ৰাজস্থানৰ শ্ৰীগংগানগৰ জিলাত সংঘটিত এক মৰ্মান্তিক ঘটনাই এতিয়া সমগ্ৰ দেশজুৰি চাঞ্চল্যৰ সৃষ্টি কৰিছে। যিখন ঘৰত মাত্ৰ তিনি মাহ আগতে বিয়াৰ আনন্দময় পৰিৱেশ আছিল, সেইখন ঘৰ এতিয়া শোকত ম্ৰিয়মাণ হৈ পৰিছে। এগৰাকী ২৩ বছৰীয়া যুৱতীয়ে নিজৰ প্ৰেমিক আৰু তেওঁৰ বন্ধুৰ সহযোগত নিজৰ স্বামীক ডিঙি চেপি হত্যা কৰাৰ এক জঘন্য ঘটনা পোহৰলৈ আহিছে। এই ঘটনাক এতিয়া ৰাজস্থানৰ হানিমুন মাৰ্ডাৰ বুলি অভিহিত কৰা হৈছে।
নিহত যুৱকজনৰ নাম আছিল আশীষ আৰু তেওঁ এম এছ চি ভূবিজ্ঞানৰ ছাত্ৰ হোৱাৰ লগতে বি এড পঢ়ি আছিল। আনহাতে অভিযুক্তা পত্নী অঞ্জলি আছিল এম কমৰ ছাত্ৰী। আশীষক তেওঁৰ খুড়া-খুড়ীয়ে সৰুতেই তোলনীয়া পুত্ৰ হিচাপে লৈছিল আৰু অতি আদৰত ডাঙৰ-দীঘল কৰিছিল। তিনি মাহ আগতে অঞ্জলিৰ সৈতে তেওঁৰ অতি ধুমধামেৰে বিয়া হৈছিল। আশ্চৰ্যজনক কথাটো হ’ল যে অঞ্জলি আছিল আশীষৰ তোলনীয়া মাকৰ নিজৰ ভতিজী। দুয়োটা পৰিয়ালৰ মাজত অতি ঘনিষ্ঠ সম্পৰ্ক আছিল যদিও কোনেও কল্পনা কৰা নাছিল যে এনে এটা ভয়ংকৰ ঘটনা ঘটিব পাৰে।
৩০ জানুৱাৰীৰ সন্ধিয়া অঞ্জলি আৰু আশীষ ফুৰিবলৈ ওলাই গৈছিল। আশীষৰ ভাতৃৰ মতে, সেইদিনা অঞ্জলিৰ কথা মতে তেওঁলোকে এটা নিৰ্জন পথ বাছি লৈছিল। সেই নিৰ্জন ঠাইতে অঞ্জলিৰ পূৰ্বৰ প্ৰেমিক সঞ্জুৱে তেওঁৰ দুই বন্ধুৰ সৈতে জোপোহাৰ আঁৰত খাপ পিটি আছিল। সুযোগ বুজি তেওঁলোকে আশীষক আক্ৰমণ কৰে আৰু ডিঙি চেপি হত্যা কৰে। ঘটনাটোক এক পথ দুৰ্ঘটনা বুলি প্ৰমাণ কৰিবলৈ অঞ্জলিয়ে নিজৰ কাণৰ ফুলিযোৰো সঞ্জুক দি দিছিল আৰু নিজেও অচেতন হোৱাৰ ভাও ধৰি ৰাস্তাত পৰি আছিল।
প্ৰথমতে সকলোৱে ইয়াক পথ দুৰ্ঘটনা আৰু ডকাইতি বুলি ভাবিছিল যদিও আশীষৰ শৰীৰত থকা আঘাতৰ চিন আৰু অঞ্জলিৰ কথাৰ অমিলবোৰে আৰক্ষীৰ সন্দেহ বঢ়াই তোলে। আৰক্ষীৰ তীব্ৰ তদন্তত ওলাই পৰে যে অঞ্জলিয়ে বিয়াৰ পিছতো নিজৰ পুৰণা প্ৰেমিক সঞ্জুৰ সৈতে সম্পৰ্ক ৰাখিছিল। সঞ্জু পেছাত বিয়া-সবাহ আদি অনুষ্ঠানত কাম কৰা এজন সাধাৰণ ৱেইটাৰ আছিল। উচ্চ শিক্ষিত আৰু চহকী পৰিয়ালৰ আশীষৰ তুলনাত সঞ্জু একোৱেই নাছিল, কিন্তু অঞ্জলিয়ে প্ৰেমিকৰ বাবে সকলো পাহৰি স্বামীক নিৰ্মমভাৱে হত্যা কৰাৰ পৰিকল্পনা কৰিছিল।
এই ঘটনা পোহৰলৈ অহাৰ পিছত আশীষৰ পৰিয়ালৰ লগতে অঞ্জলিৰ নিজৰ পৰিয়ালেও তীব্ৰ লাজ আৰু ক্ষোভ প্ৰকাশ কৰিছে। আশীষৰ পিতৃয়ে অভিযুক্তা অঞ্জলিক ফাঁচীৰ শাস্তি দিবলৈ চৰকাৰৰ ওচৰত দাবী জনাইছে। আনহাতে অঞ্জলিৰ খুড়াকে জনাইছে যে তেওঁলোকে এনে সম্পৰ্কৰ কথা একেবাৰেই নাজানিছিল আৰু নিজৰ ভতিজীৰ এনে জঘন্য কামৰ বাবে তেওঁলোকে এতিয়া মানুহৰ আগত মুখ উলিয়াব নোৱাৰা হৈছে। অঞ্জলিৰ পৰিয়ালেও তাইৰ বাবে মৃত্যুদণ্ডই বিচাৰিছে। বৰ্তমান আৰক্ষীয়ে অঞ্জলিৰ লগতে সঞ্জু আৰু তেওঁৰ দুই বন্ধুক গ্ৰেপ্তাৰ কৰি কাৰাগাৰলৈ প্ৰেৰণ কৰিছে।
