দেশত মহিলাৰ বিৰুদ্ধে ভয়াৱহ হাৰত অপৰাধ বৃদ্ধি পোৱাৰ সময়তে হায়দৰাবাদ বিশ্ববিদ্যালয়ৰ এগৰাকী অধ্যাপকৰ নিৰ্লজ্জ কাণ্ডই লজ্জানত কৰিছে দেশক। এগৰাকী বিদেশী ছাত্ৰীক যৌন উৎপীড়নৰ চেষ্টা চলাই ৰঙাঘৰৰ আলহী হ’বলগীয়া হৈছে বিশ্ববিদ্যালয়খনৰ এগৰাকী অধ্যাপক।
অভিযোগ অনুসৰি, অভিযুক্ত অধ্যাপকগৰাকীয়ে বিশ্ববিদ্যালয়খনত অধ্যয়নৰত থাইলেণ্ডৰ এগৰাকী ছাত্ৰীক শুকুৰবাৰে কিতাপ দিয়াৰ অজুহাতত নিজৰ বাসগৃহলৈ মাতি নিয়ে। কিন্তু ছাত্ৰীগৰাকী তেওঁৰ বাসগৃহত উপস্থিত হোৱাৰ পিছত অধ্যাপিকাগৰাকীয়ে ছাত্ৰীগৰাকীক যৌন উৎপীড়নৰ চেষ্টা চলায়।
এই ঘটনাৰ বিষয়ে ছাত্ৰীগৰাকীয়ে আৰক্ষীৰ ওচৰত অভিযোগ দাখিল কৰাৰ পিছত চাইবেৰাবাদ আৰক্ষীয়ে অভিযুক্ত অধ্যাপকগৰাকীক গ্ৰেপ্তাৰ কৰি জিম্মাত লয়।
জিলাখনৰ এগৰাকী শীৰ্ষ আৰক্ষী বিষয়াই ঘটনা সন্দৰ্ভত সংবাদ মাধ্যমৰ আগত কয়, “শুকুৰবাৰে হায়দৰাবাদ বিশ্ববিদ্যালয়ৰ ছাত্ৰীগৰাকীক কিতাপ দিয়াৰ অজুহাতত অধ্যাপিকাগৰাকীৰ ঘৰলৈ লৈ যোৱা হৈছিল আৰু তাৰ পিছত তাতেই তেওঁ নিৰ্যাতন চলাবলৈ চেষ্টা কৰিছিল।”
ছাত্ৰীগৰাকীৰ কেইবাগৰাকীমান বন্ধুৱে ক্ৰন্দনৰত অৱস্থাত তেওঁক উদ্ধাৰ কৰে আৰু ঘটনাৰ বিষয়ে জানিব পাৰে। তাৰ পাছতেই তেওঁলোক স্থানীয় আৰক্ষীৰ কাষ চাপে।
ঘটনা সন্দৰ্ভত আৰক্ষীয়ে তদন্ত অব্যাহত ৰাখিছে আৰু উপযুক্ত তথ্য-প্ৰমাণৰ আধাৰত অভিযুক্ত অধ্যাপকগৰাকীৰ বিৰুদ্ধে ব্যৱস্থা গ্ৰহণ কৰা হ’ব বুলি আৰক্ষী বিষয়া গৰাকীয়ে লগতে সংবাদ মাধ্যমক অৱগত কৰে।
