আমি সাধাৰণতে ভাবো যে বয়স বঢ়াৰ লগে লগে আমাৰ সৌন্দৰ্য্য ম্লান হৈ পৰে। যৌৱনকালত হৃদয়ত যি কোমল আৰু উন্মাদ অনুভূতি থাকে, সেয়াও হেৰাই যায়। বয়স বৃদ্ধিৰ লগে লগে মুখমণ্ডলত বাৰ্ধক্যৰ ছাপ পৰে। তদুপৰি বহু লোকৰ ক্ষেত্ৰত অকালতে বাৰ্ধক্য আহে।
যদিও বয়সৰ লগে লগে যৌৱন টুটি অহা আৰু বাৰ্ধক্যৰ ফালে গতি কৰাতো এক স্বাভাৱিক তথা প্ৰাকৃতিক নিয়ম, তথাপি বিভিন্ন কৌশল আৰু নীতি-নিয়মৰ দ্বাৰা দীৰ্ঘ সময়লৈকে যৌৱন ধৰি ৰাখিব পাৰি। ইয়াৰ লগতে শৰীৰ আৰু মনটোক সুস্থ কৰি ৰাখিব পাৰি।
দীৰ্ঘ সময়লৈকে যৌৱনটো ধৰি ৰাখিব পাৰিলে জীৱনৰ সুখ-স্বাচ্ছন্দ্য বৰ্তি থাকে। অকালতে বাৰ্ধ্যক বা ৰোগৰ বলি হ’বলগীয়া হ’লে জীৱন নৰকসৰ্দৃশ হয়। জীয়াই থকাত কোনো আনন্দ নাথাকে। গতিকে দীৰ্ঘসময়লৈকে যৌৱন ধৰি ৰখাটো সকলোৰে বাবে এক গুৰুত্বপূৰ্ণ বিষয়।
বাৰ্ধক্য ৰোধ কৰিবলৈ কি কৰিব লাগে?
সময়ৰ লগে লগে আমাৰ কপালত বলিৰেখা পৰিবলৈ ধৰে। মুখত বলিৰেখাৰ ছাপ পৰে। পৰিৱৰ্তিত জলবায়ু, অতিৰিক্ত প্ৰদূষণে আমাৰ ছালখন ক্ষতিগ্ৰস্ত কৰে।
কিছু বছৰ আগলৈকে অকাল বাৰ্ধক্যৰ সমস্যা বৰকৈ দেখা পোৱা নগৈছিল। কিন্তু আজিকালি প্ৰদূষণ, খাদ্যাভাস আৰু জীৱনশৈলীৰ বাবে মানুহ অকালতে বুঢ়া হ’বলৈ ধৰিছে।
উল্লেখ্য যে যৌৱন কেৱল যৌৱনেই নহয়। বয়স মাথোঁ এটা সংখ্যা। মনৰ সজীৱতা এটা ডাঙৰ বস্তু। নব্বৈৰ দশকৰ বহু নায়িকাই এতিয়াও নিজৰ সৌন্দৰ্য্য ধৰি ৰাখিছে। তেওঁলোকৰ বহুতে এতিয়াও যৌৱনকালীন ৰূপ-লাৱণ্য আৰু মানসিকতাৰে বহু লোকৰ হৃদয় জয় কৰি আছে। আজিও নিজৰ ৰূপৰ প্ৰাণৱন্ততাৰে হাজাৰ হাজাৰ যুৱকৰ টোপনি কাঢ়ি নিয়ে নব্বৈ দশকৰ কিছুমান নায়িকাই।
যৌৱন ধৰি ৰখাৰ এক উজ্জ্বল নিদৰ্শন হৈছে নব্বৈৰ দশকৰ জনপ্ৰিয় নায়িকা ৰেখা। সত্তৰ বছৰৰ ওচৰ চাপিলেও তেওঁ যৌৱন বজাই ৰাখিছে। মুখত কোনো বলিৰেখা নাই ৰেখাৰ। বিভিন্ন অনুষ্ঠানত ৰেখাৰ সাজ-পোছাক চাই কোনোৱেই তেওঁক সত্তৰৰ দশকৰ মহিলা বুলি নাভাবে।
কিন্তু সত্তৰ বছৰ বয়সতো যৌৱন ধৰি ৰখাটো কেনেকৈ সম্ভৱ? ইয়াৰ আঁৰৰ কাৰণ কি? কিছুমান নিয়ম যুৱক-যুৱতীসকলে দীৰ্ঘদিন ধৰি মানি চলিব লাগিব। আহকচোন কিছুমান অভ্যাসৰ বিষয়ে জানো যিবোৰে আপোনাক দীৰ্ঘদিনলৈ ডেকা কৰি ৰাখিব-
১. পানীযুক্ত ফল বেছিকৈ খাব লাগে। আঙুৰ, তৰমুজ, মধুৰীআম আদি ফলমূল নিয়মীয়াকৈ খাব।
