‘বিমানত এজন যাত্ৰীৰ ওচৰত বোমা আছে। তেওঁৱেই আক্ৰমণ চলাব।’ ই-মেইলযোগে এই ভাবুকি দিয়া হৈছিল বিমানবন্দৰ কৰ্তৃপক্ষক। কুৱেইটৰ পৰা হায়দৰাবাদ অভিমুখী ইণ্ডিগ’ৰ বিমানত আক্ৰমণৰ এই ভাবুকি বাৰ্তা লাভ কৰাৰ পিছতে ৰাজীৱ গান্ধী আন্তঃৰাষ্ট্ৰীয় বিমানবন্দৰ কৰ্তৃপক্ষই ব্যৱস্থা গ্ৰহণ কৰে। হায়দৰাবাদত অৱতৰণ কৰাৰ পৰিৱৰ্তে বিমানখন মুম্বাইলৈ ঘুৰাই অনা হয়।
অৱশ্যে ইণ্ডিগোৰ বিমানখন নিৰাপদে মুম্বাই বিমানবন্দৰত অৱতৰণ কৰে। আটাইকেইজন যাত্ৰীক নমাই বিমানখন সুকীয়া স্থানলৈ লৈ যোৱা হয়। তাৰ পিছত পৰীক্ষা আৰম্ভ হয়। সকলো সতৰ্কতামূলক ব্যৱস্থা গ্ৰহণ কৰা হয়। জৰুৰীকালীন ব্যৱস্থাৰ বাবে নিয়োগ কৰা হয় নিৰাপত্তাৰক্ষীৰ দল।
বিমানবন্দৰৰ বিষয়াসকলে পৰিস্থিতি নিৰীক্ষণ কৰি আছে। যদিও এতিয়ালৈকে কোনো অপ্ৰীতিকৰ ঘটনাৰ খবৰ পোৱা নাই। বিমানখনত কিমানজন যাত্ৰী আছিল সেয়া এতিয়াও জানিব পৰা হোৱা নাই। ইণ্ডিগ’ই এই পৰ্যন্ত কোনো আনুষ্ঠানিক বাৰ্তা দিয়া নাই। অৱশ্যে সকলো যাত্ৰী সুৰক্ষিত বুলি জানিব পৰা গৈছে।
ইণ্ডিগ’ এয়াৰবাছ এ৩২১-২৫১এনএক্স – পুৱা ১:৫৬ বজাত কুৱেইটৰ পৰা উৰা মাৰি মহাৰাষ্ট্ৰৰ মুম্বাইত পুৱা ৮:১০ বজাত অৱতৰণ কৰে।
২৩ নৱেম্বৰত হায়দৰাবাদৰ ৰাজীৱ গান্ধী আন্তঃৰাষ্ট্ৰীয় বিমানবন্দৰত বাহৰেইনৰ পৰা অহা বিমানত বোমাৰ ভাবুকি দিয়াৰ ফলত বিমানখন মুম্বাইলৈ ডাইভাৰ্ট কৰা হয়। সেই বিমানখনো নিৰাপদে অৱতৰণ কৰে। বিমানবন্দৰ কৰ্তৃপক্ষই এই ভাবুকিক ভুৱা বুলি অভিহিত কৰিছে।
আৰক্ষীয়ে জনোৱা মতে, আৰ জি আই বিমানবন্দৰ কৰ্তৃপক্ষই এটা গোচৰ ৰুজু কৰিছে।
