শ্ৰীমন্ত শংকৰদেৱ সংঘৰ ৮৮সংখ্যক মৰিগাঁও অধিৱেশনৰ সাহিত্যৰথী লক্ষ্মীনাথ বেজবৰুৱা সমন্বয় ক্ষেত্ৰ শুকুৰবাৰে তৃতীয় দিনা জনসমুদ্ৰত পৰিণত হয়। পুৱাৰে পৰাই অধিৱেশনস্থলীত অগণন ভক্ত আৰু দৰ্শনাৰ্থীৰ লানি নিছিগা সোঁত বয়। কৃষ্ণ বন্দনা আৰু জগত গুৰুৰ বন্দনাৰে মুখৰ হৈ পৰে মৰিগাঁৱৰ আকাশ-বতাহ।
শুকুৰবাৰে দুপৰীয়াৰ পৰা প্ৰাক্তন পদাধিকাৰ কৰুণাকান্ত কলিতা সোঁৱৰণী মঞ্চত অনুষ্ঠিত হয়। সংঘৰ নৱ-নিৰ্বাচিত পদাধিকাৰ কমলাকান্ত গগৈৰ সভাপতিত্বত অনুষ্ঠিত সভাখনত উদ্বোধনী ভাষণ প্ৰদান কৰে বিদায়ী পদাধিকাৰ ভবেন্দ্ৰ নাথ ডেকাই।
ডেকাই তেওঁ ভাষণত নাগৰিকত্ব সংশোধনী বিধেয়কৰ প্ৰসংগ উত্থাপন কৰি বিধেয়খন জাতিটোৰ বাবে বিপজ্জনক আৰু এই বিধেয়কখনে অসমীয়া ভাষা-সংস্কৃতি ধ্বংস কৰি তুলিব বুলি মন্তৱ্য কৰে। ডেকাই লগতে কয় যে কৃষ্ণ সংস্কৃতিৰ প্ৰবক্তাই হৈছে জগতগুৰু শংকৰদেৱ। গুৰুজনাই একতাৰ ডোলেৰে অসমীয়া সমাজখন গঢ়িব বিচাৰিছিল।
ডেকাই লগতে কয় যে মহাপুৰুষজনা এনে এগৰাকী ব্যক্তি, যি একেধাৰে ধৰ্মপ্ৰচাৰক, প্ৰবক্তা, কবি, গীতিকাৰ, নাট্যকাৰ, সমাজ বিজ্ঞানী, চিত্ৰকৰ, স্থাপত্যবিদ। তেওঁৰ মহত্ত্বতম আদৰ্শই অসমীয়া সংস্কৃতি তথা সমাজখনক উচ্চ শিখৰলৈ লৈ যোৱাৰ লগতে মানৱতাবাদী চিন্তাৰে সমাজখনক নেতৃত্ব দিছিল।
আনহাতে,অধিৱেশনৰ দ্বিতীয় দিনা বৃহস্পতিবাৰে নিশা অনুষ্ঠিত প্ৰতিনিধি সভাত একাংশ প্ৰতিনিধিয়ে নাগৰিকত্ব সংশোধনী বিধেয়ক সন্দৰ্ভত বিধেয়কখন বাতিলৰ দাবী জনাই প্ৰস্তাৱ গ্ৰহণ কৰিব বিচাৰে। বিদায়ী পদাধিকাৰ ভবেন্দ্ৰ নাথ ডেকাৰ সভাপতিত্বত অনুষ্ঠিত সভাখনত অৱশ্যে কোনো আনুষ্ঠানিক প্ৰস্তাৱ গ্ৰহণ কৰা হোৱা নাই।
আনহাতে, শুকুৰবাৰে অনুষ্ঠিত মুকলি সভালৈ মুখ্য মন্ত্ৰী সৰ্বানন্দ সোণোৱাল, বিত্তমন্ত্ৰী ড০ হিমন্ত বিশ্ব শৰ্মা, উদ্যোগ মন্ত্ৰী চন্দ্ৰমোহন পাটোৱাৰীকে ধৰি বহু কেইগৰাকী মন্ত্ৰী-বিধায়কক নিয়ন্ত্ৰণ জনোৱা হৈছিল যদিও তেওঁলোকৰ এজনো উপস্থিত নাথাকিল।
তাৎপৰ্যপূৰ্ণ যে আদৰণী সমিতিৰ কাৰ্যকৰী সভাপতি তথা মৰিগাঁও সমষ্টিৰ বিজেপি বিধায়ক ৰমাকান্ত দেউৰী, বি টি এ ডিৰ মুখ্য কাৰ্যবাহী সদস্য হাগ্ৰামা মহিলাৰী, সদৌ অসম ছাত্ৰ সন্থাৰ মুখ্য উপদেষ্টা ড০ সমুজ্জ্বল কুমাৰ ভট্টাচাৰ্যকে ধৰি বহু কেইগৰাকী ৰাজনৈতিক-অৰাজনৈতিক লোকক আমন্ত্ৰণ কৰা হৈছিল। কিন্তু এইসকলৰো কোনো এজনেই মুকলি সভাত উপস্থিত নাথাকিল।