২. সদায় মন খুলি হাঁহিব। মনটো ভাল থাকিলে শৰীৰত সহজে বয়সৰ চাপ নপৰে।
৩. খাদ্যত সেউজীয়া আৰু ৰঙা খাদ্য ৰাখিব লাগে। এই খাদ্যসমূহত থকা ভিটামিন চি আৰু কেয়ে শৰীৰক সুস্থ কৰি ৰাখে। বিলাহী, কেপচিকাম, ব্ৰকলিকে ধৰি বিভিন্ন সেউজীয়া আৰু শাক-পাচলি খাব।
৪. খাদ্য তালিকাত তেলীয়া মাছ অন্তৰ্ভুক্ত কৰক। সপ্তাহত দুদিন তিনিদিন তেলীয়া মাছ খাব লাগে।
৫. বলিৰেখামুক্ত ছাল আৰু সুস্থ শৰীৰৰ বাবে পৰ্যাপ্ত পৰিমাণৰ পানী খাব লাগে। পানীয়ে শৰীৰৰ পৰা ক্ষতিকাৰক উপাদানসমূহ আঁতৰাই শৰীৰক সুস্থ কৰি ৰাখে।
৬. চেনিযুক্ত খাদ্য কমাই খাওক। অত্যধিক নিমখ সেৱন নকৰিব।
৭. প্ৰটিন সমৃদ্ধ খাদ্য খাওক। পৰ্যাপ্ত পৰিমাণৰ প্ৰ’টিনে কোষবোৰক দীৰ্ঘদিনলৈ সৰু কৰি ৰাখিব পাৰে।
৮. মানসিক চাপমুক্ত হৈ থাকিবলৈ চেষ্টা কৰক। অপ্ৰয়োজনীয় উদ্বেগে আপোনাৰ শৰীৰত বয়সৰ ছাপ সোনকালে পেলাব পাৰে।
৯. অচল জীৱন এৰি শাৰীৰিক পৰিশ্ৰম কৰক। শাৰীৰিক ক্ৰিয়া-কলাপে শৰীৰত ৰক্ত সঞ্চালন বৃদ্ধি কৰে আৰু শৰীৰত সঠিক পৰিমাণৰ অক্সিজেন যোগান ধৰে, যিয়ে কোষবোৰ সতেজ কৰি ৰখাত সহায় কৰে। সুস্থ হৈ থাকিবলৈ আৰু ডেকা হৈ থাকিবলৈ কঠোৰ পৰিশ্ৰম কৰক।
১০. অধিক তেল আৰু মছলাযুক্ত খাদ্য খাব নালাগে। ভজা খাদ্য, ফাষ্ট ফুডক একেবাৰেই খাব নালাগে। খাদ্য কম তেল আৰু মছলা দি খাব লাগে।
লগতে যৌৱন হৈ থাকিবলৈ আন কিছুমান অভ্যাস গঢ়ি তুলিব লাগিব। আপোনাৰ নিজৰ অভ্যাসে অকাল বাৰ্ধক্যক আঁতৰাই ৰাখিব পাৰে! এই অকাল বয়স বৃদ্ধিৰ পৰা হাত সাৰিবলৈ কি কৰিব লাগে জানি লওক:
টোপনি
টোপনিৰ অভাৱে ছালৰ স্বাস্থ্য বেয়া কৰে। টোপনিৰ সময়ত ছালৰ ৰক্ত সঞ্চালন বৃদ্ধি পায়, যাৰ ফলত ছালখন বলিৰেখাৰ পৰা ৰক্ষা পৰে। গতিকে বিশেষজ্ঞসকলে প্ৰতিদিনে ৭-৯ ঘণ্টা শুবলৈ পৰামৰ্শ দিয়ে। তেওঁলোকৰ মতে কম টোপনিয়ে মানসিক চাপ আৰু উদ্বেগ বৃদ্ধি কৰে। ফলত দেহত বাৰ্ধক্যই সোনকালে দেখা দিয়ে।
ৰ’দ
ৰ’দে আমাৰ ছালখনক সোনকালে বয়সীয়াল কৰি তুলিব পাৰে। গতিকে, ৰ’দত ওলাই গ’লে ছাতি, টুপী, ক’লা চশমা লগত ৰাখিব। অৱশ্যেই ছানস্ক্ৰীণ লোচন লগাবলৈ নাপাহৰিব। ডাৱৰীয়া দিনতো ৰ’দ পৰিলে ছানস্ক্ৰীণ লগাবলৈ নাপাহৰিব।
ছাল আৰ্দ্ৰ কৰি ৰাখক
