বুধবাৰে দিল্লী উচ্চ ন্যায়ালয়ৰ এগৰাকী ন্যায়াধীশৰ বাংলোত অগ্নিকাণ্ড সংঘটিত হয়। এই অগ্নিকাণ্ডৰ ঘটনাক কেন্দ্ৰ কৰি এতিয়া উচ্চ ন্যায়ালয়ৰ কৰিডৰত বিয়পি পৰিছে উত্তেজনা। জানিব পৰা মতে, ন্যায়াধীশগৰাকীৰ ঘৰৰ পৰা বৃহৎ পৰিমাণৰ নগদ ধন উদ্ধাৰ কৰা হৈছে। এই ঘটনাত উচ্চতম ন্যায়ালয়ৰ কলেজিয়ামেও ক্ষিপ্ৰ ব্যৱস্থা ল’বলৈ বাধ্য হৈছে। ন্যায়াধীশগৰাকীক আন এখন উচ্চ ন্যায়ালয়লৈ বদলি কৰাৰ সিদ্ধান্ত লোৱা হৈছে।
টাইমছ অৱ ইণ্ডিয়াত প্ৰকাশিত এক বাতৰি অনুসৰি অগ্নিকাণ্ডৰ সময়ত ন্যায়াধীশ যশৱন্ত বাৰ্মা মহানগৰীত উপস্থিত নাছিল আৰু তেওঁৰ পৰিয়ালৰ লোকে অগ্নিনিৰ্বাপক বাহিনী আৰু আৰক্ষীক এই বিষয়ে অৱগত কৰে। জুই নিয়ন্ত্ৰণলৈ অনাৰ সময়ত অগ্নিনিৰ্বাপক বাহিনীৰ লোকে এটা কোঠাত বৃহৎ পৰিমাণৰ নগদ ধন উদ্ধাৰ কৰে।
ইপিনে, স্থানীয় আৰক্ষীয়ে বিষয়টো তেওঁলোকৰ উৰ্ধতন বিষয়াক অৱগত কৰে। জব্দ কৰা হয় সেই নগদ ধন। এই তথ্য অতি সোনকালেই উচ্চতম ন্যায়ালয়ৰ মুখ্য ন্যায়াধীশ সঞ্জীৱ খান্নাৰ ওচৰলৈ যায়। ন্যায়াধীশ খান্নাই বিষয়টো গুৰুত্বসহকাৰে চোৱাচিতা কৰি লগে লগে কলেজিয়ামৰ এখন বৈঠক আহ্বান কৰে।
কলেজিয়ামে সৰ্বসন্মতিক্ৰমে ন্যায়াধীশ বাৰ্মাক শীঘ্ৰে বদলি কৰাৰ সিদ্ধান্ত লয়। তেওঁক এলাহাবাদ উচ্চ ন্যায়ালয়লৈ বদলি কৰা হৈছে। ইয়াৰ পূৰ্বে ২০২১ চনৰ অক্টোবৰ মাহত ন্যায়াধীশ বাৰ্মাক এলাহাবাদ উচ্চ ন্যায়ালয়ৰ পৰা দিল্লী উচ্চ ন্যায়ালয়লৈ বদলি কৰা হৈছিল।
প্ৰতিবেদনত অৱশ্যে দাবী কৰা হৈছে যে কলেজিয়ামৰ একাংশ সদস্যই এই গুৰুতৰ কাণ্ডটো কেৱল বদলিৰ মাজতে সীমাবদ্ধ কৰাৰ পক্ষত নাছিল। কলেজিয়ামৰ বৈঠকত কোৱা হৈছিল যে যদি বিষয়টো কেৱল বদলিৰ মাজতে সীমাবদ্ধ থাকে তেন্তে ইয়াৰ ফলত ন্যায়পালিকাৰ ভাবমূর্তিৰ ওপৰত নেতিবাচক প্রভাৱ পৰিব আৰু প্রতিষ্ঠানটোৰ প্রতি আস্থা কমি যাব৷
এই পৰিস্থিতিত ন্যায়াধীশ বাৰ্মাক পদত্যাগ কৰিবলৈ কোৱাৰ প্ৰস্তাৱ দাখিল কৰা হয়। লগতে কোৱা হৈছে যে যদি ন্যায়াধীশ বাৰ্মাই পদত্যাগ কৰিবলৈ অস্বীকাৰ কৰে তেন্তে মুখ্য ন্যায়াধীশে বিষয়টোৰ আভ্যন্তৰীণ তদন্ত আৰম্ভ কৰিব লাগে।
উল্লেখ্য যে ১৯৯৯ চনত উচ্চতম ন্যায়ালয়ে নিৰ্ধাৰণ কৰা আভ্যন্তৰীণ তদন্ত পদ্ধতি অনুসৰি যদি কোনো ন্যায়াধীশৰ বিৰুদ্ধে দুৰ্নীতি, অসৎ আচৰণ বা অনুশাসন ভংগৰ অভিযোগ উত্থাপন হয়, তেন্তে মুখ্য ন্যায়াধীশে প্ৰথমে ন্যায়াধীশগৰাকীৰ পৰা উত্তৰ বিচাৰিব। যদি মুখ্য ন্যায়াধীশে সন্তোষজনক উত্তৰ নাপায় তেন্তে তেওঁ তদন্তকাৰী পেনেল গঠন কৰিব পাৰে। য’ত উচ্চতম ন্যায়ালয়ৰ এজন ন্যায়াধীশ আৰু উচ্চ ন্যায়ালয়ৰ দুজন মুখ্য ন্যায়াধীশ থাকিব।
