নিজৰ ক্ষমতাৰ অপব্যৱহাৰ কৰি আইন ভংগৰ অভিযোগ উত্থাপন হৈছে ভাৰতীয় প্ৰশাসনিক সেৱা তথা আই এ এছ বিষয়া পূজা খেডকাৰৰ বিৰুদ্ধে।
এটাৰ পিছত আনটো অভিযোগ উত্থাপন হৈছে ২০২৩ চনৰ আই এ এছ কেডাৰগৰাকীৰ বিৰুদ্ধে। তেওঁৰ ব্যক্তিগত অ’ডি গাড়ীত ৰঙা আৰু নীলা বিকন লাইট লগোৱাৰ পৰা আৰম্ভ কৰি গাড়ীৰ সন্মুখ আৰু পিছফালে ‘মহাৰাষ্ট্ৰ চৰকাৰ’ৰ ষ্টীকাৰ লগোৱালৈকে ক্ষমতাৰ অপব্যৱহাৰৰ কেইবাটাও অভিযোগ উত্থাপন হৈছে।
শেহতীয়াকৈ পুনে যান-বাহন আৰক্ষীয়ে জনোৱা মতে, পূজাৰ অ’ডি গাড়ীখনৰ বিৰুদ্ধে যান-বাহন আইন উলংঘা কৰাৰ অভিযোগত ২১টা অভিযোগ উত্থাপন হৈছে।
পুনে যান-বাহন আৰক্ষীৰ সূত্ৰ অনুসৰি ২১টা অভিযোগ অসাৱধানতাৰে গাড়ী চলোৱাৰ পৰা আৰম্ভ কৰি যান বাহন আইন ভংগ কৰালৈকে আছে।
ইতিমধ্যে পুনে আৰক্ষীয়ে পূজা খেদকাৰক ২৭ হাজাৰ টকা জৰিমনা বিহাৰ জাননী জাৰি কৰিছে।
আৰক্ষীয়ে জাৰি কৰা জাননীখনত কোৱা হৈছে যে আমি জানিব পাৰিছো যে আপোনাৰ ব্যক্তিগত বাহনখনৰ সন্মুখ আৰু পিছফালে ‘মহাৰাষ্ট্ৰ চৰকাৰ’ বুলি লিখা আছে, লগতে গাড়ীখনত বিকন লাইটো লগোৱা আছে।
খবৰ অনুসৰি পূজাৰ পিতৃ দিলীপ খেডকাৰ মহাৰাষ্ট্ৰ চৰকাৰৰ অৱসৰপ্ৰাপ্ত প্ৰশাসনিক বিষয়া। তদুপৰি নিৰ্বাচনতো প্ৰতিদ্বন্দিতা আগবঢ়াইছিল পূজাৰ পিতৃয়ে।
ইফালে এই অভিযোগ সন্দৰ্ভত সোধাত পূজাই কয়, “চৰকাৰী নিয়ম অনুসৰি এই বিষয়ে মোক একো ক’বলৈ দিয়া হোৱা নাই।”
