পশ্চিম বংগৰ হুগলী জিলাত এক চাঞ্চল্যকৰ ঘটনা পোহৰলৈ আহিছে। হুগলীৰ বঞ্জাৰা সম্প্ৰদায়ৰ এগৰাকী চাৰি বছৰীয়া কন্যা শিশুক অপহৰণ কৰি যৌন নিৰ্যাতন চলোৱাৰ অভিযোগ উত্থাপন হৈছে। আৰক্ষীয়ে জনোৱা মতে, আইতাকৰ কাষত শুই থকাৰ পৰাই শিশুটিক লৈ যায়।
জানিব পৰা মতে পৰিয়ালটোৱে এটা অস্থায়ী আশ্ৰয় শিবিৰত বাস কৰিছিল। তেওঁলোকৰ ঘৰ ভাঙি পেলোৱাৰ বাবে তেওঁলোকে জালেৰে ঢাকি থোৱা বিচনাৰ তলত থাকিবলৈ বাধ্য হৈছিল। ৰাতিপুৱা প্ৰায় ৪ বজাত আইতাকে সাৰ পাই নাতিনীয়েকক নেদেখি চিন্তিত হয়।
আইতাকৰ ভাষ্য অনুসৰি, “ছোৱালীজনী মোৰ লগত শুই আছিল। কেতিয়া আৰু কোনে লৈ গৈছিল, মই গম নাপালোঁ।” পিছত উলংগ অৱস্থাত উদ্ধাৰ হৈছিল বুলি জানিবলৈ দিয়ে।
দ্য ইণ্ডিয়ান এক্সপ্ৰেছ (The Indian Express) ত প্ৰকাশিত প্ৰতিবেদন অনুসৰি, উদ্ধাৰকাৰীয়ে ভুক্তভোগী ছোৱালীজনীক এটা নলাৰ ওচৰত অচেতন অৱস্থাত পৰি থকা অৱস্থাত উদ্ধাৰ কৰে। শিশুটিৰ গালত কামোৰৰ চিন আৰু শৰীৰত কোনো কাপোৰ নাছিল। ভুক্তভোগী ছোৱালীজনীক প্ৰথমে স্থানীয় চিকিৎসালয়লৈ লৈ যোৱা হয় আৰু তাৰ পিছত উন্নত চিকিৎসাৰ বাবে চন্দননগৰ চিকিৎসালয়লৈ প্ৰেৰণ কৰা হয়।
ইতিমধ্যে আৰক্ষীয়ে যৌন অপৰাধৰ পৰা শিশু সুৰক্ষা (POCSO) আইনৰ অধীনত গোচৰ ৰুজু কৰিছে বুলি জানিব পৰা গৈছে। হুগলী গ্ৰাম্য আৰক্ষীৰ এজন জ্যেষ্ঠ বিষয়াই কয় যে তেওঁলোকে বিষয়টোৰ ওপৰত গুৰুত্বসহকাৰে তদন্ত কৰি আছে।
এই ঘটনাক লৈ ৰাজ্যজুৰি ক্ষোভৰ সৃষ্টি হয়। বিৰোধী দল ভাৰতীয় জনতা পাৰ্টিয়ে (BJP) মমতা বেনাৰ্জী নেতৃত্বাধীন তৃণমূল কংগ্ৰেছ চৰকাৰক দুৰ্বল আইন-শৃংখলাৰ বাবে সমালোচনা কৰে। বিৰোধী দলপতি সুবেন্দু অধিকাৰীয়ে চৰকাৰৰ ভাবমূৰ্তি ৰক্ষাৰ বাবে এই অপৰাধ ঢাকিবলৈ চেষ্টা কৰা বুলিও অভিযোগ উত্থাপন কৰে।
ক্ষোভিত ৰাইজে ভুক্তভোগীক ক্ষিপ্ৰ ন্যায় প্ৰদান কৰাৰ লগতে দুৰ্বল পৰিয়ালটোৰ সুৰক্ষাৰ দাবী জনাইছে। আৰক্ষীয়ে সন্দেহজনক লোকজনক বিচাৰিছে যদিও এতিয়ালৈকে অপৰাধীক ধৰা পেলাব পৰা নাই।
