বিবাহিত প্ৰেমিকে গোপন ফ’টো ভাইৰেল কৰাৰ পাছতে এগৰাকী হাইস্কুলীয়া ছাত্ৰীয়ে আত্মননৰ পথ বাছি লৈছে। বিজয়া দশমীৰ উপলক্ষ্যে দেৱী বিসৰ্জন কৰি আহি মংগলবাৰে নিশা ছাত্ৰীগৰাকীয়ে ডিঙিত চিপ লৈ আত্মহত্যা কৰে।
এই ঘটনাটো সংঘটিত হৈছে চুবুৰীয়া ৰাজ্য পশ্চিমবংগৰ উত্তৰ দিনাজপুৰত। প্ৰকাশিত খবৰ মতে, বুধবাৰে পুৱা উত্তৰ দিনাজপুৰৰ ৰায়গঞ্জ ভট্টাদিঘী গাঁৱৰ ছাত্ৰী গৰাকীয়ে আপত্তিজনক ফ’টো সামাজিক মাধ্যমত ভাইৰেল হোৱাৰ পাছতে আত্মহত্যা কৰে।
মৃত ছাত্ৰীগৰাকীৰ পৰিয়ালে দাবী কৰা মতে ছাত্ৰীগৰাকীৰ পেচাত অটো চালক ২২ বছৰীয়া আকাশ বৰ্মন নামৰ যুৱকজনৰ সৈতে প্ৰেমৰ সম্পৰ্ক আছিল। ছাত্ৰীগৰাকীয়ে প্ৰেমিক আকাশ বৰ্মন বিবাহিত বুলি জানিব পাৰি প্ৰেমৰ সম্পৰ্কটোৰ পৰা ওলাই আহিবলৈ বিচাৰে।
এই কথাত ক্ষুব্ধ হৈ প্ৰেমিক আকাশ বৰ্মনে প্ৰেমিকাক বিভিন্ন ভয়-ভাবুকি প্ৰদান কৰি আহি অৱশেষত আপত্তিজনক ফ’টো সামাজিক মাধ্যমত ভাইৰেল কৰি দিয়ে। এই ঘটনাত মানসিকভাৱে ভাঙি পৰি ছাত্ৰীগৰাকীয়ে আত্মহত্যাৰ পথ বাছি লয়।
ইফালে ঘটনা সন্দৰ্ভত ছাত্ৰীগৰাকীৰ পৰিয়ালে অভিযুক্ত যুৱক আকাশ বৰ্মনৰ বিৰুদ্ধে ৰায়গঞ্জ আৰক্ষী থানাত গোচৰ দাখিল কৰিছে। আৰক্ষীয়ে আপত্তিজনক ফ’টো ভাইৰেল, প্ৰতাৰণা আৰু আত্মহত্যাৰ বাবে পৰোচনা কৰা আদি ধাৰাত গোচৰ ৰুজু কৰি তদন্ত অব্যাহত ৰাখিলেও অভিযুক্ত প্ৰেমিক আকাশ বৰ্মন বৰ্তমানো পলাতক বুলি আৰক্ষীয়ে প্ৰকাশ কৰিছে। অৱশ্যে অভিযুক্ত যুৱকজনৰ সন্ধান আৰক্ষীয়ে অভিযান অব্যাহত ৰাখিছে বুলি সদৰী কৰিছে।
আনহাতে, একমাত্ৰ কন্যাৰ ওলমি থকা মৃতদেহ প্ৰত্যক্ষ কৰাৰ লগে লগে ছাত্ৰীগৰাকীৰ পিতৃ অচেতন হৈ পৰে আৰু তেওঁক চিকিৎসালয়ত ভৰ্তি কৰোৱালগীয়া হয়।
