যিকোনো টিম গেমত দলৰ প্ৰত্যেক গৰাকীৰ খেলুৱৈৰ ওপৰতে নিৰ্ভৰ কৰে প্ৰদৰ্শন। দলে এজন খেলুৱৈক লৈ ভৰষা নকৰে। মেচ জয়ী হ’বলৈ লাগিব প্ৰত্যেকজন খেলুৱৈৰে অৱদান। কিন্তু চলিত বিশ্বকাপ ক্ৰিকেটত এজন ক্ৰিকেটাৰৰ প্ৰদৰ্শনৰ ভিত্তিতে ছেমিফাইনেল খেলাৰ সপোন দেখিছে বাংলাদেশ ক্ৰিকেট দলে।
ইংলেণ্ডত চলি থকা ক্ৰিকেট বিশ্বকাপত সম্প্ৰতি বাংলাদেশ দুৰ্দান্ত ফৰ্মত। ৭খন মেচৰ তিনিখনত জয় তিনিখনত পৰাজয় আৰু এখন অনিৰ্ণীতৰে পইণ্টছ তালিকাৰ পঞ্চম স্থানত বাংলাদেশ। দলটোৰ এই প্ৰদৰ্শনৰ মূলতে ষ্টাৰ অলৰাউণ্ডাৰ চাকিব আল হাছান।
ক্ৰিকেটিং কেৰিয়াৰৰ সৰ্বোচ্চ ফৰ্মত থকা চাকিবে বিশ্বকাপৰ এই পৰ্যন্ত ছয়খন মেচত সংগ্ৰহ কৰিছে ৪৭৬ ৰান। ৩২ বছৰীয়া ষ্টাৰ অল ৰাউণ্ডাৰ গৰাকীয়ে ঘৰুৱা দল ইংলেণ্ডৰ বিৰুদ্ধে ১২১ ৰান আৰু ৱেষ্ট ইণ্ডিজৰ বিপক্ষে ১২৪ ৰানৰ বিস্ফোৰক অপৰাজিত শতকীয় ইনিংছৰ উপৰি খেলিছে তিনিটা অৰ্ধশতকীয় ইনিংছ।
লগতে পঢ়ক : অপ্ৰতিৰোধ্য বাংলাদেশী চাকিব : অদমনীয় প্ৰদৰ্শনেৰে বিশ্বকাপত ৰচিলে অনন্য অভিলেখ
প্ৰতিযোগিতাখনৰ ছেমিফাইনেলত প্ৰৱেশ কৰিবলৈ বাংলাদেশৰ সন্মুখত দুখন কঠিন মেচ। যিকোনো প্ৰকাৰে হৰুৱাব লাগিব ভাৰত আৰু পাকিস্তানক। এছিয়াৰ এই বৃহৎ শক্তিশালী দল দুটাক পৰাস্ত কৰাতো কঠিন যদিও ২০০৭ ৰ বিশ্বকাপত ভাৰতক পৰাস্ত কৰাৰ উদাহৰণ আছে আৰু এইবাৰো পৰাস্ত কৰিব পাৰিব বুলি গভীৰ আত্মবিশ্বাসী চাকিব।
‘ভাৰত শক্তিশালী দল। তেওঁলোক কাপ জয়ৰ অন্যতম দাবীদাৰ। ইমান সহজ নহয় যদিও আমাৰ ফালৰ পৰা শ্ৰেষ্ঠত্ব উজাৰি দিম’। আত্মবিশ্বাসী চাকিবৰ এই মন্তব্য।
তেওঁ লগতে কয় যে যিকোনো পৰিস্থিতিতে মেচ নিজৰ কৰি ল’ব পৰা ক্ষমতা ভাৰতj আছে সেয়ে আমি এশ শতাংশ উজাৰি দিব লাগিব আৰু ভাৰতক পৰাস্ত কৰিব পৰা ক্ষমতা আমাৰ আছে বুলি মোৰ বিশ্বাস আছে।
বিশ্বকাপত বেটে বলে উজলি উঠা চাকিবে অহা ২ জুলাইত ভাৰতৰ বিৰুদ্ধে অনুষ্ঠিত হ’ব লগীয়া মেচতো শ্ৰেষ্ঠ প্ৰদৰ্শন দাঙি ধৰিব বুলি টিম মেনেজমেণ্টে আশা প্ৰকাশ কৰিছে।
