ভাৰতীয় চোৰাংচোৱা বাহিনীৰ তথ্য অনুসৰি অসম ৰাইফলছৰ এ এল এফ এ চি অ’ ৱাই-৩৭ নং বেটেলিয়ানে বুধবাৰে কাছাৰৰ চইছেলপুঞ্জীৰ পৰা অভিযান চলাই বৃহৎ পৰিমাণৰ সজীব গুলী উদ্ধাৰ কৰিবলৈ সক্ষম হয়।
অসম ৰাইফলছৰ এ এল এফ এ চি অ’ ৱাই-৩৭ নং বেটেলিয়ানৰ মেজৰ পাৰবিনৰ নেতৃত্বত যোৱা অভিযানকাৰী দলটোৱে কাছাৰৰ জিৰিঘাট থানাৰ অন্তৰ্গত চাইছেলপুঞ্জীৰ এটা পৰিত্যাক্ত ঘৰৰ পৰা সজীব গুলীখিনি উদ্ধাৰ কৰিবলৈ সক্ষম হয়।
অভিযানকাৰী দলটোৱে উল্লেখ কৰা অনুসৰি কোনো উগ্ৰপন্থী সংগঠনে গুলীসমূহ এনেদৰে ঘৰটোৰ ভিতৰত লুকুৱাই ৰখাৰ সন্দেহ প্ৰকাশ কৰা হৈছে।
উদ্ধাৰ হোৱা মুঠ ৫১৮ টা গুলীসমূহৰ ভিতৰত ৯.৯৬ এম এম বন্দুকৰ ৪৬৩ টা গুলী, ৫.৫৬ এম এম ৰাইফলৰ ৫৫ টা গুলী বুলি সেনাবাহিনীৰ সূত্ৰৰ পৰা জানিব পৰা গৈছে।
উল্লেখযোগ্য যে, কাছাৰৰ বিভিন্ন অঞ্চলত বিগত কিছুদিনৰ পৰা উগ্ৰপন্থী সংগঠনৰ দ্বাৰা সংঘটিত উগ্ৰবাদমূলক কাৰ্য্যকলাপ বৃদ্ধি পোৱা পৰিলক্ষিত হৈছে। কিছুদিন পুৰ্বে এইচ পি চি (পি)ৰ এজন উগ্ৰপন্থীক অসম আৰক্ষী আৰু অসম ৰাইফলছৰ যুতীয়া অভিযানত আটক কৰা হৈছিল।
কাছাৰত পৰিত্যাক্ত ঘৰটোত বৃহৎ পৰিমানৰ সজীৱ গুলী উদ্ধাৰ হোৱাৰ পাছত অঞ্চলটোৰ স্থানীয় ৰাইজৰ মাজত চাঞ্চল্যৰ সৃষ্টি হয়।
