হুজিৰ এজন অন্যতম নতুন নেতা আটিকুল্লাহক বাংলাদেশলৈ পৃষ্ঠপোষক বিচাৰি প্ৰেৰণ কৰিছিল মুফটি শ্বাহিদ নামৰ এজন প্ৰাক্তন হুজি নেতাই।
বাংলাদেশৰ সন্ত্ৰাস বিৰোধী আৰক্ষীৰ মুখ্য অতিৰিক্তি আয়ুক্ত মনিৰুল ইছলামে হুজিৰ নেতাজনৰ স্বীকাৰোক্তি বুলি জানিবলৈ দি সংবাদ মাধ্যমক কয়।
যোৱা ২ অক্টোবৰত আটিকুল্লাহ আন দুজন সহযোগী বোৰহান উদ্দিন ৰাবানী (৪২) আৰু নাজিম উদ্দিন ওৰফে শ্বামিমৰ (৪৩) সৈতে বাংলাদেশ আৰক্ষীৰ হাতত ঢাকাত ধৰা পৰিছিল।
তেওঁলোকৰ বিৰুদ্ধে ফৌজদাৰী আইনৰ ধাৰা ১৬৪-ৰ অধীনত গোচৰ ৰুজু কৰা হয় আৰু হুজিৰ সদস্যকেইজনে আদালতত এই স্বীকাৰোক্তি দিয়ে বুলি আৰক্ষী বিষয়াজনৰ দাবী।
“মুফটি শ্বাহিদ আৰু কেইজনমান পাকিস্তানী লোকে আটিকুল্লাহক বাংলাদেশলৈ পৃষ্ঠপোষক বিচাৰি যোৱা মাৰ্চত প্ৰেৰণ কৰিছিল। তেওঁ অতীত ৰেকৰ্ডে তেওঁৰ সফলতা সন্দৰ্ভত আশাবাদী কৰিছিল তেওঁলোকক”, আৰক্ষী বিষয়া মনিৰুল ইছলামে কয়।
“দেশখনত কোনো কূটাঘাত নকৰাৰ প্ৰতিশ্ৰুতি দিয়াৰ পিছত তেওঁ নিৰ্দিষ্ট কিছুমান লোকৰ সৈতে এই বিষয়ত দৰদাম কৰিবলৈ আহিছিল”, আৰক্ষী বিষয়াজনে কয়।
অৱশ্যে আৰক্ষী বিষয়াজনে আটিকুল্লাহক টকা দিয়া মানুহৰ নাম বা লক্ষ্য দেশ সম্পৰ্কত মন্তব্য কৰাৰ পৰা বিৰত থাকে।
পাকিস্তানী ইণ্টেলিজেন্স এজেন্সিয়ে বাংলাদেশৰ সন্ত্ৰাসবাদীসকলক ভাৰতক অস্থিৰ কৰি তোলাৰ কামত নিয়োগ কৰি আহিছে।
বৰ্তমানৰ শ্বেইখ হাছিনা নেতৃত্বাধীন চৰকাৰখনে সন্ত্ৰাসবাদৰ প্ৰতি শূন্য সহনশীল বুলি দাবী কৰি থাকে যদিও আটিকুল্লাহৰ দৰে একাংশ ইছলাম ভিত্তিক সন্ত্ৰাসবাদী এতিয়াও প্ৰশাসনৰ তলৰ স্তৰৰ কিছু চৰকাৰী বিষয়াৰ বেআইনী সমৰ্থন লাভ কৰিবলৈ সক্ষম হৈ আহিছে।
আটিকুল্লাহৰ গ্ৰেপ্তাৰৰ পিছতে সন্ত্ৰাসবাদ বিৰোধী বিষয়াসকলে মন্তব্য কৰিছিল যে আটিকুল্লাহে সন্ত্ৰাসবাদী সংগঠনটোক কাশ্মীৰ আৰু ৰহিংগীয়া সংকটক মূলধন কৰি নতুনকৈ গঢ় দিব খুজিছিল।
আৰক্ষীৰ মতে, আটিকুল্লাহ আফগান যুদ্ধফেৰৎ আৰু তেওঁ এজন আই ই ডি বিশেষজ্ঞ। ২০০৬ চনৰ পৰা চৌদি আৰবীয়াৰ ডুবাইত আত্মগোপন কৰি থকা আটিকুল্লাহক বাংলাদেশলৈ পৃষ্ঠপোষক বিচাৰি প্ৰেৰণ কৰা মুফটি শ্বাহিদো ডুবাইত আত্মগোপন কৰি আছে।
আনহাতে আটিকুল্লাহে আল কয়দাৰ মুৰব্বী ওচামা বিন লাদেনকো লগ পাইছিল বুলি কোৱা শুনা যায়।
প্ৰাক্তন হুজি নেতা তথা বাংলাদেশে দুবছৰ পূৰ্বে ফাঁচি দিয়া মুফটি আব্দুল হান্নানে আটিকুল্লাহক সংগঠনটোৰ সাংগঠনিক সম্পাদক পাতিছিল। তেওঁক পিছত বিত্ত আৰু আন্তঃৰাষ্ট্ৰীয় সম্পৰ্কৰ দায়িত্ব দিয়া হৈছিল।
