গুজৰাটৰ কাৰাগাৰত থাকিও লৰেন্স বিস্নয়ে কেনেকৈ হত্যাৰ পৰিকল্পনা কৰিলে বাবা ছিদ্দিকিক? কোনো নাছিল নেকি এই দুধৰ্ষ ডনক বাধা দিবলৈ! দেশৰ গৃহমন্ত্ৰী অমিত শ্বাহ নিমাত কিয়? কিয় নিমাত প্ৰধান মন্ত্ৰী নৰেন্দ্ৰ মোদী?
প্ৰশ্ন হৈছে, গুজৰাটৰ সবৰমতী জেইলত কাৰাৰুদ্ধ হৈ থকাৰ পাছতো কেনেকৈ শ্বুটাৰৰে সম্পৰ্ক বৰ্তাই ৰাখিছে লৰেন্স বিস্নয়ে? ২১ বছৰীয়া জিচান আখতাৰৰে সম্পৰ্ক ৰাখিছিল NCP ৰ নেতা তথা প্ৰাক্তন মন্ত্ৰী বাবা ছিদ্দিকিৰ হত্যাত অভিযুক্ত তিনি দুৰ্বৃত্তই। এইগৰাকী জলন্ধৰৰ নিবাসী জিচান আখতাৰ পাতিয়ালা কাৰাগাৰত থাঁকোতেই ২০২২ চনত সম্পৰ্কলৈ আহিছিল লৰেন্স বিস্নয়ৰ গেঙৰ। আৰু তেওঁৰ ডাইৰেকচনতে ছিদ্দিকিক হত্যা কৰিছিল তিনি অভিযুক্তই।
প্ৰকাশিত খবৰ অনুসৰি হত্যাকাণ্ডটো হোৱাৰ দিনটোত বাবা ছিদ্দিকি ক’ত ক’ত গৈছিল তাৰ লোকেশ্বনো তিনি হত্যাকাৰীক দি আছিল জিচান আখতাৰে। এই তিনি অভিযুক্তৰ ভিতৰত ক্ৰমে হাৰিয়ানাৰ কেথল জিলাৰ গুৰমেল সিঙ আৰু আনজন উত্তৰ প্ৰদেশৰ ধৰ্মৰাজক গ্ৰেপ্তাৰ কৰিছে আৰক্ষীয়ে। হত্যাত অভিযুক্ত শিৱকুমাৰ বৰ্তমানো পলাতক।
চলমান খানৰ লগত সম্পৰ্ক থকা প্ৰতিগৰাকীকেই টাৰ্গেটত লৈছে লৰেন্স বিস্নয় গেঙে!
বলীউডৰ ছুপাৰষ্টাৰ চলমানৰ লগত সু-সম্পৰ্ক ৰক্ষা কৰাৰ বাবেই লৰেন্স গেঙৰ টাৰ্গেট হ’ল নেকি বাবা ছিদ্দিকি? তেনে প্ৰেক্ষাপটত দেশৰ গৃহমন্ত্ৰী অমিত শ্বাহৰ মৌনতা অতিকৈ ৰহস্যজনক! কেনেকৈ অমিত শ্বাহৰ গৃহৰাজ্য গুজৰাটৰ জেইলৰ ভিতৰত থাকিয়ে লৰেন্স বিস্নয়ে শ্বুটাৰ গেঙৰে সম্পৰ্ক স্থাপন কৰি চলাইছে হত্যাকাণ্ড?
