শোণিতপুৰ জিলাৰ কলিয়াভোমোৰা দলঙৰ সমীপত শুকুৰবাৰে সন্ধিয়া বৰঘাট আৰক্ষী চকীৰ ভাৰপ্ৰাপ্ত বিষয়া দীপজ্যোতি ভৰালীৰ নেতৃত্বত এক বৃহৎ পৰিমানৰ ৬,৭২,৮৩০ টকা নগদ ধন জব্দ কৰা হয়।
দেওবাৰে চৰকাৰী সূত্ৰই জানিব দিয়া মতে নিৰ্বাচনৰ সময়ছোৱাত নগদ ধন, সামগ্ৰী আদি সৰবৰাহৰ ওপৰত দৃষ্টি ৰখাৰ বাবে চলোৱা নিয়মীয়া তালাচীৰ সময়ত এই নগদ ধনখিনি জব্দ কৰা হয়।
এই নগদ ধনখিনি এখন মাৰুতি অল্টোৰ পৰা জব্দ কৰা হয় আৰু গাড়ীখনত থকা ব্যক্তিজনে এই ধনখিনি তেজপুৰৰ এক ব্যৱসায়িক প্ৰতিষ্ঠানৰ বুলি দাবী কৰে।
অৱশ্যে, বৈধ সমৰ্থিত নথিৰ অভাৱৰ বাবে আৰক্ষী বিষয়াই গাড়ীখন জব্দ কৰে আৰু জিলা নিৰ্বাচনী বিষয়াৰ নিৰ্দেশ অনুসৰি ধনখিনি তেজপুৰৰ কোষাগাৰ কাৰ্যালয়লৈ প্ৰেৰণ কৰে।
জব্দ কৰা ধনখিনি ৰাজহ চক্ৰ বিষয়া আকাশদ্বীপ কাকতি, কোষাগাৰ বিষয়া তৰুণ শইকীয়া আৰু ফ্লায়িং স্কোৱাডৰ প্ৰতিনিধিৰ উপস্থিতিত গণনা কৰা হয়। স্বত্ত্বাধিকাৰীগৰাকীক ধনখিনি ঘুৰাই পোৱাৰ দাবী প্ৰমান কৰিবলৈ উপযুক্ত নথি দাখিল কৰিবলৈ কোৱা হৈছে আৰু তদন্ত চলি আছে।
ভাৰতীয় নিৰ্বাচন আয়োগৰ নিৰ্দেশনা অনুসৰি, নিৰ্বাচন অনুষ্ঠিত হোৱা পৰ্যায়ত সাধাৰণ নাগৰিকে ৫০,০০০কৈ অধিক নগদ ধন আৰু ১০,০০০তকৈ অধিক মূল্যৰ উপহাৰ সামগ্ৰী কঢ়িয়াই আনিলে বৈধ নথি ৰাখিব লাগিব লাগিব। ব্যাখ্যা আগবঢ়াবলৈ অসমৰ্থ ৫০,০০০কৈ অধিক নগদ ধন কঢ়িয়ালে সেয়া লগে লগে জব্দ কৰা হ’ব আৰু ই নিৰ্বাচনৰ সৈতে কোনোপধ্যে জড়িত নহয় বুলি প্ৰমান কৰাৰ পাছতহে মুকলি কৰি দিয়া হ’ব।
তদুপৰি, জিলা পৰিষদৰ মুখ্য কাৰ্যবাহী বিষয়া ৰমেন মালাকৰ, এচিএছ বিষয়া ফাৰুক আলম আৰু জিলা কোষাগাৰ বিষয়াক সদস্য হিচাপে লৈ তেজপুৰ নিৰ্বাচনী জিলাৰ বাবে এখন জব্দ কৰা ধন তথা সামগ্ৰী মুকলি কমিটি গঠন কৰা হৈছে।
