বিনামূলীয়া চিকিৎসাসেৱাৰ সুবিধা আৰু অভিজ্ঞ চিকিৎসকৰ এটা দলসহ ধুবুৰীত উপস্থিত হৈছে “জীৱনৰেখা এক্সপ্ৰেছ” বা লাইফলাইন এক্সপ্ৰেছ (এল এল ই)।
১১ জানুৱাৰিত ধুবুৰীলৈ যোৱা বিশেষ ট্ৰেইনখন জিলাখনৰ গৌৰীপুৰ ৰেইল ষ্টেইশ্যনত বৰ্তমান খাৰা কৰি থোৱা হৈছে। অহা ১৮ জানুৱাৰিত ইয়াৰ শুভ উদ্বোধন কৰা হ’ব আৰু পৰৱৰ্তী ২১ দিন ধৰি ৰাইজক চিকিৎসা প্ৰদান কৰিব ট্ৰেইনখনত যোৱা অভিজ্ঞ চিকিৎসকৰ দলটোৱে।
সংশ্লিষ্ট বিষয়াই জনোৱা মতে, সম্পূৰ্ণ বিনামূলীয়াকৈ চিকিৎসা দিয়াৰ লগতে বিনামূলীয়াকৈ ঔষধো যোগান ধৰা হ’ব।
চিকিৎসকৰ দলটোত শল্যচিকিৎসকো আছে আৰু চকু, কাণ, দাঁত, ফটা ওঁঠ, পলিঅ’ আৰু কৰ্কট ৰোগৰো চিকিৎসা কৰা হ’ব।
“জীৱনৰেখা এক্সপ্ৰেছ” বা লাইফলাইন এক্সপ্ৰেছ ১৯৯১ চনতে আৰম্ভ কৰা হৈছিল। ই হ’ল বিশ্বৰ ভিতৰতে প্ৰথম চিকিৎসা ৰে’ল। প্ৰধানকৈ প্ৰান্তীয় অঞ্চলবোৰত থকা লোকসকলক চিকিৎসা সেৱা আগ বঢ়োৱাৰ বাবে এয়া আছিল এখন চৰকাৰী আঁচনি। ই ইম্পেক্ট ইণ্ডিয়া ফাউণ্ডেইশ্যন আৰু ভাৰতীয় ৰেইলৱে’ৰ যুটীয়া উদ্যোগত এই আঁচনিখন লোৱা হৈছে।
যিসকল লোকে ইয়াৰ জৰিয়তে বিনামূলীয়াকৈ চিকিৎসা লাভ কৰিব বিচাৰে তেওঁলোকক ধুবুৰী জিলাৰ যুটীয়া স্বাস্থ্য সঞ্চালক বা জিলা প্ৰশাসনৰ সৈতে যোগাযোগ কৰিবলৈ কোৱা হৈছে।