প্ৰকাশিত খবৰ অনুসৰি চলিত বৰ্ষৰ ৭ জুনত পঞ্জাৱৰ পাতিয়ালা কাৰাগাৰৰ পৰা মুকলি হৈ জিচান আখতাৰ গৈছিল হাৰিয়ানাৰ কেথল জিলাত থকা অভিযুক্ত গুৰমেলৰ ওচৰলৈ। তাৰ পাছতেই শ্বুটাৰ গুৰমেল পোনে পোনে ৰাওনা হৈছিল মুম্বাইলৈ। আটাইকেইটা হত্যাকাৰী মুম্বাইৰ হোটেলত একেলগে আছিল।
ইপিনে, মুম্বাই আৰক্ষীয়ে সংবাদ মাধ্যমক জনোৱা অনুসৰি হত্যাকাণ্ড সংঘটিত হোৱাৰ পূৰ্বলৈকে মুম্বাইতে আছিল জিচানৰ ফোন লোকেশ্ব্যন। হত্যাকাণ্ড সংঘটিত হোৱাৰ পাছত মুম্বাই আৰু তাৰ আশে পাশে পোৱা গৈছিল জিচানৰ মোবাইল লোকেশ্বন। ছিদ্দিকক গুলিয়াই হত্যা কৰাৰ সময়তো ছিদ্দিক ক’ত আছিল শ্বুটাৰক জনাইছিল জিচান আখতাৰে। গুজৰাট কাৰাগাৰত আবদ্ধ থাঁকোতেই এইজন গেঙষ্টাৰ লৰেন্স বিস্নয়ে টাৰ্গেট কৰি শ্বুটাৰৰ সহায়ত হত্যা কৰিছিল সংগীত শিল্পী সিদ্ধু মুছেৱালাক। কেইমাহমান পূৰ্বে চলমান খানৰ গেলেক্সি এপাৰ্টমেন্টতো গেঙষ্টাৰ লৰেন্স বিস্নয় গেঙৰ দুই সদস্যই গুলি কৰি ৱাল ফুটাই থৈ গৈছিল।
এতিয়া প্ৰশ্ন হয়, কাৰ সাহসত বলিয়ান হৈ কাৰাগাৰত থাকিয়ে এটাৰ পাছত আন এটা হত্যাকাণ্ড সংঘটিত কৰি গৈ আছে লৰেন্স বিস্নয়ৰ গেঙে? কাৰাগাৰত থাকিয়ে কেনেকৈ ৭০০তকৈয়ো অধিক শ্বুটাৰ পুহি ৰাখিছে লৰেন্স বিস্নয়ে?
কেনেকৈ কানাডা, জাৰ্মানীতো আন্তঃৰাষ্ট্ৰীয় যোগাযোগ বা সংযোগ স্থাপন কৰিব পাৰিলে লৰেন্স গেঙে? ইয়াৰ পাছতো এই গেঙৰ কোনেও একো ক্ষতি কৰিব পৰা নাই সেয়া বৰ্তমানো সন্দেহৰ আৱৰ্তত। কিয় ২০২৩ চনৰ এপ্ৰিল মাহত তিহাৰ জেইলত কাৰাৰুদ্ধ লৰেন্স বিস্নয়ক গুজৰাটৰ সবৰমতী জেইললৈ লৈ যোৱা হ’ল সেয়াও সন্দেহৰ আৱৰ্তত সোমাই পৰিছে। কিয়নো সবৰমতী জেইলৰ পৰাই ফোন, ভিডিঅ’ কলিঙৰ জৰিয়তে লৰেন্স বিসন্য়ে তেওঁৰ গেঙ পৰিচালনা কৰাৰ লগতে কেইবাটাও হত্যাকাণ্ড সংঘটিত কৰিছে। সেয়েহে গুজৰাট চৰকাৰৰ গৃহবিভাগৰ ভূমিকাক লৈয়ো এতিয়া প্ৰশ্ন উত্থাপিত হৈছে।
এই সন্দৰ্ভত NCP নেত্ৰী প্ৰিয়ংকা চতুৰ্বেদীয়ে এক্সযোগে লিখি কয় গুজৰাটৰ সাবৰমতী কাৰাগাৰত আৱদ্ধ হৈ থকা এজন লোকে মুম্বাইত ভাবুকি দি ঠিকাভিত্তিকভাৱে হত্যাৰ কাম অব্যাহত ৰাখিছে। পূৰ্বতে আমাৰ মুম্বাই আৰক্ষী কেতিয়াও ইমান অসহায় আৰু দন্তহীন নাছিল।
নিশ্চয়কৈ, কাৰাগাৰত আৱদ্ধ থকাৰ পাছতো কেনেকৈ লৰেন্স বিস্নয়ে ইমান বৃহৎ নেটৱৰ্ক চলাই আছে বা সেইবোৰ দেখি শুনিও কিয় অমিত শ্বাহ নেতৃত্বাধীন কেন্দ্ৰৰ গৃহবিভাগে চকু মুদা কুলিৰ ভাৱত অৱতীৰ্ণ হৈছে সেয়াও ৰহস্যৰ আৱৰ্তত সোমাই পৰিছে।
