ৰাজ্যত কৰোনা ভাইৰাছৰ সংক্ৰমণ বৃদ্ধি পোৱাৰ পৰিপ্ৰেক্ষিতত উচ্চতৰ মাধ্যমিকৰ প্ৰথম বাৰ্ষিকৰ চূড়ান্ত পৰীক্ষা স্থগিত কৰা হৈছে।
অসম উচ্চতৰ মাধ্যমিক শিক্ষা সংসদৰ পৰীক্ষা নিয়ন্ত্ৰক পংকজ বৰঠাকুৰে এক বিজ্ঞপ্তি যোগে এই কথা প্ৰকাশ কৰিছে।
বিজ্ঞপ্তিখনত কোৱা হয় হৈছে যে ২৮ এপ্ৰিলত অনুষ্ঠিত সংসদৰ পৰিষদীয় বৈঠকত কোভিড১৯ মহামাৰীৰ পৰিপ্ৰেক্ষিতত উচ্চতৰ মাধ্যমিকৰ প্ৰথম বাৰ্ষিকৰ পৰীক্ষা পৰৱৰ্তী জাননী প্ৰকাশ নকৰা পৰ্যন্ত স্থগিত কৰা হৈছে।
উল্লেখ্য অসম উচ্চতৰ মাধ্যমিক শিক্ষা সংসদৰ অন্তৰ্গত উচ্চতৰ মাধ্যমিকৰ প্ৰথম বাৰ্ষিকৰ চূড়ান্ত পৰীক্ষা অহা ৪ এপ্ৰিলৰ পৰা আৰম্ভ হোৱাৰ কথা আছিল।
আনহাতে উচ্চতৰ মাধ্যমিক চূড়ান্ত পৰীক্ষাৰ অনুষ্ঠিত কৰাৰ সন্দৰ্ভত বিভাগীয়ভাৱে কোনো বিবৃতি প্ৰকাশ কৰা নাই সংসদে।
কোনো বিবৃতি প্ৰকাশ কৰা নাই যদিও সংসদৰ অধ্যক্ষ ডঃ দয়ানন্দ বৰগোহাঁইয়ে মে’ মাহৰ প্ৰথম সপ্তাহত উচ্চতৰ মাধ্যমিকৰ চূড়ান্ত পৰীক্ষা অনুষ্ঠিত কৰাৰ সন্দৰ্ভত বৈঠক অনুষ্ঠিত কৰা হ’ব বুলি সংবাদ মাধ্যমৰ আগত সদৰী কৰে।
উক্ত বৈঠকতে উচ্চতৰ মাধ্যমিকৰ চূড়ান্ত পৰীক্ষা অনুষ্ঠিত কৰা হ’ব নহয় সেই সিদ্ধান্ত গ্ৰহণ কৰা হ’ব বুলিও মন্তব্য কৰে ডঃ বৰগোহাঁইয়ে।
স্মৰ্তব্য যে অহা ১১ মে’ৰ পৰা ১৪ জুনলৈ উচ্চতৰ মাধ্যমিকৰ চূড়ান্ত পৰীক্ষা অনুষ্ঠিত হোৱাৰ কথা।
উল্লেখ্য যে ৰাজ্যত কৰোনাৰ সংক্ৰমণ ক্ৰমাৎ বৃদ্ধি পোৱা দেখা গৈছে। যোৱা ২৪ ঘণ্টাত ৰাজ্যত ৩,০৪৫ গৰাকী লোক কৰোনাত আক্ৰান্ত হোৱাৰ বিপৰীতে ২২ গৰাকী কৰোনাক্ৰান্তৰ মৃত্যু হৈছে।
