আই পি এলৰ চলিত ছিজনত ৰাজস্থান ৰয়েলছৰ হৈ চমকপ্ৰদ প্ৰদৰ্শন দাঙি ধৰি চিজন সামৰা ৰিয়ান পৰাগে আজি তেওঁৰ বাসগৃহত এক সংবাদমেল আয়োজন কৰি আই পি এলত লাভ কৰা সাফল্য তথা অভিজ্ঞতা সম্পৰ্কে বৰ্ণনা কৰে।
দুই-তিনিটা ইনিংছৰ জৰিয়তে সকলোৰে দৃষ্টি আকৰ্ষণ কৰা ৰিয়ানে ৰাজস্থান ৰয়েলছৰ টিম মেনেজমেণ্টক অশেষ কৃতজ্ঞতা জ্ঞাপন কৰে। তেওঁ কয়, ‘প্ৰথম ছিজনতে ইমান কেইখন মেচ খেলিব পাম বুলি ভবা নাছিলো। কিন্তু মেচ খেলাৰ সুযোগ পাই এনেধৰণৰ প্ৰদৰ্শন দেখুৱাব পৰা বাবে বহুত আনন্দিত হৈছো’।
সৰুৰে পৰা টিভিত দেখি অহা খেলুৱৈ সকলক ড্ৰেছিং ৰুমত ওচৰৰ পৰা লগ পাই খুবেই আনন্দিত বুলিও মন্তব্য কৰে ৰিয়ানে। তেওঁলোকৰ সৈতে মনৰ ভাব আদান প্ৰদান কৰি নিজে বহু উৎসাহিত হৈছোঁ বুলিও ৰিয়ানে কয়।
‘তেওঁলোক বহু মুকলি মনৰ আছিল আৰু মোক বহু ভালকৈ গাইড কৰিছিল। পৰিস্থিতিৰ সৈতে কিদৰে মোকাবিলা কৰিব লাগে এই বিষয়ে মোক ভালেখিনি কথা শিকাইছে’। সংবাদমেলত এইদৰে কয় ৰিয়ানে।
ইপিনে, আই পি এলৰ কেইবাখনো খেলত ৰিয়ানে কঁকালত অসমীয়াৰ স্বাভিমান ‘গামোচা’খন লোৱাক কেন্দ্ৰ কৰি সৃষ্টি হোৱা চৰ্চা সম্পৰ্কত প্ৰতিক্ৰিয়া প্ৰকাশ কৰি ৰিয়ানে কয়, ‘অসমৰ গামোচাখন আন্তঃৰাষ্ট্ৰীয় পৰ্যায়ত দাঙি ধৰাৰ বাবে মই গামোচা খন লগত ৰাখিছিলো। যিমানখিনি সম্ভৱ হয় সকলোকে গামোচা খনৰ বিষয়ে কবলৈ চেষ্টা কৰিছিলো’।
ৰিয়ানে এখন খেলত বিহু নৃত্য প্ৰদৰ্শন কৰাক লৈও মন্তব্য কৰে ৰিয়ানে। ‘ডোৱায়েন ব্ৰেভ’, কাইৰণ পোলাৰ্ড এ যিদৰে নৃত্য কৰে, ঠিক সেইদৰে মই অলপ বেলেগ ধৰণে নাচিবলৈ চেষ্টা কৰিছিলো। আমাৰ ইমান ধুনীয়া পৰম্পৰা আছে, গতিকে মই সেইটোকে উপস্থাপন কৰাৰ বাবে চেষ্টা কৰিছিলো’। এইদৰে কয় ৰিয়ানে।
ইয়াৰ উপৰি আই পি এলৰ স্মৰণীয় মুহুৰ্তৰ বিষয়ে সোধা প্ৰশ্নৰ উত্তৰত ৰিয়ানে কয়, ‘মই বেটিং কৰি থকাৰ সময়ত মোৰ পিছফালে মহেন্দ্ৰ সিং ধোনি উইকেট ৰক্ষক আছিল আৰু ইমৰান তাহিৰে বল কৰি আছিল, এয়ে মোৰ স্মৰণীয় মুহূৰ্ত’।
ৰিয়ানৰ এই সাফল্যৰ অন্তৰালত পিতৃ পৰাগ দাসৰ অৰিহনা যথেষ্ট আছে বুলিও ক্ৰিকেটাৰগৰাকীয়ে উল্লেখ কৰে। তেওঁ কয়, ‘এই সফলতাৰ আঁৰত আছে মোৰ পিতৃ। যদি সৰুৰে পৰা দেউতাক ক্ৰিকেট খেলা দেখা নাপালোঁহেঁতেন, মই মোৰ যাত্ৰা আৰম্ভ কৰিব নোৱাৰিলোঁহেতেন। দেউতাক চাই চাই মই ক্ৰিকেট খেলা আৰম্ভ কৰিছিলো।”
আনহাতে ভাৰতীয় ক্ৰিকেটৰ আটাইতকৈ সফলতম অধিনায়ক তথা বিশ্বৰ শ্ৰেষ্ঠ উইকেট ৰক্ষক হিচাপে বিবেচিত মহেন্দ্ৰ সিং ধোনীৰ সন্দৰ্ভতো ৰিয়ানে কেতবোৰ গুৰুত্বপূৰ্ণ মন্তব্য কৰে।
‘মেচৰ অন্তত ধোনীৰ লগত মই ৫-১০ মিনিট কথা পাতিছিলোঁ। ধোনীয়ে মোক approach কৰিছিল কেনেদৰে খেলিব লাগে। ধোনীৰ সৈতে অধিক সময় কথা পাতি আৰু অলপ জ্ঞান ল’ব পাৰিলে ভাল লাগিব’। ধোনী সন্দৰ্ভত এই মন্তব্য ৰিয়ানৰ।
ইফালে অসমৰ আন আন ক্ৰিকেটাৰ সকলো যাতে ৰাষ্ট্ৰীয় পৰ্যায়ত জিলিকি উঠিব পাৰে তাৰ বাবেও কামনা কৰে ৰিয়ানে।