এটা নিৰ্দিষ্ট বয়সৰ পিছত দৈনিক ছালখন মইশ্ব’ৰাইজ কৰাটো গুৰুত্বপূৰ্ণ। কাৰণ মুখত মইশ্ব’ৰাইজাৰ লগালে ছালখন বহুত বেছি আৰ্দ্ৰ আৰু সতেজ হয়। বলিৰেখাৰ সমস্যাও কমি যায়। কিন্তু মইশ্ব’ৰাইজাৰ কিনাৰ আগতে ইয়াত ভিটামিন চি বা ভিটামিন এ আছে নে নাই পৰীক্ষা কৰিব।
পুষ্টিকৰ খাদ্য
প্ৰতিদিনে খাদ্যত অধিক পৰিমাণে এন্টিঅক্সিডেন্ট থকা খাদ্য অন্তৰ্ভুক্ত কৰক। কাৰণ এন্টি-অক্সিডেন্ট সমৃদ্ধ খাদ্যই ছালখন কোমল কৰি তোলে আৰু অকাল বাৰ্ধক্য সহজে ৰোধ কৰে। খাদ্যত জলকীয়া, ব্ৰকলি, বিলাহী আৰু সেউজীয়া শাক-পাচলি অন্তৰ্ভুক্ত কৰক। আৰু প্ৰতিদিনে অন্ততঃ যিকোনো ফল যেনে কুঁহিয়াৰ, ব্লুবেৰী, এভোকেডো খাব। দিনটোত এবাৰ হ’লেও গ্ৰীণ টি খাব পাৰে।
মেক আপ
আজিকালি আমি সকলোৱে বাহিৰলৈ ওলাই গ’লে মুখত লঘু প্ৰসাধন সামগ্ৰী প্ৰয়োগ নকৰো। এই কৃত্ৰিম প্ৰসাধন সামগ্ৰীয়ে আমাৰ ছালৰ বহু ক্ষতি কৰে। গতিকে বাহিৰৰ পৰা আহি ভালকৈ মুখখন ধুব।
প্ৰাকৃতিক পদ্ধতিৰে
প্ৰাকৃতিক উপায়েৰে ছালৰ যত্ন লোৱাটো কৃত্ৰিম উপায়তকৈ স্বাস্থ্যকৰ। সপ্তাহত দুবাৰকৈ প্ৰাকৃতিক উপাদান ফেচ পেক ব্যৱহাৰ কৰক। ছালৰ প্ৰকাৰ অনুসৰি মৌ, এলোভেৰা, বেচন, চন্দন, কল, টেঙা দৈ, মুলতানি মাটি, মচুৰ দাইল আদি বাছি ল’ব পাৰে। লগতে মৰ্নিং ৱাক, চাইকেল চলোৱা বা দৈনিক কিছু ব্যায়াম কৰক। প্ৰতিদিনে কিছু সময় ছালখন মালিচ কৰিব লাগে।
ছালৰ বলিৰেখা আঁতৰাই যৌৱন ধৰি ৰখাৰ বাবে কিছুমান ঘৰুৱা উপায় জানো আহক :
১. হালধীত প্ৰাকৃতিক এন্টি-অক্সিডেন্ট আৰু এন্টি-ইনফ্লেমেটৰী গুণ আছে। মুখত হালধীৰ ৰসেৰে তৈয়াৰী ফেচ পেক ব্যৱহাৰ কৰিলে ছালৰ বলিৰেখা আঁতৰ হয়।
২. দৈনিক নাৰিকল তেল ছালত মালিচ কৰিলেও ছালত বলিৰেখা নাথাকে। ইয়াত প্ৰচুৰ পৰিমাণে এন্টি অক্সিডেন্ট থাকে। ইয়াৰ উপৰিও ইয়াৰ এন্টি এজিং গুণ আছে, যিয়ে ছালৰ বলিৰেখা ৰোধ কৰে।
৩. দুচামুচ এলোভেৰা জেল আৰু এটা কণীৰ কুহুম একেলগে মিহলাই পেষ্ট বনাওক। কপালৰ বলিৰেখাত এই পেক ব্যৱহাৰ কৰক। ইচ্ছা কৰিলে এই পেকটো গোটেই মুখখনতে ব্যৱহাৰ কৰিব পাৰে। ১০-১৫ মিনিটৰ পিছত কুহুমীয়া পানীৰে মুখখন ধুব। এই পেকটো সপ্তাহত দুবাৰৰ পৰা তিনিবাৰ ব্যৱহাৰ কৰক। এলোভেৰা জেল আৰু কণীৰ কুহুম ভিটামিন ইৰ ভাল উৎস। ছালৰ বাবে ভিটামিন ই বহু প্ৰয়োজন। এলোভেৰা জেলত থকা মেলিক এচিডে ছালৰ বলিৰেখা কমোৱাত সহায় কৰে। কণীৰ কুহুমত থকা এলবুমিনে ছালখন কোমল কৰি ৰাখে।
