাক। এই হত্যাকাণ্ডৰ এদিন পিছতে এক ফেচবুক পোষ্ট যোগে গোল্ডী ব্ৰাৰে আক্ৰমণৰ দায়িত্ব স্বীকাৰ কৰিছিল।