এনচিইআৰটিৰ নতুন সমাজ বিজ্ঞানৰ পাঠ্যপুথিত অন্তৰ্ভুক্ত কৰা ন্যায়পালিকা সম্পৰ্কীয় এটা অধ্যায়ে দেশজুৰি এক ডাঙৰ বিতৰ্কৰ সৃষ্টি কৰিছে। এই পাঠ্যপুথিত ন্যায়পালিকাত দুৰ্নীতি থকা বুলি কৰা এটা চমু উল্লেখৰ বাবে উচ্চতম ন্যায়ালয় তীব্ৰ ক্ষুণ্ণ হৈ পৰিছে। আদালতৰ মতে, এনেধৰণৰ বিষয়বস্তুৱে কম বয়সীয়া শিক্ষাৰ্থীসকলৰ মনত ন্যায় ব্যৱস্থাৰ প্ৰতি ভুল ধাৰণাৰ সৃষ্টি কৰিব পাৰে। এই গুৰুতৰ বিষয়ক কেন্দ্ৰ কৰি উচ্চতম ন্যায়ালয়ে কেৱল বিতৰ্কিত অংশটো আঁতৰোৱাই নহয়, বৰঞ্চ অষ্টম শ্ৰেণীৰ এই নতুন পাঠ্যপুথিখনৰ প্ৰকাশ আৰু বিতৰণৰ ওপৰত সম্পূৰ্ণ নিষেধাজ্ঞা জাৰি কৰিছে।
নতুন ৰাষ্ট্ৰীয় শিক্ষা নীতিৰ আধাৰত প্ৰস্তুত কৰা এই পাঠ্যপুথিখনত ন্যায়পালিকাক এনেদৰে উপস্থাপন কৰা হৈছে যিয়ে উচ্চতম ন্যায়ালয়ৰ মৰ্যাদাত আঘাত হানিছে। বিশেষকৈ ১৩-১৪ বছৰীয়া কিশোৰ-কিশোৰীসকলক ন্যায়পালিকাৰ সৈতে পৰিচয় কৰাই দিওঁতে এই প্ৰতিষ্ঠানটো দুৰ্নীতিৰে ভৰা আৰু বৃহৎ সংখ্যক গোচৰৰ বোজা কঢ়িয়াই থকা এক ব্যৱস্থা বুলি দেখুওৱা হৈছে। এই কথাত অসন্তুষ্টি প্ৰকাশ কৰি উচ্চতম ন্যায়ালয়ে স্পষ্ট কৰি দিছে যে শিক্ষাৰ দৰে সংবেদনশীল ক্ষেত্ৰত এনে অপৈণত মন্তব্য গ্ৰহণযোগ্য নহয়। আদালতৰ কঠোৰ স্থিতি দেখি এনচিইআৰটি কৰ্তৃপক্ষইও তৎক্ষণাত ব্যৱস্থা গ্ৰহণ কৰিছে আৰু বজাৰৰ পৰা নতুনকৈ মুকলি কৰা এই কিতাপখন প্ৰত্যাহাৰ কৰাৰ লগতে ইয়াৰ বিক্ৰী বন্ধ কৰি দিছে।
অৱশ্যে উচ্চতম ন্যায়ালয়ে এই সমগ্ৰ ঘটনাক অতি গুৰুত্বসহকাৰে লৈ নিজে পদক্ষেপ গ্ৰহণ কৰি এক ছুঅ’ মোটু গোচৰ ৰুজু কৰিছে। আদালতৰ মতে, ই এক গভীৰ শিপাই থকা ষড়যন্ত্ৰৰ অংশ হ’ব পাৰে যিয়ে দেশৰ অন্যতম স্তম্ভ ন্যায়পালিকাক জনসাধাৰণৰ চকুৰ পৰা নমাই আনিব বিচাৰিছে। এই সন্দৰ্ভত কেৱল এনচিইআৰটিয়েই নহয়, বৰঞ্চ শিক্ষা মন্ত্ৰালয়ৰ সচিব আৰু এনচিইআৰটিৰ সঞ্চালকলৈও কাৰণ দেখুৱাই জাননী জাৰি কৰা হৈছে। তেওঁলোকে কেনেকৈ আৰু কি পৰিস্থিতিত এনেধৰণৰ নেতিবাচক কথা পাঠ্যপুথিত অন্তৰ্ভুক্ত হ’বলৈ দিলে, সেই বিষয়ে উত্তৰ দিবলৈ আদালতে নিৰ্দেশ দিছে।
এই বিতৰ্কৰ আৰম্ভণি হৈছিল যোৱা ২৪ ফেব্ৰুৱাৰীত প্ৰকাশ পোৱা সমাজ বিজ্ঞানৰ পাঠ্যপুথিখনৰ আমাৰ সমাজত ন্যায়পালিকাৰ ভূমিকা নামৰ অধ্যায়টোৰ পৰা। এই অধ্যায়টোত ভাৰতীয় আদালতসমূহত থকা দুৰ্নীতিৰ অভিযোগ, লাখ লাখ অমীমাংসিত গোচৰ আৰু ন্যায়াধীশৰ নাটনিৰ দৰে জটিল সমস্যাবোৰ অতি সহজভাৱে উল্লেখ কৰা হৈছিল। জ্যেষ্ঠ অধিবক্তা কপিল ছিবালে এই বিষয়টি উচ্চতম ন্যায়ালয়ৰ দৃষ্টিগোচৰ কৰাৰ লগে লগে পৰিস্থিতি উত্তপ্ত হৈ পৰে। মুখ্য ন্যায়াধীশ সূৰ্য্য কান্তে এই ক্ষেত্ৰত অত্যন্ত কঠোৰ হৈ কয় যে ন্যায়পালিকাৰ দৰে এক সন্মানীয় প্ৰতিষ্ঠানক বদনাম কৰিবলৈ কাকো সুবিধা দিয়া নহ’ব।
বৰ্তমান এই নিৰ্দেশৰ পাছতে সমগ্ৰ দেশতে এনচিইআৰটিৰ কিতাপ বিতৰণ প্ৰক্ৰিয়া স্তব্ধ হৈ পৰিছে। আদালতৰ এই নিষেধাজ্ঞাই শিক্ষা বিভাগত এক খলকনিৰ সৃষ্টি কৰিছে। পৰৱৰ্তী সময়ত এই পাঠ্যপুথিখন কিদৰে সংশোধন কৰা হ’ব বা আদালতৰ জাননীৰ উত্তৰত শিক্ষা বিভাগে কি কয়, সেয়া হ’ব আটাইতকৈ গুৰুত্বপূৰ্ণ বিষয়। শিক্ষাৰ্থীৰ মনত সঠিক জ্ঞান দিয়াৰ পৰিৱৰ্তে বিতৰ্কিত বিষয় জাপি দিয়াৰ এই প্ৰচেষ্টাই এতিয়া এক আইনী যুঁজৰ ৰূপ লৈছে।
